ކެލިފޯނިއާގެ އަލިފާންގަނޑު ނިއުޔޯކަށް ވުރެ ސައިޒުގެ ގޮތުން ބޮޑުވެއްޖެ

ކެލިފޯނިއާގެ ދެކުނުގައި ރޯވެފައިވާ އަލިފާންގަނޑު މަޑުޖެހުމެއްނެތި ފެތުރެމުންދާއިރު ނިއުޔޯކް ސިޓީއަށް ވުރެ ބޮޑު ސަރަހައްދަކަށް ފެތުރިއްޖެއެވެ.

ވެންޗޫރާ އަދި ސަންޓަ ބާބަރާގެ 230،000 އޭކަރުގެ ސަރަހައްދެއްގައި ވަނީ އަލިފާން ރޯފައެވެ.

އެންމެ ދުވަހެއްގެ ތެރޭގައި 50،000 އޭކަރަށްވުރެ ބޮޑު ސަރަހައްދެއްގައި ރޯވިއިރު މިއީ އެ ސްޓޭޓްގެ ތާރީޚުގައި ރެކޯޑްކުރެވުނު ފަސްވަނައަށް އެންމެ ބޮޑު އަލިފާންގަޑެވެ.

ގަދަވައިގެ ސަބަބުން އަލިފާން ފެތުރުމުގެ ފުރުސަތު ބޮޑުއިރު އައްސޭރިފަށުގެ ގޮނޑުދޮށުގައި އުޅޭ ފަރާތްތަކަށްވަނީ ރައްކާތެރި ސަރަހައްދުތަކަށް ބަދަލުވުމަށް އަންގާފައެވެ.

އަލިފާން ނިއްވުމުގެ މަސައްކަތްކުރަމުންދާ ފަރާތްތަކުންވަނީ އަލިފާނުގެ 15 އިންސައްތަ ކޮންޓްރޯލް ކުރެވިފައިވާކަމަށް ބުނެފައެވެ. ނަމަވެސް އަލިފާން އިތުރަށް ފެތުރެން ފެށުމުން އެ އިންސައްތަ ދަށްކޮށް ފަހުން ބުނެފައިވަނީ ކޮންޓްރޯލް ކުރެވިފައިވަނީ 10 އިންސައްތަކަމަށެވެ.

އަލިފާން ކޮންޓްރޯލް ކުރުމަށް ގޮންޖެހުމަކަށް ވެފައިވަނީ ހަމައެކަނީ ގަދަވައިގެ ސަބަބުން އެކަންޏެއް ނޫނެވެ.

ރޯވެފައިވާ ސަރަހައްދުގެ ގޮތުންނާއި ފަރުބަދަމަތީ ސަރަހައްދަކަށް ވުމަކީ އަލިފާން ނިއްވާ ފަރާތްތަކަށް ކުރިމަތިވެފައިވާ އިތުރު ގޮންޖެހުމެކެވެ.