އެމްއާރުއެމްގެ ތާއީދާއެކު މަޖިލީހަށް ކުރިމަތިލުމަށް ފުރުސަތު ހުޅުވާލައިފި
6 ޖެނުއަރީ 2019 | އާދީއްތަ 02:03ޝައުގުވެރިވާ ފަރާތްތަކުން މިމަހުގެ 10ގެ ކުރިން މެސެޖް ކުރުމަށް ވަނީ އެދިފައި
އެމްއާރުއެމް ގެ ބައެއް މެންބަރުން
ރައްޔިތުންގެ މަޖިލީހުގައި މައުމޫން ރީފޯމް މޫވްމަންޓް (އެމްއާރުއެމް)ގެ ފަރާތުން ވާދަކުރަން ޝައުގުވެރިވާ ފަރާތްތަކަށް ފުރުސަތު ހުޅުވާލައިފި އެވެ.
އެމްއާރުއެމްގެ ފަރާތުން ހޮނިހިރު ދުވަހު ކޮށްފައިވާ ޓްވީޓްގައި ވަނީ ރައީސް މައުމޫން އަބްދުލް ގައްޔޫމްގެ އެމްއާރުއެމްގެ ތާއީދާއެކު ރައްޔިތުންގެ މަޖިލީހަށް ކުރިމަތިލުމަށް ޝައުގުވެރިވާ ފަރާތްތަކުން މި މަހުގެ 10 ވަނަ ދުވަހުގެ ކުރިން 7965444 އަށް މެސެޖް ކުރުމަށް އެދޭ ކަމަށެވެ.
މޫވްމެންޓެއްގެ ގޮތުގައި އެމްއާރުއެމް އުފެދުނީ، ކުރީގެ ރައީސް މައުމޫން އުފެއްދެވި ޕީޕީއެމްއިން، އެ މަނިކުފާނު ވަކިކޮށް އެ ޕާޓީ ދެ ފަޅީވުމުންނެވެ. އެ ޕާޓީގެ މައްސަލަ ކޯޓަށް ހުށަހަޅާފައިވާއިރު، ޕާޓީ ގެއްލިދާނެ ކަމުގެ ބިރު އޮތުމުން ކުރީގެ ރައީސް ޔާމީން ވަނީ ޕާޓީއެއް އުފެއްދެވުމުގެ މަސައްކަތް ފައްޓަވައިފަ އެވެ.
ކޯލިޝަންގައި ހިމެނޭ އެހެން ޕާޓީތަކުން މަޖިލީހަށް ވާދަކުރަން ވަނީ ހުޅުވާލައިފަ އެވެ. ބައެއް ޕާޓީތަކުން ޕްރައިމަރީއަކާއި ނުލައި ޓިކެޓް ބަައެއް ކެންޑިޑޭޓުންނަށް ދީފައިވާއިރު، އެމްޑީޕީގެ ޕްރައިމަރީ މި މަހުގެ 18 ވަނަ ދުވަހު ބޭއްވުމަށް ވަނީ ނިންމައިފަ އެވެ.
