ފަސް އެވޯޑާއެކު މި އަހަރުގެ ގްރެމީ އެވޯޑްގެ އެންމެ ކާމިޔާބު ތަރިއަކަށް އިނގިރޭސި ވިލާތުގެ ލަވަކިއުންތެރިއާ އަޑެލް ވެގެން ހިނގައްޖެއެވެ.
ލޮސް އެންޖެލިސްގެ ސްޓޭޕްލްސް ސެންޓަރުގައި މި މަހު 12 ވަނަ ދުވަހުގެ ރޭ ބޭއްވި 59 ވަނަ ގްރެމީ އެވޯޑް ހަފްލާގައި އެންމެ މޮޅު އަލްބަމް އަދި އެންމެ މޮޅު ލަވައިގެ އެވޯޑް ވެސް ލިބިފައިވަނީ އަޑެލް އަށެވެ. އޭނާގެ އަލްބަމް 25 އަށް އަލްބަމް އޮފް ދި އިޔަރގެ އެވޯޑް އަދި ސޯންގް އޮފް ދި އިޔަރ ލިބުނުއިރު ރެކޯޑް އޮފް ދި އިޔަރ ލިބިފައިވަނީ އަޑެލްގެ "ހެލޯ"އަށެވެ.
މީގެ އިތުރުން ބެސްޓް ޕޮޕް ވޯކަލް އަލްބަމް އަދި ބެސްޓް ސޯލޯ ޕާފޯމަންސް އެވޯޑް ވެސް ހޯދާފައި ވަނީ އަޑެލްއެވެ.
ނުވަ ޖޮންރާއަކުން ހަތަރު ޖޮންރާއަކަށް ނޮމިނޭޓްވެ 2017ގެ އެންމެ ގިނަ ނޮމިނީގެ ގޮތުގައި އެވޯޑް ނައިޓް ފަށާފައި ވަނީ ބިއޯންސޭއެވެ. ނަމަވެސް އޭނާއަށް ލިބިފައިވަނީ ދެ އެވޯޑެކެވެ. އޭނާގެ "ފޯމޭޝަން"އަށް ބެސްޓް ވީޑިއޯ މިއުޒިކް ލިބުނުއިރު ބެސްޓް އާބަން ކޮންޓެމްޕޮރަރީ އަލްބަމް ލިބިފައިވަނީ އޭނާގެ "ލިމޮނޭޑް"އަށެވެ. އެއްމާބަނޑު ދެ ކުދިންނަށް ބަލިވެއިން ބިއޯންސޭއަށް މި ދެ އެވޯޑާއެކު އޭނާގެ މިއުޒިކީ ހަޔާތުގައި ލިބުނު ގްރެމީ އެވޯޑްގެ އަދަދު 22 އަށް އަރައެވެ.
މި ހަފްލާގައި އަޑެލްވަނީ މިދިޔަ އަހަރުގެ ޑިސެމްބަރު މަހު ދުނިޔެ ދޫކުރި އިނގިރޭސިވިލާތުގެ މަޝްހޫރުލަވަކިއުންތެރިއާ ޖޯޖްމައިކަލްގެ ހަނދާނުގައި އޭނާގެ ލަވައެއް ހުށަހަޅައިދީފައެވެ.
