މާލޭގެ ޕްރީ ސްކޫލްތަކުގެ ދިރާސާ އާ އަހަރުގެ ކިޔެވުން ފެށުން މި މަހުގެ 20 ވަނަ ދުވަހަށް ފަސްކުރަން އެޑިއުކޭޝަން މިނިސްޓްރީން ނިންމައިފިއެވެ.
މާލޭގެ ސްކޫލްތަކަށް އެޑިއުކޭޝަންސް މިނިސްޓްރީން އަންގާރަ ދުވަހު އެންގި އެންގުމުގައި ވަނީ ޕްރީ ސްކޫލްތަކުގެ ކިޔެވުން ފެށުން މި މަހުުގެ 20 ވަނަ ދުވަހަށް ފަސްކުރަން ނިންމީ ފައުންޑޭޝަން ސްޓޭޖްގެ މަންހަޖަށް ގެނައި ބަދަލާ ގުޅިގެން އެކަން ޓީޗަރުންނާ ހިއްސާކޮށް، އެ މަންހަޖު ތަންފީޒު ކުރުމަށް ބޭނުންވާ ތަމްރީނުތައް ދިނުމަށް ކަމަށެވެ.
އެޑިއުކޭޝަންގެ އެންގުމުގައި ބުނެފައި ވަނީ، އަންނަ އާދިއްތަ ދުވަހުން ފެށިގެން މި މަހުގެ 17 ވަނަ ދުވަހުގެ ނިޔަލަށް މާލޭގެ ޕްރީ ސްކޫލްތަކުގެ ޓީޗަރުންނަށް ވޯކްޝޮޕެއް ބާއްވަން ނިންމާފައިވާ ކަމަށެވެ. އެހެންކަމުން ޕްރީ ސްކޫލްތަކުގެ ކިޔެވުން ފެށޭނީ މި މަހުގެ 20 ވަނަ ދުވަހު ކަމަށެވެ.
ޕްރީ ސްކޫލްތަކުގެ ކިޔެވުން ފަސް ކުރި ނަމަވެސް، ދިރާސީ އާ އަހަރުގެ ކިޔެވުންް އަންނަ އާދިއްތަ ދުވަހު ރަސްމީކޮށް ފަށާނެެއެވެ.
