ކަރަކަޓައު އަލިފާން ފަރުބަދަ ކުޑަވާން ފަށާފައިވާކަމަށް ދިރާސާކުރާ ފަރާތްތަކުން ބުނެފި

އިންޑޮނީޝިއާގެ އަނަކް ކަރަކަޓައު އަލިފާން ފަރުބަދަ މިހާރު ކުޑަވަމުންދާކަމަށް ސެޓެލައިޓް ފޮޓޯތަކުން ދައްކާކަމަށް ދިރާސާކުރާފަރާތްތަކުން ބުނެފިއެވެ.

ޑިސެމްބަރު މަހުގެ 22 ވަނަ ދުވަހު ޖާވާއަށާއި ސުމަތްރާއަށް ސުނާމީ އަރާފައިވަނީ އޭގެ ކުރީ ދުވަހު އެ އަލިފާން ފަރުބަދަ ގޮވުމަށްފައެވެ.

އެ ސުނާމީގައި މަރުވި މީހުންގެ އަދަދު 430 އަށް އަރާފައިވާއިރު އޭގެ ފަހުންވެސް އަލިފާން ފަރުބަދަ ގޮވާފައިވެއެވެ. އަދި އެއާ ގުޅިގެން ސުނާމީގެ އިންޒާރު ދީފައިވެއެވެ.

ދިރާސާކުރާ ފަރާތްތަކުންވަނީ ސެޓެލައިޓް ފޮޓޯތައް ބޭނުންކޮށްގެން، އެ ފަރުބަދައިން ހިލަޔާއި އަޅި ކަނޑަށް ފައިބާފައިވާ ވަރު ބެލުމަށް މަސައްކަތްކޮށްފައެވެ. އެ ފަރާތްތަކުން ބުނެފައިވަނީ ވޭތުވެދިޔަ ހަފްތާގައި އެ ފަރުބަދައިގެ އުސްމިނުން ތިންބައިކުޅަ ދެބައި ގެއްލިފައިވާކަމަށެވެ.

އޭގެ ތެރެެއިން ބޮޑުބަޔަކީ ފަރަބުދައިގެ ހަރަކާތްތަކުން ކަނޑަށް ފޭބި ބައިކަމަށްވުން އެކަށީގެންވެއެވެ.

ފަރުބަދައިގެ ކައިރީގައި އޮންނަ ޖާވާއާއި ސުމަތްރާގެ އައްސޭރުފަށަށް 5 މީޓަރުގެ އުސް ރާޅު އަރާފައެވަނީ ފަރުބަދައިން ފޭބި އަޅިއާ ހިލައިން އުފެއްދި ލޮނުގަނޑުގެ ހަރަކާތަކުންކަން މި ދިރާސާއިން ކަށަވަރުކުރެވިގެންދާނެއެވެ.

ސުނާމީގައި 20 މީހަކު ގެއްލިފައިވާއިރު 40،000 މީހުންގެ ގެދޮރުވަނީ ގެއްލިފައެވެ.