ތިނދޫގައި ފެން ހިންދުމުގެ މަސަތްކަތް އަދިވެސް ނުނިމޭ
ވިއްސާރައާ ގުޅިގެން ދެ ގެއެއްގައި ވެލި ބަސްތާ ޖެހި
ތިނަދުއަށް ކުރަމުންދާ ވިއްސާރަ
ހުވަދު އަތޮޅުގެ ބައެއް ރަށްތަކަށް ކުރަމުންދާ ވިއްސާރައިގައި ފެންބޮޑުވި ރަށްތަކުގެ ތެރޭގައި ހިމެނޭ ތިނަދޫ އިން ފެންހިންދުމުގެ މަސަތްކަތް އަދިވެސް ނުނިމޭ ކަމަށް އެމްއެންޑީއެފުން ބުނެފިއެވެ.
އެމްއެންޑީއެފުން ބުނެފައި ވަނީ ތިނަދޫ އަށް ހުއްޓުމެއް ނެތި ބައެއް ގަޑިތަކުގައި ވާރޭ ވެހެމުން ދާ ކަމަށާއި ހޮނިހިރު ދުވަހުގެ ހެނދުނުން ފެށިގެން ރަށުގެ އުތުރު ފަރާތުގައި ދެ ޕަމްޕު ޖައްސައިގެން ފެން ހިއްކުމުގެ މަސަތްކަތް ކޮށްފައިވާ ކަމަށެވެ. މީގެ އިތުރުން މިހާރު ވެސް ދަނީ ދެކުނު ފަރާތު އަބޫބަކުރު ސުކޫލް ސަރަހައްދުގައި ފެންހިއްކުމުގެ މަސަތްކަތް ކުރަމުން ކަމަށް އެމްއެންޑީއެފް އިން ވަނީ ބުނެފައެވެ. ވިއްސާރަޔާ ގުޅިގެން ދެ ގެއެއްގައި ވެލި ބަސްތާ ޖެހުމުގެ އިތުރުން އެމްއެންޑީއެފްގެ ސަދަން އޭރިއާގެ ސިފައިން ދަނީ ހުއްޓުމެއް ނެތި ރައްޔިތުންނަށް އެހީތެރިކަން ފޯރުކޮށްދެމުންނެވެ.
ތިނަދޫގައި ފެން ހިއްކަނީ
މީގެ އިތުރުން މެޓް އޮފީހުން ވަނީ ދެކުނުގެ އެކި ހިސާބަށް ވިއްސާރަކޮށް ގުގުރުން އެކަށީގެންވާ ކަމަށް ބުނެފައެވެ. އެގޮތުން ބައެއް ރަށްތަކަށް ބޯކޮށް ވާރޭވެހޭނެ ކަމަށް ލަފާކުރެވޭ ކަމަށާއި މެދުތެރޭ ބައެއް ރަށްތަކަށް ކެރީގެ އަސަރު ފޯރުމާ އެކު ގުގުރުން އެކަށީގެންވާ ކަމަށް މޫސުމާ ބެހޭ އިދާރާއިން ވަނީ ބުނެފައެވެ.
ހުވަދުއަތޮޅަށް ކުރަމުންދާ ވިއްސާރައާ ގުޅިގެން ނޭޝަނަލް ޑިޒާސްޓަރ މެނޭޖްމެންޓް ސެންޓަރުން ހުކުރު ދުވަހު ނެރުނު ބަޔާނުގައި ބުނެފައި ވަނީ ދެކުނުގެ ބޮޑު ބަޔަކަށް މިއަދު ވެސް ވިއްސާރަކޮށް، ގަދައަށް ވައި ޖެހޭނެ ކަމަށް މީޓިއޮރޮލޮޖިކަލް ސާވިސް އިން މައުލޫމާތު ދީފައިވާ ކަމަށާއި ފެން ބޮޑުވުމާއި ކަނޑު ގަދަވުމުގެ ސަބަބުން ދިމާވެދާނެ ކަމަކަށް ޚާއްސަ ސަމާލު ކަމެއް ދިނުމަށް އެދޭ ކަމަށެވެ.
ބަޔާނުގައި އިތުރަށް ބުނެފައި ވަނީ ފެން ބޮޑުވެދާނެ ކަމަށް ކުރިއާލާ ތައްޔާރުވުމުގެ ގޮތުން ރައްކާތެރިކަމުގެ ފިޔަވަޅުތައް އެޅުމަށެވެ. އެގޮތުން އިލެކްޓްރޯނިކް ސާމާނު ބޭނުން ނުކުރާ ނަމަ، ނިވާލާފައި ބެހެއްޓުމަށާއި ކަނޑު ދަތުރު ކުރާއިރު މޫސުމަށް ސަމާލުވުމަށް އިލްތިމާސް ކޮށްފައިވެއެވެ. އަދި ލިބޭ ގެއްލުންތަކުގެ މައުލޫމާތު ކައުންސިލްތައް މެދުވެރިކޮށް އެ އޮތޯރިޓީއަށް ރިޕޯޓް ކުރުމަށް ވެސް އެ ބަޔާނުގައި އެދިފައިވެއެވެ.
