ތާލިބާނުންނަށް އަމާޒުކޮށް ދިން ވައިގެ ހަމަލާގައި 20 މަރު
16 ޑިސެމްބަރު 2018 | އާދީއްތަ 07:08މަރުވި އާއްމުންގެ ތެރޭ ކުޑަކުދިން ހިމެނޭ
އަފްޣާނިސްތާނުގެ ސިފައިންގެ މީހަކު ފޯރިމަރަނީ
އަފްޣާނިސްތާނުގެ ތާލިބާނުންނާއި، އެ ގައުމުގައި ހަރަކާތްތެރިވާ އެމެރިކާގެ ނޭޓޯ ސިފައިން ގުޅިގެން ދިން ވައިގެ ހަމަލާއެއްގައި އާއްމުންގެ 20 މީހަކު މަރާލަފައިވާ ކަމަށް ރިޕޯޓްތައް ބުނެފިއެވެ.
މި ހަމަލާ އަމާޒު ކޮށްފައި ވަނީ ކުނަރްލަތޭ ޕޮރްވިންސްގައި ހަރަކާތްތެރިވާ ތަލިބާނުންގެ ކޮމާންޑަރެއް ކަމަށްވާ ޝަރީފް މަވިޔާ އަށެވެ.
ހަމާލާގައި މަރުވި އާއްމުންގެ ތެރޭގައި އަންހެނުންގެ އިތުރުން ކުޑަކުދިން ވެސް ހިމެނެއެވެ. ކުނަރުގެ ގަވަރުނަރާއި ހަވާލާދީ ރިޕޯޓްތައް ބުނާ ގޮތުގައި މި ހަމަލާގައި ހަނގުރާމަވެރިންގެ 38 މީހުން މަރާލެވިފައިވާ ކަމަށާއި، 12 މީހަކު ޒަހަމްވެފައިވާ ކަމަށެވެ.
މި ހަމަލާއަކީ ނޭޓޯ އިން ދީފައިވާ ހަމަލާއެއް ނޫން ކަމަށް އެ ޖަމާއަތުން ބުނެއެވެ. އަފްޣާނިސްތާނު ސިފައިން މި ހަމަލާއާ ބެހޭ ގޮތުން އެއްވެސް އެއްޗެއް ބުނެފައެއް ނުވެއެވެ.
މި ފަހަކަށް އައިސް ތާލިބާނުންނަށް އަމާޒުކޮށް ދޭ ހަމަލާތައް ދަނީ ގިނަވަމުންނެވެ. އެގޮތުން މި މަހުގެ 2 ވަނަ ދުވަހު ދިން ހަމަލާއެއްގައި ވެސް ތާލިބާނުންގެ ލީޑަރަކު ވަނީ މަރާލާފައެވެ.
އަފްޣާނިސްތާނުގެ ސިފައިން އިސްވެ، އެމެރިކާ އާއި ހުޅަނގުގެ ސިފައިންގެ ފައުޖުތައް ގުޅިގެން ތާލިބާނުންނަށް ހަމަލާ ދެމުންދަނީ ސުލްހައިގެ ވާހަކަ ދައްކަން މަޖުބޫރު ކުރުވަން ކަމަށް ރިޕޯޓްތައް ބުނެއެވެ.
ފާއިތުވި ދުވަސްތަކުގައި ވައިގެ މަގުންދޭ ހަމަލާތަކުގައި 8000 އާންމުން މަރުވެފައިވާ ކަމަށް ރިޕޯޓްތައް ބުނެއެވެ.
