ހަޤީޤީ މުސްލިމެއް ނަމަ ދުލާއި އަމަލުންވެސް އެހެން މީހަކަށް އުނދަގުލެއް ނުކުރާނެ: ޚުތުބާ
މުސްލިމުންނަށް އަނިޔާ ކުރުން ބޮޑެތި ފާފަތަކުގެތެރޭ ހިމެނޭ
ހުކުރު ޚުތުބާ
ހަޤީޤީ މުސްލިމެއް ނަމަ ދުލާއި އަމަލުންވެސް އެހެން މީހަކަށް އުނދަގޫވާނެ ފަދަ ކަމެއް ނުކުރާނެ ކަމަށް މިއަދުގެ ހުކުރު ޚުތުބާގައި ބުނެފިއެވެ.
އިސްލާމް ދީން މަތީ ސާބިތުވެ ހުރުމުގެ މުހިންމުކަމުގެ މައްޗަށް ބިނާކޮށްފައިވާ މިއަދުގެ ޚުތުބާގައި ދީނީ ގޮތުން ސާބިތުވެ ހުރުމުގެ މުހިއްމު ކަމަށް އަލިއަޅުވާލާފައިވެއެވެ.
އެގޮތުން ދިވެހި ރާއްޖެއަށް މީގެ 800 ވަރަކަށް އަހަރު ކުރިން އިސްލާމް ދީނުގެ ހިދާޔަތު ލިބިފައިވުމަކީ ރާއްޖޭގެ ރައްޔިތުންނަށް ލިބުނު ބޮޑު ނިއުމަތެއް ކަމަށާއި، އެ ނިއުމަތަށް ރައްކާތެރި ވާން ޖެހޭނެ ކަމަށް ޚުތުބާގައި ބުނެފައިވެއެވެ.
ދުލާއި އަމަލުން އެހެން މީހުންނަށް އުނދަގޫ ކުރުމުން ދުރުހެލިވެ އިސްލާމީ ރިވެތި އުސޫލުތަކުގެ މަތީގައި ސާބިތުވެ ތިބޭ ބަޔަކަށްވުމަށް ބާރުއަޅައި މިއަދުގެ ޚުތުބާގައި ވަނީ އިސްލާމީ ތާރީޚުގައި ފާހަގަކޮށްލެވޭ ބައެއް ޝަހުސިއްޔަތު ތަކުގެ ވާހަކައިން މިސާލު ނަންގަވާފައެވެ. އެގޮތުން ބިލާލުގެފާނާއި، މުސްލިމް އަންހެނުންގެ ތެރެއިން އެންމެ ފުރަތަމަ ޝަހީދު ކޮށްލެވުނު ސުމައްޔާގެފާނުގެ ވާހަކަ ޚުތުބާގައި ބަޔާންކުރައްވާފައިވެއެވެ.
މީގެއިތުރުން ، މުސްލިމުންނަށް އަނިޔާ ކުރުމަކީ އެންމެ ބޮޑެތި ފާފަތަކުގެ ތެރެއިން ހިމެނޭނެ ކަމެއް ކަމަށް ބަޔާންކޮށް ޚުތުބާގައިވަނީ ޢީބަ ބުނުން ފަދަ ފާފަތަކާ ދުރުހެލިވެ، އެހެން މީހުންގެ އަބުރު ރައްކާތެރި ކުރުމަށް ބާރުއަޅާފައެވެ.
"ކަން މިހެން އޮތް އިރު ކޮންމެ ބޭފުޅަކުވެސް ވިސްނައި ފިކުރުކުރާށެވެ ! ރެޔަކާއި ދުވާލު ކިތައް ފަހަރު ތިމާގެ ދުލުން އެހެން މުސްލިމުންގެ ނުބައިވާހަކަ ދެއްކޭތޯއެވެ ؟ ކިތައް ފަހަރު ޢީބަ ބުނެވޭތޯއެވެ ؟ ކިތައް ފަހަރު މީހުންގެ އަބުރަށް އަރައިގަނެވޭތޯއެވެ ؟ މިއީ ހައްތަހާވެސް އަރައިގަނެވޭ ފާފަތަކެވެ. އަޅުގަނޑުމެންގެ ހިތްތައް އަޅުގަނޑުމެންގެ އަޚުންނާމެދު ސާފުކޮށް ބޭއްވުމީ ކަނޑައެޅިގެން އިސްލާމް ދީނުގައި ވާޖިބު ކުރައްވާފައިވާ ކަމެކެވެ. " މިއަދުގެ ޚުތުބާގައި ބުނެފައިވެއެވެ.
މީގެއިތުރުން، ހެޔޮ ގޮތުގައި ވަގުތުތައް ހޭދަކުރުމާއި، ހެއު އަމަލުކުރުން މަތީ ދެމިހުރުމުގެ މުހިއްމު ކަމާގުޅޭގޮތުން މިއަދުގެ ޚުތުބާގައި އަލިއަޅުވާލާފައިވެއެވެ.
