ދިވެހިންނަށް ބޭރު ޤައުމުތަކުގައި ދިމާވާ މައްސަލަތައް ހައްލުކުރުމަށް އިސްކަންދޭނަން: ފޮރިން މިނިސްޓަރ

ރާއްޖެއިން ބޭރުގައި ތިބޭ ދިވެހިންނަށް ދިމާވާ މައްސަލަތަލަށް ޙައްލެއް ހޯދައިދިނުމަށް މިއަހަރު އިތުރު މަސައްކަތްތަކެއް ކުރައްވާނެކަމަށް ޚާރިޖީ ވަޒީރު އަބްދުﷲ ޝާހިދު ވިދާޅުވެއްޖެއެވެ.

އައު އަހަރުގެ މުނާސަބަތުގައި ދިވެހި ބަހާއި އިނގިރޭސި ބަހުން ދެއްވި މެސެޖްތަކެއްގައި މިނިސްޓަރ ޝާހިދު ވިދާޅުވީ އިންސާނީ ހައްޤުތަކާއި ޑިމޮކްރަސީއާއި ތިމާވެށީގެ މައްސަލަތަކަކީ ރައީސް އިބްރާހިމް މުހައްމަދު ސޯލިޙްގެ ޚާރިޖީ ސިޔާސަތުގެ އެންމެ މައިގަނޑު ތަނބުތައްކަމަށެވެ. އަދި އެތަނބުތަކުގެ މައްޗަށް ބިނާކޮށް ރާއްޖެއާއި ރަހުމަތްތެރިކަން އޮތް ޤައުމުތަކާއި، ޒަމާންވީ ރަހުމަތްތެރިންނާއި ގުޅުން ބަދަހިކުރުމުގެ މަސައްކަތް ކުރިއަށް ގެންދަވާނެކަމަށެވެ.

މީގެ އިތުރުން އާ ރަހުމަތްތެރި ޤައުމުތައް ހޯދުމުގައިވެސް ދެމިތިބޭނެކަމަށް މިނިސްޓަރ ޝާހިދު ވިދާޅުވިއެވެ. ޝާހިދު އިތުރަށް ވިދާޅުވީ މިއީ އުއްމީދުން ފުރިގެންވާ ދުވަސްތަކެއްކަމަށެވެ.

"2018 ވަނަ އަހަރު ދިވެހިން އިހްތިފާލްކުރީ އުއްމީދުން ފުރިގެންވާ ފަތިހެއް އަޅުގަނޑުމެންނަށް މަރުޙަބާ ކިޔުން. 2019 ވަނަ އަހަރު އަޅުގަނޑުމެން ދިވެހިން އެކުރި އުއްމީދުތައް ޙާސިލްކުރުމަށް އިތުރު މަސައްކަތްތައް ކުރުމުގައި ދެމިތިބޭނަން،" މިނިސްޓަރ ޝާހިދު ވިދާޅުވިއެވެ.

ރާއްޖެއިން ބޭރުގައި ދިރިއުޅޭ ދިވެހިންނަށް ދިމާވާ މައްސަލަތަކަށް ހައްލު ހޯދައިދިނުމަކީ ރިޔާސީ އިންތިޚާބުގެ ކެމްޕޭނުގައި ގުޅިފައިވާ ޕާޓީތަކުގެ ވައުދުތަކުގެ ތެރޭގައި ހިމެނޭ ކަމެކެވެ.

ސޯޝަލް މީޑިއާ މެދުވެރިކޮށް މިނިސްޓަރ ޝާހިދު އާ އަހަރުގެ ތަހުނިޔާގެ މެސެޖް ފޮނުއްވިއިރު، އެހެން އަހަރުތަކުގައި ޚާރިޖީ ވަޒީރުން އަމަލުކުރައްވާ ގޮތާއި ޚިލާފަށް ބޭރުގެ ސަފީރުންނާއި ޚާރިޖީ ވަޒީރުންނަށް ރާއްޖޭގެ ޚާރިޖީ ވަޒީރު ކަރުދާހުގައި ޕްރިންޓްކޮށްފައިވާ ތަހުނިޔާ ކާޑު ފޮނުއްވާފައެއް ނުވެއެވެ.

މިނިސްޓަރ ޝާހިދު މިފަހަރު ފޮނުއްވާފައިވަނީ އީކާޑެކެވެ. އެކާޑުގައި އެމަނިކުފާނު ވިދާޅުވެފައިވަނީ ތަހުނިޔާގެ ކާޑުތައް ހެދުމަށް ކޮންމެ އަހަރަކުވެސް އެތައް ލައްކަ ގަހެއް ކަނޑަމުންދާކަމަށާއި، ތިމާވެއްޓާއި ރައްޓެހި ގޮތްތަކެއް ޚިޔާރުކުރުމަށް ޑިޖިޓަލް ކާޑު ބޭނުންކުރުމަށް ގޮވާލައްވާކަމަށެވެ. އަދި އެކާޑުގައި ދާދިފަހުން ޙިމާޔަތްކުރެވުނު ހދ. ކޭލަކުނުގެ ބަރުގަހުގެ ޖަންގަލީގެ ފޮޓޯއެއް ހިމަނުއްވާފައިވެއެވެ. މިވެރިކަމުގެ ކުރީކޮޅު ރައީސް އޮފީހާއި ފޮރިން މިނިސްޓްރީއިން ވަނީ އެއްފަހަރު ބޭނުންކޮށްފައި އުކާލާ ޒާތުގެ ޕްލާސްޓިކް ފެން ފުޅި ބޭނުންކުރުން ހުއްޓާލާފައެވެ.