އެއްބައިވަންތަވުމަށް ބްރެޒިލްގެ އާ ރައީސް ގޮވާލައްވައިފި

ތަފާތު ކުރުމެއް ބައިބައި ވުމެއް ނެތް މުޖުތަމައުއެއް ބިނާކުރައްވާނެކަމަށް، އަންގާރަ ދުވަހު ބްރެޒިލްގެ ރައީސް ކަމުގެ ހުވާކުރެއްވި ކަނާތުފިޔައިގެ ލީޑަރު ޖެއަރ ބޮލްސާނަރޯ ވިދާޅުވެއްޖެއެވެ.

އަސްކަރިއްޔާގެ ކުރީގެ ކެޕްޓަން ހުވާކުރެއްވުމަށްފަހު ގާނޫނު ހަދާ މަޖިލީހުގައި ވާހަކަދައްކަވަމުން، ވިދާޅުވީ އެ މަނިކުފާނު ބޭނުންފުޅުވަނީ ބްރެޒިލްއަކީ ކޮރަޕްޝަން ނެތް އަދި ކުށް ނުކުރާ ގައުމަކަށް ހެދުން ކަމަށެވެ. އަދި އިގްތިސާދު މިސްމެނޭޖްކުރުން ނައްތާލެއްވިފައިވާ ގައުމަކަށް ހެދުންކަމަށެވެ.

އެމެރިކާގެ ރައީސް ޑޮނަލްޑް ޓްރަމްވަނީ ބޮލްސާނަރޯގެ ތަގުރީރަށް ތައުރީފް ކުރައްވައި އެމެރިކާ އޮތީ އެ މަނިކުފާނާއެކު ކަމަށް ވިދާޅުވެފައެވެ.

ބްރެޒިލްގައި އޮކްޓޯބަރ މަހުގެ 28ވަނަ ދުވަހު ބޭއްވި ރިޔާސީ އިންތިޚާބު ބޮލްސާނަރޯ ކާމިޔާބު ކުރައްވާފައިވަނީ މެދުމިނުގެ ވަރކަރސް ޕާޓީގެ ކެންޑިޑޭޓް، ސައުޕޯލޯގެ ކުރީގެ މޭޔަރ ފެރްނާންޑޯ ހައްދާދްއާ ވާދަކުރައްވާ ބޮޑުތަފާތަކުން އިންތިޚާބު ކާމިޔާބުކުރައްވައިގެންނެނެވެ.

އަސްކަރިއްޔާގައި ކުރިން މަސައްކަތްކުރައްވާފައިވާ ބޮލްސާނަރޯއަކީ ނަސްލީ ތަފާތުކުރުންތައް ގެންގުޅުއްވާތީ ފާޑުކިޔުން އަމާޒުވެފައިވާ ބޭފުޅެކެވެ. ނަމަވެސް އޭނާއަށް ތާއީދުކުރައްވާ ފަރާތްތަކުން ދެކޭ ގޮތުގައި އޭނާއަކީ ކުށް ގިނަ އެ ގައުމު ސަލާމަތްކޮށްދޭނެ މީހާއެވެ.

ގާނޫނުހަދާ މަޖިލީހުގެ މެމްބަރެއްގެ ގޮތުގައި ބޮލްސާނަރޯ ހުންނެވިއިރު އަސްކަރިއްޔާގެ މަސްލަހަތަށް މަސައްކަތްކުރައްވާފައިވާއިރު ރައީސް ކަމުގެ މަގާމަށް އިންތިޚާބުވުމަށްފަހުވެސްވަނީ ސަރުކާގެ ހަތް ވުޒާރާއަކަށް އަސްކަރިއްޔާގައި ކުރިން މަސައްކަތްކުރައްވާފައިވާ ފިރެހެނުން އައްޔަން ކުރައްވާފައެވެ.

ނުރައްކާތެރި ވަޅީގެ ހަމަލާއެއްގައި ސެޕްޓެމްބަރު މަހު ޒަޚަމްވެ ވަޑައިގަތުމާއެކު ބޮލްސާނަރޯއަށް ކެމްޕެއިންގައި އަމަލީގޮތުން އުޅުއްވެވުނީ މަދު ދުވަސް ކޮޅެއްގައެވެ.

އިންތިޚާބުގެ ފުރަތަމަ ބުރުގަައި ބޮލްސާނަރޯ އަށް 46 ޕަސެންޓް ލިބިވަޑައިގެންފައިވާއިރު ހައްދާދަށް ލިބިވަޑައިގެންނެވީ 29 ޕަސެންޓް ވޯޓެވެ.