ޤަވާއިދާއި ޚިލާފަށް ގަރާޖްތަކުގައި ރަޖިސްޓްރީ ކޮށްފައިވާ ކާރުތަކުގެ ރަޖިސްޓްރޭޝަން އުވާލަން ނިންމާފައިވާ ކަމަށް މިނިސްޓަރ އޮފް ޓްރާންސްޕޯރޓް އެންޑް ސިވިލް އޭވިއޭޝަން އާއިޝަތު ނަހުލާ ވިދާޅުވެއްޖެއެވެ.
ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މިނިސްޓަރ ވިދާޅުވީ އޮޅުވައިލައިގެން އެއް ގަރާޖެއްގެ ނަމުގައި އެތައް ވެހިކަލެއް ރަޖިސްޓްރީކުރުމުގެ މައްސަލަ ފާހަގަކުރެވިފައިވާ ކަމަށެވެ. އެފަދަ ކަންކަން ބެލުމަށް މިނިސްޓްރީގެ ފަރާތުން މޮނިޓަރިން ޓީމުތައް ވަރަށް އަވަހަށް ނުކުންނާނެ ކަމަށާއި، އެފަދަ ކާރުތަކުގެ ރަޖިސްޓްރީ ބާތިލްކުރާނެކަމަށްވެސް މިނިސްޓަރ ވިދާޅުވި އެވެ.
މިނިސްޓަރު ވިދާޅުވީ ޤަވާއިދާއި ޚިލާފަށް ކާރުތައް ރަޖިސްޓްރީ ކުރުމުގައި ޝާމިލްވާ ބަޔަކު އެ އޮތޯރިޓީގައި ތިބިކަން ފާހަގަކުރެވިފައިވާކަމަށެވެ. އަދި އެއީ ކޮންމެފެންވަރެއްގެ ކޮންމެ ބޭފުޅަކު ކަމުގައި ވީނަމަވެސް އެބަޔަކާއި ދޭތެރޭގައި ފިޔަވަޅު އެޅޭނެ ކަމަށް މިނިސްޓަރ ވިދާޅުވި އެވެ.
މީގެ އިތުރުން މިނިސްޓަރ ވިދާޅުވީ މާލޭގައި ދުއްވާ ޓެކްސީ ތަކުގެ ހާލުތު ރަނގަޅު ކުރަން ޖެހޭ ކަމަށާއި ކާރުތަކުގެ ހާލަތު ރަނަގޅު ނުވުމުގެ ސަބަބުން އެކަން ހައްލު ކޮށްދިނުމަށް އެދި ވަރަށް ގިނަ ފަރާތްތަކުގެ ޝަކުވާ އަންނަކަމަށެވެ. މިނިސްޓަރ ވިދާޅުވީ 15 ނުވަތަ 20 އަހަރު ވެފައިވާ ކާރުތައް އެބަހުރިކަމަށާއި ކާރުދުއްވާ ފަރާތްތަކާއިވެސް މަޝްވަރާ ކުރުމަށްފަހު އެފަރާތްތަކަށް އުނަގޫނުވާނެ ގޮތެއްގެ މަތިން ދުނިޔޭގެ އެހެން ގައުމުތަކުގައި ވެސް އަމަލު ކުރަމުންދާ ގޮތަށް ވަކި އަހަރުތަކެއް ވުމުން ކާރުތައް ނައްތާލާގޮތަށް އެކާރުތައް އުވާލަން ގަސްތުކުރައްވާ ކަމަށެވެ.
މާލެ ފަދަ ކުޑަކުޑަ މާހައުލެއްގައި އެއްގަމުގައި ދުއްވާ އުޅަނދުތައް ތޮއްޖެހުމުގެ ސަބަބުން ތިމާވެއްޓެއް ކުރާ ނޭދެވޭ އަސަރުތައް އިތުރުވަމުންދާ ކަމަށާއި މިކަމުގެ ސަބަބުން ސާފު ވެއްޓެއް ގައި ނޭވާލުމަށް ކުދި ޅަދަރިންނަށާއި މުޖްތަމައުގައި ދިރުއުޅޭ މީހުންނަށް އުނދަގޫވަމުންދާތީ ތިމާވެއްޓާއި ގުޅުންހުރި ވެހިކަލްތައް ތަޢާރަފް ކުރުމަށް ވަރަށް ބޮޑަށް ވިސްނަމުންދާ ކަމަށް މިނިސްޓަރ ވިދާޅުވިއެވެ.
