ސިޔާސީ ސަބަބަކަށްޓަކައި ފިޔަވަޅު އަޅައިފައިވާ މުވައްޒަފުންގެ ޝަކުވާ ހުށަހެޅެމުގެ މުއްދަތު އިތުރުކޮށްފި

ނިމިދިޔަ ސަރުކާރުން ސިޔާސީ ސަބަބަކަށްޓަކައި ވަޒީފާއިން ވަކިކޮށްފައިވާ ނުވަތަ ނުޙައްޤުން ފިޔަވަޅު އަޅައިފައިވާ މުވައްޒަފުންގެ ޝަކުވާތައް ހުށަހެޅުމުގެ މުއްދަތު ރައީސުލްޖުމްހޫރިއްޔާ އިބްރާހީމް މުޙައްމަދު ސޯލިޙް އިތުރުކުރައްވައިފިއެވެ.

އެގޮތުން ޝަކުވާ ހުށަހެޅުމުގެ އެންމެ ފަހު ތާރީހަކީ ޖެނުވަރީ މަހުގެ 21 ވަނަ ދުވަހުގެ 14:00 ގެ ނިޔަލަށެވެ. މީގެ ކުރިން ޝަކުވާ ހުށަހެޅުމުގެ މުއްދަތު ހުޅުވާލާފައިވަނީ 3 ޑިސެންބަރު 2018 އިން ފެށިގެން 30 ދުވަހުގެ މުއްދަތަކަށެވެ. އަދި ޝަކުވާ ހުށަހެޅުމުގެ މުއްދަތު އިތުރު ކޮށްފައިވަނީ މުއްދަތު އިތުރު ކޮށްދިނުމަށް ގިނަ ފަރާތްތަކުން އެދިފައިވާތީ ކަމަށް ރައީސް އޮފީހުން ބުނެއެވެ.

Advertisement

ޝަކުވާ ހުށަހަޅާ ފޯމު ރައީސުލްޖުމްހޫރިއްޔާގެ އޮފީހުގެ ރިސެޕްޝަނުންނާއި، ރައީސުލްޖުމްހޫރިއްޔާގެ އޮފީހުގެ ވެބްސައިޓް އިން ޑައުންލޯޑް ކުރެވޭނެއެވެ.

ޝަކުވާ ހުށަހެޅުމުގެ މުއްދަތު ރައީސް ސޯލިހް އިތުރުކުރައްވާފައިވާއިރު ބުރާސްފަތި ދުވަހުގެ ހެނދުނު ރައީސް އޮފީހުން ބުނެފައިވަނީ ބޭއިންސާފުން ވަޒީފާއިން މީހުން ވަކިކުރި މައްސަލަ ނުވަތަ ބަދަލުކުރި 451 މައްސަލައެއް ބަލަމުންދާ ކަމަށެވެ.

ސަރުކާރުން ސިޔާސީ ސަބަބަކަށްޓަކައި، ސަރުކާރުގެ އޮފީސްތަކާއި، ސަރުކާރު ހިއްސާވާ ކުންފުނިތަކާއި، ދައުލަތުގެ ވަޒީފާއިން ވަކިކޮށްފައިވާ، ނުވަތަ ފިޔަވަޅު އަޅައިފައިވާ މުވައްޒަފުންނަށް އިންސާފު ހޯދައިދިނުމަށްޓަކައި، ރައީސް އިބްރާހީމް މުޙައްމަދު ޞޯލިޙް ވަނީ ރައީސުލްޖުމްހޫރިއްޔާގެ އޮފީހުގައި ކޮމިޓީއެއް އުފައްދަވައި، އެކޮމިޓީއާ އެ މަސައްކަތް ހަވާލުކުރައްވާފައެވެ.

އެފަދަ ފަރާތްތަކަށް އަނބުރާ ވަޒީފާ ހޯދައިދީ، އިންސާފު ހޯދައިދިނުމަކީ ރައީސް ސޯލިޙްގެ ސަރުކާރުގެ ފުރަތަމަ 100 ދުވަހުގެ ތެރޭގައި ކުރަން ރާވާފައިވާ ކަންކަމުގެ ތެރެއިން އެއް ކަންތަކެވެ.

ނިމިދިޔަ ސަރުކާރުން ނުހައްޤުން ވަރަށް ގިނަ އަދަދެއްގެ މީހުން ވަޒީފާއިން ވަކިކޮށްފައިވާ ކަމަށް ގިނަ ފަރާތްތަކުން ބުނެއެވެ. އެގޮތުން ސިޔާސީ ސަބަބަކަށްޓަކައި ވަޒީފާއިން ވަކިކޮށް ނުވަތަ ނުޙައްޤުން މުވައްޒަފުންނާމެދު އެންމެ ބޮޑަށް ފިޔަވަޅު އަޅާފައިވާ އެއް މުއައްސަސާ އަކީ ފެނަކަ ކޯޕަރޭޝަނެވެ.