20 ވަނަ ގަރުނުގެ އެންމެ ގިނަ ބަޔަކު ސްޓްރީމްކުރި ލަވަޔަކަށް ކުއީންގެ ބޮހިމިން ރާޕްސަޑީ!
މި ލަވަ 1.6 ބިލިއަން ފަހަރު ވަނީ ސްޓްރީމްކޮށްފައި
ކުއީން ބޭންޑުގެ މެމްބަރުން
އެންމެ ގިނައިން 20 ވަނަ ގަރުނުގެ ލަވަތަކުގެ ތެރެއިން މީހުން ސްޓްރީމް ކޮށްފައިވާ ލަވަޔަކަށް 1975 ވަނަ އަހަރު އިނގިރޭސިވިލާތުގެ ރޮކް ބޭންޑު ކުއީން އިން ކިޔާފައިވާ "ބޮހީމިއަން ރެޕްސޮޑީ" ހިމެނިއްޖެވެ.
މަޝްހޫރު ލަވަކިޔުންތެރިޔާ ފްރެޑީ މާކިއުރީ ލިޔެފައިވާ މި ލަވަ 1.6 ބިލިއަން ފަހަރު ސްޓްރީމް ކޮށްފައިވާ ކަމަށް އެމެރިކާގެ ޔުނިވާސަލް ރިކޯޑުން ވަނީ އެ ކުންފުނިން ނެރުނު ބަޔާނެއްގައި ބުނެފައިއެވެ.
އެގޮތުން މިލަވަ ވަނީ ނިރްވާނާ ބޭންޑުގެ "ސްމެލްސް ލައިކް ޓީން ސްޕިރިޓް" ގެ އިތުރުން ގަންސް އެންޑް ރޯ ސެސްގެ "ސްވީޓް ޗައިލްޑް އޯ މައިން" ފަދަ އެންމެ ވަރުގަދަ ރޮކް ލަވަތައް ފަހަތައް ޖައްސާލާފައިވާ ކަމަށް ރިޕޯޓްތައް ބުނެއެވެ.
މިއަހަރު އޮކްޓޫބަރު މަހު ކުއީން ބޭންޑު މެމްބަރުންގެ މައްޗަށް ބިނާކޮށް ހޮލީވުޑްއިން ވަނީ ބައޮޕިކް ފިލްމެއް ހަދާފައިއެވެ. އެ ފިލްމުގައި ފްރެޑީ މާކިއުރީގެ ރޯލް ކުޅެފައިވަނީ މިސްރުގެ ދަރިފަސްކޮޅަށް ނިސްބަތްވާ ރަމީ މަލިކްއެވެ.
މި ފިލްމު ވަނީ 600 މިލިއަން ޑޮލަރުގެ އާމްދަނީއެއް ހޯދާފައިއެވެ. މި އަދަދަކީ ހޮލީވުޑް އިން ހެދި މިއުޒިކަލް ބައޮގްރަފީ ފިލްމަކަށް ލިބުނު އެންމެ ބޮޑު އާމްދަނީއެވެ.
މި ފިލްމުން ރަމީ ވަނީ ގޯލްޑަން ގްލޯބް އެވޯޑަށް މިދިޔަ ހަފްތާގައި ނޮމިނޭޓް ވެފައެވެ. މި ލަވަ ޕްރޮމޯޓް ކުރަން އިންޓަނެޓްގެ އެކި ޕްލެޓްފޯމްގައި މިލަވަ ސްޓްރީމް ކޮށްފައިވާ ކަމަށް ޔުނިވާސަލްއިން ބުނެއެވެ.
