މަޖިލިސް އިންތިޚާބު ބާއްވާ ތާރީޚު އާދީއްތަ ދުވަހު އިއުލާން ކުރަނީ
13 ޑިސެމްބަރު 2018 | ބުރާސްފަތި 14:21އިންތިޚާބާއި ބެހޭ މުހިއްމު ކަންތައްތައް އާދީއްތަ ދުވަހު އިއުލާން ކުރާނެ
ރައްޔިތުންގެ މަޖިލިސް
19 ވަނަ ރައްޔިތުންގެ މަޖިލީހުގެ އިންތިޚާބު ބާއްވާނެ ތާރީޚު އަންނަ އާދީއްތަ ދުވަހު އިއުލާން ކުރާނެ ކަމަށް އިލެކްޝަންސް ކޮމިޝަން (އީސީ) އިން ބުނެފިއެވެ.
އީސީގެ މެމްބަރު އަދި ތަރުޖަމާނު އަހުމަދު އަކްރަމް ރާއްޖެ.އެމްވީއަށް ވިދާޅުވީ ރައްޔިތުންގެ މަޖިލީހުގެ އިންތިޚާބު ބާއްވާނެ ދުވަސް އެންމެ ފަހުން އެކޮމިޝަނުގެ މެމްބަރުން ބޭއްވި ބައްދަލުވުމެއްގައި ނިންމާފައިވާ ކަމަށާއި އެ ދުވަސް އާދީއްތަ ދުވަހު ބާއްވާ ނޫސްވެރިންގެ ބައްދަލުވުމެއްގައި އިއުލާން ކުރައްވާނެކަމަށެވެ. އަދި އިންތިޚާބާއި ބެހޭ އެހެނިހެން ކަންތައްތައް ވެސް އަންނަ އާދީއްތަ ދުވަހު ބާއްވާ ނޫސްވެރިންގެ ބައްދަލުވުމެއްގައި ހާމަ ކުރައްވާނެ ކަމަށް އަކްރަމް ވިދާޅުވިއެވެ.
އީސީއިން މީގެ ކުރިން މަޖިލިސް އިންތިހާބު ބާއްވަން ނިންމާފައި ވަނީ އަންނަ އަހަރުގެ މާޗު މަހުގެ ފަހުކޮޅުގައެވެ.
"އިންތިޚާބު ބާއްވާނެ ތާރީޚަކާއި އިންތިޚާބާއި ބެހޭ އެހެނިހެން ކަންތައްތައް އަންނަ އާދީއްތަ ދުވަހު އިއުލާން ކުރާނެ،" އަކްރަމް ވިދާޅުވިއެވެ.
މިފަހަރުގެ ރައްޔިތުންގެ މަޖިލީހުގެ އިންތިޚާބުގައި 87 ދާއިރާ ހޮވަން ހަމަޖެހިފައިވާއިރު ގާނޫނު އަސާސީ ބުނާ ގޮތުން ކޮންމެ އިންތިޚާބީ ދާއިރާއެއްގައި ވާދަ ކުރާ މީހުންގެ ތެރެއިން އިންތިޚާބު ވާނީ އެދާއިރާއެއްގައި ވޯޓު ދޭ ރައްޔިިތުންގެ ސިއްރު ވޯޓަކުން އެންމެ ގިނަ ވޯޓު ލިބޭ މީހަކަށެވެ.
ސިޔާސީ ޕާޓީތަކުން މަޖިލީސް އިންތިޚާބަށް ތައްޔާރު ވަމުންދާއިރު އެމްޑީޕީން ވަނީ ހުރިހާ ދާއިރާއަކަށް ކުރިމަތިލާން ނިންމާފައެވެ. އެޕާޓީގެ ޕްރައިމަރީގައި ވޯޓުލުން އަންނަ ޖެނުއަރީމަހުގެ 19 ގައި ބާއްވަން ވަނީ ހަމަ ޖެހިފައެވެ. އެމްޑީއޭ އިން ވެސް ވަނީ އެޕާޓީން ހުރިހާ ދާއިރާއަކުން ވާދަކުރާނެކަމަށް އިއުލާން ކޮށްފައެވެ.
އަދާލަތު ޕާޓީން 13 ދާއިރާއެއްގައި ވާދަކުރާނެކަމަށް އިއުލާން ކޮށްފައިވާއިރު ޕީޕީއެމުން ވާދަކުރާނެކަން ހާމަކޮށްފައިވަނީ މިހާތަނަށް 41 ދާއިރާއަކަށެވެ.
