މިނިމަމް ވޭޖް ކަނޑައެޅުމަށް ނިންމާނީ ވަރަށް ގިނަ ދިރާސާތައް ކުރުމަށްފަހު: އިކޮނޮމިކް މިނިސްޓަރ
7 ޑިސެމްބަރު 2018 | ހުކުރު 15:30ދިރާސާތަކަށް ފަހު ވިޔަފާރިތަކަށް މިނިމަމް ވޭޖެއް ކަނޑައެޅުމާއި މެދު ގޮތެއް ނިންމާނީ
ރާއްޖެ ޓީވީގެ ފަލަސުުރުހީ ޕްރޮގްރާމްގައި އިކޮނޮމިކް މިނިސްޓަރ ފައްޔާޒު އިސްމާއިލް
މިނިމަމް ވޭޖް ކަނޑައެޅުމަށް ނިންމާނީ ވަރަށް ގިނަ ދިރާސާތަކެއް ކުރުމަށް ފަހު ކަމަށް އިކޮނޮމިކް މިނިސްޓަރ ފައްޔާޒު އިސްމާއީލް ވިދާޅުވެއްޖެއެވެ.
ބުރާސްފަތި ދުވަހު ރާއްޖެއެމްވީ އަށް ދެއްވި އިންޓަވިއުގައި ފައްޔާޒު ވިދާޅުވީ މިނިމަމް ވޭޖެއް ކަނޑައެޅުމަކީ ފަސޭހަކަމެއް ނޫން ކަމަށާއި ދިރާސާތަކަށް ފަހު ވިޔަފާރީތަކަށް މިނިމަމް ވޭޖެއް ކަނޑައެޅުމާއި މެދު ގޮތެއް ނިންމަވާނެ ކަމަށެވެ.
"މި ދިރާސާތަކުން އަޅުގަނޑުމެންނަށް އިނގޭނީ އަޅުގަނޑުމެންގެ ވިޔަފާރީތަކަށް އެއީ ކުރެވިދާނެ ކަމެއްތޯ ނުވަތަ ނޫންތޯ" ފައްޔާޒު ވިދާޅުވިއެވެ.
މިނިމަމް ވޭޖް ބޯޑެއް އެކުލަވައި ދިނުމަށް އިކޮނޮމިކް މިނިސްޓަރު ފައްޔާޒު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ އަރިހުން ބުދަ ދުވަހު އެދިވަޑައި ގަންނަވާފައިވާ އިރު ފައްޔާޒު ވިދާޅުވީ މިނިމަމް ވޭޖް ބޮޑަށް އެކުލަވާލުމަށްޓަކައި މަސައްކަތް ކުރައްވާނެ ކަމަށާއި ވަރަށް އަވަހަށް ބޯޑު އެކުލަވާލައި ބޯޑުގެ މަސައްކަތް ފެށިގެންދާނެ ކަމަށް އުންމީދު ކުރައްވާ ކަމަށެވެ.
ފައްޔާޒު ވިދާޅުވީ މި މަސައްކަތަކީ މިނިސްޓްރީއާ ހަވާލުވެ ވަޑައިގެންނެވުމަށް ފަހު އެންމެ ގޮންޖެހުން ބޮޑު އެއް މަސައްކަތަށް ވެގެންދާނެ ކަމަށާއި މިއީ ފަސޭހަ ކަމެއް ނޫން ކަމަށެވެ.
"މިއީ ވަރަށް ޗެލެންޖިންގް އަދި އުނދަގޫ ކަމެއް އެހެން ނަމަވެސް އަޅުގަނޑުމެން މިއަދު އެ މަސައްކަތް ފަށަން އެބަޖެހޭ، އެ މަސައްކަތްތައް ފަށައިގެން ރަނގަޅު ދިމާލަކަށް ދެވޭނެ ކަމަށް ޤަބޫލުކުރަނީ. ސަރުކާރުގެ ޕޮލިސީތަކާ ހުރެ ވެސް ވަރަށް ގިނަ ވިޔަފާރީތައް މީގެ ކުރިން ވަނީ ހަލާކު ވެގޮސް، ސަރުކާރުގެ ސަބަބުން ވިޔަފާރީތަކަށް ގެއްލުން ނުވާގޮތަށް ހަދާނަން" ފައްޔާޒު ވިދާޅުވިއެވެ.
އިކޮނޮމިކް މިނިސްޓަރ އިތުރަށް ވިދާޅުވީ އެ ބޭފުޅާގެ މަސައްކަތަކަށް ވަނީ ވިޔަފާރީތަކަށް ފަހި މަގުތައް ހޯދައި ދީ، އެ ވިޔަފާރީތައް ކާމިޔާބުވާނެ ގޮތް އިތުރުކޮށް، އެ ވިޔަފާރީތައް ރަނގަޅުވުމުން މުވައްޒަފުންނަށް ރަނގަޅު ގޮތް މެދުވެރިވުން ކަމުގައެވެ.
