އަފްޣާނިސްތާނުގެ ރިޔާސީ އިންތިޚާބު ފަސްކޮށްފި

އަފްޣާނިސްތާނުގައި އަންނަ އަހަރު ބާއްވަން ހަމަޖެހިފައި އޮތް ރިޔާސީ އިންތިޚާބު ތިން މަސްދުވަސް ފަސްކުރަން ނިންމާފައިވާކަމަށް އެގައުމުގެ އިލެކްޝަންސް ކޮމިޝަނުން ބުނެފި އެވެ.

އިންތިޚާބު ބޭއްވުމަށް ކުރިން ހަމަޖެހިފައިއޮތީ އޭޕްރީލް މަހުއެވެ. މިހާރު އިންތިޚާބު ބޭއްވުމަށް ހަމަޖެހިފައިވަނީ ޖުލައި މަހުގެ މެދުތެރޭ ނުވަތަ އޯގަސްޓް މަހުގެ ކުރީކޮޅުއެވެ. ނަމެވެސް ތާރީޚެއް އިއުލާނެއް ނުކުރެއެވެ.

ބީބީސީއާ ވާހަކަ ދެއްކި އޮފިޝަލަކު ބުނެފައިވަނީ ކުރިމަތިލާ އެތައް ކެނޑިޑޭޓަކަށް ރެޖިސްޓްރޭޝަން ފުރިހަމަ ނުކުރެވޭކަމަށާއި އަދި އިންތިހާއަށް ފިނި ދުވަސްވަރަކަށްވުމުން ސްޕްރިން ފެށެންވާއިރަށް އެ މީހުންގެ ޓީމުތަކަށް ތައްޔާރު ނުވެވޭނެކަމަށެވެ.

އިންތިޚާބު ފަސްކުރުމުގެ ވާހަކަ އައިސްފައިމިވަނީ އެ ގައުމުގައި ތިބޭ އެމެރިކާގެ ސިފައިން މަދުކުރަން ރައީސް ޑޮނަލްޑް ޓްރަމްޕް ނިންމެވިކަން އިއުލާނުކުރެއްވިތާ ހަފްތާއެއްނުވަނީހެވެ.

މިހާރު އަފްޣާނިސްތާނުގައިތިބި އެމެރިކާގެ 7000 އެއްހާ ސިފައިން ނުވަތަ ދެބައިކުޅަ އެއްބައެއްހާ ސިފައިން އަނބުރާ ގައުމަށް ދާނެ ކަމަށް މީޑިއާ ރިޕޯޓްތައް ބުނެއެވެ.

ރިޔާސީ އިންތިޚާބު ފަސްކުރުމަށް ނިންމާފައި މިވަނީ އޮކްޓޯބަރ މަހު ބޭއްވި ގާނޫނުހަދާ މަޖިލީހުގެ އިންތިޚާބަށްވެސް ތާލިބާނުންނާއި އެހެނިހެން ހަނގުރާމަވެރި ޖަމާއަތްތަކުގެ ސަބަބުން ހުރަސްއެޅިފައިވަނިކޮށެވެ.

ކެމްޕެއިނުގައާއި ވޯޓްލުމުގައިވެސް ހަމަނުޖެހުން ހިނގާފައިވާއިރު 10 ކެނޑިޑޭޓަކު މަރާލާފައިވެއެވެ. ވޯޓްލާ މަރުކަޒުތަކުގެ ކައިރީގައިވެސް އެއްޗެތި ގޮއްވާލާފައިވެއެވެ.

ކާބުލްގައި ހުންނަ މިނިސްޓްރީ އޮފް ޕަބްލިކް ވޯކްސްއަށް ޖާނުންފިދާވެގެން ހޯމަ ދުވަހު ދިން ހަމަލާއެއްގައި 43 މީހުން މަރުވެފައިވާކަމަށް އޮފިޝަލުންބުނެއެވެ