ރަށު މާރުކޭޓް ގޮޅިތަކަށް ފޯމް ހުށަހަޅައިފައިވާ ފަރާތްތަކުގެ ތެރެއިން ގުރުއަތުން ހޮވުނު ފަރާތްތަކުގެ ނަންތައް ހުޅުމާލެ ޑިވަލޮޕްމަންޓް ކޯޕަރޭޝަން (އެޗްޑީސީން) އާންމުކޮށްފިއެވެ.

އެޗްޑީސީގެ ފަރާތުން ހޯމަ ދުވަހު ކުރި ޓުވީޓެއްގައި ވަނީ އެ ފަރާތްތަކުގެ ނަންތައް އާންމުކޮށް މަރުހަބާ ކިޔާފައެވެ.

ރަށު މާރުކޭޓުގެ ސްޓޯލްތަށް ފޯމް ހުށަހަޅަން ހުޅުވާލި ފުރުސަތުގައި 871 ފަރާތަކުން ވަނީ ފޯމް ހުށަހަޅާފައެވެ. ގުރުއަތުލުމުގެ ތެރެއިން 18 ފަރާތަކަށް ޑްރައިސްޓޯލް ލިބިފައިވާއިރު ވެއިޓިންގް ލިސްޓުގައި ނުވަ ފަރާތެއްގެ ނަން އެޗްޑީސީން ވަނީ ހިމަނާފައެވެ. އަދި ވެޓްސްޓޯލަށް ގުރުއަތުން 10 ފަރާތެއް ހޮވިފައިވާއިރު ވެޓިންގް ލިސްޓުގައި ފަސް ފަރާތެއްގެ ނަން އެޗްޑީސީން ވަނީ ހިމަނާފައެވެ.

މީގެ އިތުރުން ރަށު މާރުކޭޓުން ގޮޅި ކުއްޔަށް ހިފުމަށް އެދި ވިޔަފާރީތަކުން ހުށަހަޅާފައިވާއިރު އެ ފަރާތްތަކުގެ ނަންތައް ވެސް އެޗްޑީސީން ވަނީ އާންމުކޮށްފައެވެ. އެގޮތުން ޑްރައިސްޓޯލަށް 19 ވިޔަފާރި ގުރުއަތުން ހޮވިފައިވާއިރު ވެއިޓިންގް ލިސްޓުގައި ވަނީ އެންމެ ވިޔަފާރީއެއްގެ ނަން ހިމަނާފައެވެ. އަދި ވެޓް ސްޓޯލަށް ހަ ވިޔަފާރި ހޮވިފައިވާއިރު ވެޓިންގް ލިސްޓުގައި އެއްވެސް ވިޔަފާރީއެއްގެ ނަން އެޗްޑީސީން ހިމަނާފައެއް ނުވެއެވެ.

ރަށު މާރުކޭޓުގެ މަސައްކަތް ކުރިއަތް އޮތް މަހެއްހާ ދުވަސްތެރޭގައި ފެށޭނެ ކަމަށާއި ރަށު މާރުކޭޓަކީ ހުޅުމާލޭގައި ދިރިއުޅޭ ރައްޔިތުންނާއި، ހުޅުމާލެއަށް ޒިޔާރަތްކުރާ އެންމެހާ ފަރާތްތަކަށް ރާއްޖޭގައި ހައްދާ މޭވާ އާއި ތަރުކާރީގެ ބާވަތްތަކުގެ އިތުރުން ކާބޯތަކެތީގެ ދިވެހި އުފެއްދުންތަކާއި، ރޯމަހުގެ ބާވަތްތައް ފަސޭހަކަމާ އެކު ހެޔޮއަގުގައި އެއް ތަނަކުން ލިބޭނެ މަގުފަހިކޮށްދިނުމަށް ހުޅުމާލެ ފެރީ ޓަރމިނަލްގެ ހުޅަނގު ފަރާތު ސަރަހައްދުގައި ގާއިމްކޮށްފައިވާ ތަނެއް ކަމަށެވެ.

މޭވާ އާއި ތަރުކާރީ އަދި ކާބޯތަކެތީގެ ދިވެހި އުފެއްދުންތައް (ޑްރައި ސްޓޯލް)ތަކަށް ބޮޑުމިނުގައި 69.45 އަކަފޫޓުގެ 37 ގޮޅި ދޫކުރުމަށް ވަނީ ނިންމާފައެވެ. އަދި 69.45 އަކަފޫޓުގެ 20 ގޮޅި ޚާއްސަކޮށްފައިވަނީ ރޯމަހުގެ ބާވަތްތައް (ވެޓް ސްޓޯލް) ތަކަށެވެ.