މަގު މައްޗަށް ކުނި އެޅި މީހާ ޖޫރިމަނާކޮށް ގޭގެ ނަން ހާމަކޮށްފި
3 ޖެނުއަރީ 2019 | ބުރާސްފަތި 07:36ޖޫރިމަނާކުރި އަދަދު އީޕީއޭއިން އާއްމެއް ނުކުރޭ
މަގުމައްޗަށް ކުނި އަޅާފައި
މާލޭގެ މަގު މައްޗަށް ކުނި އެޅި މީހާ ޖޫރިމަނާކޮށް ގޭގެ ނަން، އެންވައަރަމެންޓަލް ޕްރޮޓެކްޝަން އެޖެންސީން ހާމަކޮށްފިއެވެ.
އީޕީއޭ އިން ކުރި ޓުވީޓެއްގައި ހާމަކުރައްވާފައިވަނީ ބުނެފައި ވަނީ ކުނި އަޅާފައިވަނީ ހ. ހަނދުވަރުދޭގޭގެ ތިން ވަނަ ބުރީގައި އުޅޭ މީހެއް ކަމަށެވެ. އެ މީހާ މަގު މައްޗަށް ކުނި އެޅި ކަން އީޕީއޭ އަށް ރިޕޯޓްކުރީ ފުލުހުންނެވެ.
ޖޫރިމަނާ ކުރި މީހާގެ ގޭގެ ނަން ބުނި ނަމަވެސް، އެ މީހާގެ ނަމެއް އަދި ޖޫރިމަނާކުރި އަދަދު އީޕީއޭއިން ހާމައެއް ނުކުރެ އެވެ.
ނަމަވެސް 2016 ވަނަ އަހަރު، ރައީސް އަބްދުﷲ ޔާމީންގެ ގެކޮޅު، ގ. ދޫވެހީގެ ކުރިމައްޗަށް ޑޮލަރު ތަކެއް ގޮތަށް ޗާޕްކޮށްފައި ހުރި ކަރުދާސްތަކެއް އެޅި މައްސަލާގައި ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު އަހުމަދު މަހްލޫފް 100ރ. އިން ޖޫރިމަނާކޮށްފައިވެ އެވެ.
މަގުތަކަށް ކުނިއެޅުން ގިނަވެ، އާއްމު އުނދަގުލަކަށްވެފައިވާތީ، އެކަން ކުރާ މީހުންގެ ނަމާއި ގޭގެ ނަން އާއްމުކުރާނެ ކަމުގެ އިންޒާރު އީޕީއޭއިން ވަނީ ދީފަ އެވެ.
ގާނޫނުގައިވާ ގޮތުން އެ ފަދަ ކުށްކުރާ މީހުންގެ އަތުން ޖޫރިމަނާގެ ގޮތުގައި މިހާރު ފުރަތަމަ ނަގާނީ 300ރ. އެވެ. ކުށް ތަކުރާރުކޮށްފި ނަމަ އެ މީހެއްގެ އަތުން 500 ރުފިޔާ ނެގޭއިރު، އެއީ ނުރައްކާތެރި ބާވަތެއްގެ ކުނި ނަމަ، އެ އަދަދު އިތުރު ކުރުމުގެ ބާރު ވެސް ގާނޫނުން އީޕީއޭ އަށް ވަނީ ދީފަ އެވެ.
