ޖުމްހޫރީ ޕާޓީން ދުވަހަކުވެސް ޔާމީންގެ ފައި ބުޑަށް ނުދާނެ: އަލީ ސޯލިހު
ކޯލިޝަން ބުރޫ އެރުވުމަށް އަދި ކަންކަން ފިތުނަކުރެއްވުމަށް ރައީސް ޔާމީން މަސައްކަތް ކުރައްވާ
ޖުމްހޫރީ ޕާޓީ
ޖުމްހޫރީ ޕާޓީން ދުވަހަކު ވެސް ކުރީގެ ރައީސް އަބްދުﷲ ޔާމީންގެ ފައި ބުޑަކަށް ނުދާނެ ކަމަށާއި ކޯލިޝަންތެރޭގައި ބައިބައިވުން އުފެއްދެވުމަށް އެ މަނިކުފާނު މަސައްކަތް ކުރައްވާ ކަމަށް ޖުމްހޫރީ ޕާޓީގެ ސްޕޯކްސްޕާސަން އަލީ ސޯލިހު ވިދާޅުވެއްޖެއެވެ.
ޖުމްހޫރީ ޕާޓީން ރައީސް ޔާމީނާއިއެކު "ޑީލެއް" ހަދަން އުޅޭ ކަމަށް ދެކެވޭ ވާހަކަތަކާއި ގުޅިގެން އަލީ ސޯލިހު ރާއްޖެއެމްވީއަށް ވިދާޅުވީ އެޕާޓީން ރައްޔިތުންނަށް އޮޅުވާލައިގެން ރައީސް ޔާމީނާއި ބައްދަލު ނުކުރައްވާކަމަށެވެ. އަދި އެގޮތަށް ދޮގު ޚަބަރުތައް ފަތުރަނީ ކުރިއަށް އޮތީ ރައްޔިތުންގެ މަޖިލީހުގެ އިންތިޚާބު ކަމަށްވުމާއެކު އިންތިޚާބުގައި އެކި ގޮނޑިތަކަށް އެކި ޕާޓީތަކުން ވާދަކުރާއިރު ކޯލިޝަން ޕާޓީގެ އާންމު މެމްބަރުންގެ ވިސްނުން ބަދަލުކޮށްލުމަށް ކަމަށް ދެކި ލައްވާ ކަމަށް ވިދާޅުވިއެވެ.
"މިއަދު ހަތަރު ލީޑަރުން މަޝްވަރާ ކުރައްވާނެ ކޯލިޝަނުން މަޖިލީސް އިންތިޚާބާއިމެދު ދެކެލައްވާގޮތާއިމެދު. ކޯލިޝަން ދެމެހެއްޓުމަށް ހަތަރު ލީޑަރުން އަބަދު ވެސް މަޝްވަރާ ކުރައްވާނެ ކަމަށް އަބަދު ވެސް މަސައްކަތް ކުރައްވާނެކަމަށް ވިދާޅުވަމުން ގެންދަވަނީ. ކޯލިޝަން ބުރޫ އެރުވުމަށް އަދި ކަންކަން ފިތުނަކުރެއްވުމަށް ރައީސް ޔާމީން މަސައްކަތް ކުރައްވާ،" އަލީ ސޯލިހު ވިދާޅުވިއެވެ.
މީގެ ދެ ދުވަސް ކުރިން ޕީޕީއެމް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ކުރީގެ ރައީސް ޔާމީން ވިދާޅުވީ ގާސިމްއަކީ ކުރިންވެސް އެކުގައި މަސައްކަތް ކޮށްފައިވާ ބޭފުޅެއް ކަމަށާއި ޖޭޕީގެ ރައީސް ގާސިމް ވަޑައިގަންނަވައިފި ނަމަ މަރުހަބާ ދަންނަވާނެކަމަށެވެ. ރައީސް ޔާމީންގެ ވެރިަކުގައި ގާސިމްގެ މައްޗަށް ތިން އަހަރާއި ދެ މަހާއި ބާރަ ދުވަހަށް ޖަލަށްލުމަށް ހުކުމްކޮށްފައިވެއެވެ. އެހެން ނަމަވެސް އެ ހުކުމް ހައިކޯޓުން ވަނީ އޮކްޓޯބަރު 22 ގައި ބާތިލްކޮށްފައެވެ.
އަލީ ސޯލިހު ވިދާޅުވީ ގާސިމް ހުންނެވީ ރައީސް އިބްރާހިމް މުހައްމަދު ސޯލިހުގެ ފަހަތްޕުޅުގައި ސާބިތުކަމާއެކީގައި ކަމަށެވެ. އަދި އެ ޕާޓީގެ އެއްވެސް މެމްބަރަކު ވައްކަމާއި ކޮރަޕްޝަންގެ ތުހުމަތު ކުރެވޭ މީހެއްގެ ފަހަތުގައި ނުހުނާންނެ ކަމަށާއި ރައީސް އިބްރާހިމް ސޯލިހުގެ ވެރިކަން ދިފާއުކުރެއްވުމަށް ކުރަންޖެހުނު ކޮންމެ ކަމެއް ޕާޓީގެ ލީޑަރު ކުރައްވާނެކަމަށެވެ.
