ދުނިޔޭގެ އެންމެ ރީތި އަންހެނުން ހޮވަން ބާއްވަ މުބާރަތް "މިސް ޔުނިވަރސް" ޕިލިޕީންސްއިން ހޯދައިފިއެވެ.

ހޯމަ ދުވަހު ތައިލެންޑްގެ ބެންކޮކްގައި ބޭއްވި "މިސް ޔުނިވަރސް 2018'' ކާމިޔާބުކޮށްފައިވަނީ ޕިލިޕީންސްގެ މޮޑެލް ކެޓްރިއޯނާ ގްރޭއެވެ. މޮޑެލްކުރުމުގެ އިތުރުން ލަވަ ކިޔާ ކެޓްރިއޯނާ، 67 ވަނަ މިސް ޔުނިވަރސްގެ މަގާމު ހޯދާފައި ވަނީ 93 ގައުމެއްގެ ބައިވެރިންނާ ވާދަކޮށެވެ.

މި ފަހަރުގެ މިސް ޔުނިވަރސް ޝޯ ހުށައަޅާ ދީފައިވަނީ ސްޓީވް ހާވީއެވެ.

އުމުރުން 24 އަހަރުގެ ކެޓްރިއޯނާއަށް އެ މަގާމު ލިބުމުން އޭނާ ބުނީ ''އަހަރެން އުމުރުން 13 އަހަރުގައި މަންމަ ބުނީ މަންމައަށް ހުވަފެނަކުން ފެނުނީ އަހަރެން ރަތް ކުލައިގެ ހެދުމެއް ލައިގެން މިސް ޔުނިވާސް ލިބޭ މަންޒަރު" ކެޓްރިއޯނާ ބުންޏެވެ.

އިއްތިފާގުން އޭނާ މިފަހަރުގެ ހަފްލާގައި ލައިގެން ހުރީވެސް ރަތް ކުލައިގެ ހެދުމެކެވެ.  ފިލިޕީންސްގެ މެކް ޓުމަންގް ޑިޒައިން ކޮށްފައިވާ އެ ހެދުމަށް ވަނީ އެތައް ބައެއްގެ ސަމާލުކަމަށް ލިބިފައިއެވެ. އޭނާ ލައިގެން ހުރީ ފިލިޕީންސްގެ މެޔެން ފަރުބަދަ ސިފަ ކޮށްދޭ ހެދުމެކެވެ.

އޮސްޓްރޭލިޔާއަށް އުފަން ކެޓްރިއޯނާގެ ބައްޕައަކީ އޮސްޓްރޭލިއާ މީހެކެވެ. އަދި އޭނާގެ މަންމަ ނޮރްމިތާ އަކީ ފިލިޕީންސް މީހެކެވެ.   

ކެޓްރިއޯނާ ކިޔަވާފައި ވަނީ އެމެރިކާގެ ބޮސްޓަންގެ ބާކްލީ ކޮލެޖް އޮފް މިއުޒިކް އިންނެވެ.

އެނާއަށް މިސް ޔުނިވަރސް ލިބުމުގެ އުފާ ފިލިޕީންސްގެ އެކި ކަންކޮޅުތަކުގައި ދަނީ ކުލަ ގަދަ ގޮތެއްގައި ފާހަގަ ކުރަމުންނެވެ. ފިލިޕީންގެ ރައީސް ރޮޑްރިގޯ ޑުޓާޓޭ ވަނީ ކަޓްރިއޯނާއަށް މަރުހަބާ ވިދާޅުވެފައެވެ.

ކެޓްރިއޯނާ އަކީ ފިލިޕީންސްއަށް މިސް ޔުނިވަރސް ހޯދައިދިން ހަތަރުވަނަ ފަރާތެވެ. އެންމެ ފަހުން ފިލިޕީންސްއަށް މިސް ޔުނިވަރސް ލިބިފައިވަނީ 2015 ވަނަ އަހަރުއެވެ. އެ ފަހަރު އެ އެ މަގާމު ލިބިފައިވަނީ ޕިއާ އެލޮންޒޯ ވާޓްސް ބަޗްއަށެވެ.

ކެޓްރިއޯނާ އާއި ވާދަކޮށް މިސް ޔުނިވަރސްގެ ދެ ވަނަ މަގާމު ލިބުނީ ސައުތު އެފްރިކާގެ ތަމަރިން ގްރީންއަށެވެ. ވެނުޒުއާލާގެ ސްޓެފަނީ ގުޓިއަރޭޒަށް ލިބުނީ ތިންވަނައެވެ.