މިއީ ކޮރަޕްޝަނުން މަޖިލިސް ސަލާމަތް ކުރަންވީ ފަހަރު!

ރާއްޖޭގެ ސިޔާސީ މަސްރަހުގައި ވިމާވެފައިވާ އެންމެ ބޮޑެތި މައްސަލަތަކާއި، ރާއްޖެ މިއަދު ވެއްޓިފައިވާ އަނދަވަޅަށް ވެއްޓުމުގެ އަސްލަކީ ކޮބައިތޯ އެހުމުން އެންމެ ގިނަމީހުން ދޭނެ ޖަވާބަކީ ރައްޔިތުންގެ މަޖިލީހާއި އެމަޖިލީހުގެ މެމްބަރުންނެވެ.

ނިމިގެން މިދާ ދައުރަކީ ރާއްޖޭގެ ބަރުލަމާނީ ހަޔާތުގައި ފެނިގެން ދިޔަ އެންމެ ކޮރަޕްޓް ރައްޔިތުންގެ މަޖިލީހެވެ. ފައިސާއަށް ގޮނޑިއާއި ވޯޓު ވިއްކުން މަޖިލިސް ތެރެއިން ހިނގަމުން ދިޔައި އެންމެންގެ ކުރިމަތީގައެވެ. މަޖިލީހުގެ ތެރޭގައި ހިނގި ކަންކަމުގެ އިތުރުން މަޖިލީހުން ބޭރުން، ސަރުކާރު ތެރެއިން ހިނގި ވައްކަމާއި ކޮރަޕްޝަންގައި އެންމެ ދައުރެއް އަދާކުރި އެއް ބަޔަކީވެސް މަޖިލިސް މެމްބަރުންނެވެ. ކޮރަޕްޝަންގެ ފައިސާ ގޯނި ގޯންޏަށް އަޅައިގެން އުފުލީވެސް ހަމަ އެމެމްބަރުންނެވެ. އެކަމަށް އެންމެން ކުރިމަތީގައި އެއްބަސްވީވެސް ހަމަ އެމެމްބަރުން އަމިއްލައަށެވެ. ޖިނާޢީ ބޮޑެތި ކުށްތަކަށް އިއުތިރާފް ވަމުން ދިޔައީ އޭރު ވެރިކަން ކުރަމުން ދިޔައީ އެބޭފުޅުންގެ ޕާޓީގެ ވެރިޔާކަމަށްވާތީ، ޤާނޫނު އެބޭފުޅުންނާއި އަރާ ހަމަނުކުރާނެކަމަށް ބަލައިގެންނެވެ.

ޤާނޫނަށްވުރެ މަތީގައި ތިބެވިދާނެކަމަށް ހީކޮށްގެން އުޅޭ މަޖިލިސް މެމްބަރުންނަށް މި ފަހަރު ފުރުސަތު ނުދިނުމަކީ ރައްޔިތުންގެ މަސްއޫލިއްޔަތެކެވެ. ސަރުކާރުން ބޭނުންވާހާ ގޮތަކަށް ޤާނޫނުތައް ފާސްކުރަމުން ދިޔަ މެމްބަރުން މިއަދު ރައްޔިތުންގެ ކައިރިއަށް ވޯޓު ހޯދަން ދިޔުމުން، އެދުވަހު އެދިން ވޯޓުތަކާއި ބެހޭ ގޮތުން ރައްޔިތުން ސުވާލު ކުރާށެވެ. މިހާރުގެ މަޖިލިސް މެމްބަރުންގެ އިތުރުން ނިމިިދިޔަ ސަރުކާރުގައި ތިބެގެން ރައްޔިތުންނަށް އެކިކަހަލަ އަނިޔާ ދިން ބޭބޭފުޅުންވެސް މިއަދު މަޖިލީހަށް ނިކުންނަވަން ފައި ނަންގަވައިގެން ތިއްބެވިއިރު، އެބޭބޭފުޅުންނާއިވެސް އެސުވާލު ކުރަން ޖެހެއެވެ.

މަޖިލިސް މެމްބަރުންނަކީ ރައްޔިތުންގެ ފައިސާއިން މުސާރަ ނަންގަވާ ފަރާތްތަކެވެ. ރައްޔިތުންގެ މަންދޫބުންނެވެ. ރައްޔިތުންގެ ފައިސާއިން މުސާރަ ނަންގަވާ ބޭފުޅުުން، އެބޭފުޅުންގެ މާލީ ހިސާބުތައް އާއްމުކުރައްވަން ޖެހެއެވެ. މަޖިލީހަށް ކުރިމަތިލައްވާ ފަރާތްތަކުގެ މާލީ ބަޔާން ހާމަކުރުމުގެ ރެކޯޑާއި، އެކަމުގައި ގެންގުޅޭ ވިސްނުން ރައްޔިތުން އޮޅުން ފިލުވަން ޖެހެވެ.

ކެމްޕޭނާއި ދިމާކޮށް ތަފާތު ވާހަކަ ދައްކާނެއެވެ. އެތައް ކަމެއް ކޮށްދޭން ބުނާނެއެވެ. ބޮޑެތި އަދަދުތަކުން ފައިސާ ހުށަހަޅާނެއެވެ. އެހެންނަމަވެސް ރައްޔިތުން ވިސްނަންވީ ރައްޔިތުންގެ މަޖިލީހުގެ މެމްބަރުންނަކީ އަތޮޅު ކައުންސިލް ނޫންކަމެވެ. އެއީ ސަރުކާރު ނޫންކަމެވެ. ބޭނުންހާ ކަމެއް ރައްޔިތުންނަށް ކޮށްދިނުމުގެ ބާރު މަޖިލިސް މެމްބަރުންނަކަށް ނޯންނާނެއެވެ. ރަށަށް ނުވަތަ ދާއިރާއަށް ކަމެއް ކޮށްދޭނަމަ އެމީހުން އެކަމެއް ކޮށްދޭނީ ކޮންމެވެސް ތަނަކުން ފައިސާ ހޯދައިގެންނެވެ. އެއްގޮތަކީ ކޮރަޕްޝަނުގެ ތެރެއިން ރައްޔިތުންގެ ފައިސާއިން އެމީހުން ފައިސާ ހޯދައިގެން އެކަމެއް ކޮށްދިނުމެވެ. އެހެންކަމަށްވާނަމަ އެއީ ވެން މަސް ވެނަށް ކާން ދިނުމެވެ. ދެން އޮތް ގޮތަކީ ކޮންމެވެސް ވިޔަފާރިވެރިއެއްގެ އަތުން ފައިސާ ނަގައިގެން އެކަމެއް ކޮށްދިނުމެވެ. އެހެންކަމަށްވާނަމަ މަޖިލީހުގައި އެއްކަލަ މެމްބަރުން އިނަސް، ހަޤީޤަތުގައި އެއިންނަނީ އެއްކަލަ ވިޔަފާރިވެރިޔާ ކަމެވެ.

މިއީ ރައްޔިތުންގެ ފަހަރެވެ. ހުރިހާ އާރަކާއި ބާރެއް މުށުތެރެއަށް ލައްވައިގެން ހުންނެވި ރައީސް ޔާމީން ބަލިކޮށްލީ ރައްޔިތުންގެ ހިތްވަރުންނެވެ. ރައްޔިތުންގެ ބާރުވެރިކަން އެފެންނަނީއެވެ. އެހެންކަމުން، ކޮރަޕްޓް މީހަކު މަޖިލީހަށް ނުވެއްދުމަކީ ރައްޔިތުންނަށް އަދި މާ ފަސޭހަ ކަމެކެވެ. ކޮރަޕްޓް މީހުންނަށް މިފަހަރު ފުރުސަތު ނުދެމާ ހިނގާށެވެ.