ބްރިޖް ހުޅުވުމާއެކު ފެރީން ދަތުރުކުރާ މީހުންގެ އަދަދު ފަސް ހާހަށް: ބޮޑު ގެއްލުމެއް!

ސިނަމާލެ ބްރިޖް ހުޅުވުމާ އެކު މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) ފެރީ މެދުވެރިކޮށް ދުވާލެއްގެ މައްޗަށް ދަތުރުކުރާ މީހުންގެ އަދަދު ފަސް ހާހަށް ވެއްޓިފައިވާ ކަމަށް އެ ކުންފުނިން ބުނެފިއެވެ.

ބުދަ ދުވަހު ރާއްޖެއެމްވީއަށް ދެއްވި ހާއްސަ އިންޓަވިއުގައި އެމްޓީސީސީގެ ޗީފް ފައިނޭންޝަލް އޮފިސަރ މުހައްމަދު ހިލްމީ ވިދާޅުވީ ބްރިޖް ހުޅުވުމުގެ ކުރިން ދުވާލެއްގެ މައްޗަށް 21،000 މީހުން ދަތުރު ކުރަމުންދިޔަ ކަމަށާއި ބްރިޖް ހުޅުވުމާއެކު ތިން މިލިއަން ރުފިޔާގެ ގެއްލުން ކުންފުންޏަށް ލިބިފައިވާ ކަމަށެވެ. އަދި މި އަހަރުގެ ތިން ވަނަ ކުއާޓަރގައި އެ ކުންފުނީގެ ސާފު ފައިދާ ދަށަށް ގޮސްފައިވާ މައިގަނޑު ސަބަބަކީ ވެސް ޓްރާންސްޕޯޓުން ލިބުނު ގެއްލުންތަކުގެ ސަބަބުން ކަމަށް އޭނާ ވިދާޅުވިއެވެ.

މިދިޔަ އަހަރުގެ ތިން ވަނަ ކުއާޓާގައި ސާފު ފައިދާގެ ގޮތުގައި އެމްޓީސީސީއަށް 17.4 މިލިއަން ރުފިޔާ ލިބިފައިވާއިރު މި އަހަރުގެ ތިންވަނަ ކުއާޓަރގައި ސާފު ފައިދާގެ ގޮތުގައި އެ ކުންފުންޏަށް ލިބިފައިވަނީ 327،963 ރުފިޔާއެވެ.

އެމްޓީސީސީގެ މެނޭޖިން ޑިރެކްޓަރ ހަސަން ޝާހު ވިދާޅުވީ ހުޅުމާލެ އާއި މާލެއާ ދެތެރޭގައި ކުރާ ކަނޑު ދަތުރުތައް ހުއްޓާލަން ކުންފުނިން ވިސްނާފައިނުވާ ކަމަށާއި ކުންފުނިން ހިންގާ އެހެން ޕްރޮޖެކްޓްތަކުން ލިބޭ ފައިދާ ޓްރާންސްޕޯޓަށް ކޮމްޕްރޮމައިޒް ކުރަން ޖެހޭ ކަމަށެވެ. އަދި އެކަމުގައި ސަބްސިޑީ ލިބޭނެ ގޮތާ މެދު ސަރުކާރާ އެކު މަޝްވަރާ ކުރަމުންދާ ކަމަށް ވެސް ޝާހު ވިދާޅުވިއެވެ.

ޓްރާންސްޕޯޓް ޑިޕާޓްމަންޓަށް ގެއްލުން ލިބުނުކަމުގައިވީ ނަމަވެސް މިވަގުތު އެއްވެސް މުވައްޒަފަކު ވަޒީފާއިން ވަކިކުރަން ވިސްނާފައިނުވާކަން ފާހަގަކުރައްވައި ޝާހު ވިދާޅުވީ ކުންފުނީގެ އެހެން ޝެކްޝަންތަކާއެކު މަޝްވަރާ ކުރުމަށް ފަހު އެ މުވައްޒަފުން ހަރުދަނާ އުސޫލެއްގެ މަތިން ބަދަލު ކުރަން ޖެހޭ ކަމަށެވެ.

ޝާހު އިތުރަށް ވިދާޅުވީ ކުންފުނީގެ ހިންގުން އިތުރަށް ހަރުދަނާ ކުރަން ޖެހޭނެ ކަމަށާއި ކުރިއަތް އޮތް އަހަރަށް ކުންފުނީގެ ފަރާތުން ބިޒްނަސް ޕްލޭނެއް ހަދާފައިވާ ކަމަށެވެ. އަދި ޕްލޭންގައި ހަރަދުތައް ކުޑަކުރާނެ ގޮތް ހިމަނާފައިވާނެ ކަމަށާއި ބޯޑުން ފާސްވުމުން އެ ޕްލޭން އާންމުކުރާނެ ކަމަށް ޝާހު ވިދާޅުވިއެވެ.

މާލެ އާއި، ހުލުމާލެ އަށް ދަތުރު ކުރާ ބަސްތަކުގެ ހިދުމަތް މޯލްޑިވްސް ޕޯޓްސް ލިމިޓެޑް ކުންފުނިން (އެމްޕީއެލް) އިން ފޯރުކޮށްދެމުންދާއިރު އެ ހިދުމަތް އެމްޓީސީސީ ކުންފުނީގެ ދަށަށް ބަދަލު ކުރަން ވިސްނާފައިވޭތޯ ރާއްޖެއެމްވީން ސުވާލުކުރުމުން ޝާހު ވިދާޅުވީ ރައީސް އޮފީހުގައި އޮތް ބަދަލުވުމެއްގައި އެކަމާ ގުޅޭ ގޮތުން މަޝްވަރާ ކުރެވިފައިވާ ކަމަށާއި ޕޮލިސީ ސެކްޝަނުން އެކަމާ ގުޅޭ ގޮތުން ގޮތެއް ނިންމާނެ ކަމަށެވެ. އަދި އެމްޓީސީސީއާ އެމްޕީއެލްއާ މަޝްވަރާ ކޮށްގެން ބަހުގެ ހިދުމަތް އެމްޓީސީސީއަށް ބަދަލުކުރުމަށް، ހަރުދަނާ އުސޫލެއްގެ މަތިން ކުރިއަށްދާނެ ކަމަށް ޤަބޫލުކުރައްވާ ކަމަށް ވެސް ޝާހު ވިދާޅުވިއެވެ.

އެމްޓީސީސީން ހުޅުމާލެއަށް މިހާރު ދަތުރުތައް ކުރަމުންދަނީ ޕްރިމިއަމް ލިންކް ފެރީ މެދުވެރިކޮށް ކޮންމެ 20 މިނެޓަކުންނެވެ. މިހާރު ފެރީ މެދުވެރިކޮށް ދަތުރުކުރާ ދިވެހިންގެ އަދަދު މަދުވެފައިވާއިރު ގިނައިން ފެރީ މެދުވެރިކޮށް ދަތުރުކުރަމުން ދަނީ ބިދޭސީންނެވެ.

އެމްޓީސީސީން ދަތުރުފަތުރުގެ ހިދުމަތް މ. އަތޮޅު، ފ. އަތޮޅު، ދ. އަތޮޅު، އަދި ފުވައްމުލަކު ސިޓީގެ އިތުރުން އައްޑޫ ސިޓީ ފިޔަވާ ރާއްޖޭގެ ހުރިހާ ރަށަކަށް ފޯރުކޮށްދެއެވެ.