ކޮމަންވެލްތުގައި ބައިވެރިވާން ނިންމުމުން ސަފީރު ޑޯރިސް ތައުރީފު ކުރައްވައިފި
6 ޑިސެމްބަރު 2018 | ބުރާސްފަތި 06:12ޑިމޮކްރާސީއާއި ގުޑް ގަވާނެންސް ހިންގަން ފަސޭހަވެގެން ދާނެ
ރާއްޖެއަށް އިނގިރޭސިވިލާތުން ކަނޑައަޅުއްވާފައި ހުންނަވާ ސަފީރު ޖޭމްސް ޑޯރިސް
ރައްޔިތުންގެ މަޖިލީހުން ކޮމަންވެލްތުގައި ބައިވެރިވާން ނިންމުމުން ރާއްޖެއަށް އިނގިރޭސިވިލާތުން ކަނޑައަޅުއްވާފައި ހުންނަވާ ސަފީރު ޖޭމްސް ޑޯރިސް އެކަމަށް ތައުރީފު ކުރައްވައިފިއެވެ.
ޑޯރިސް ކުރެއްވި ޓްވީޓެއްގައި ވިދާޅުވީ ރާއްޖެއިން ކޮމަންވެލްތުގައި ބައިވެރިވުމަށް ކުރާ މަސައްކަތުގެ އެންމެފަހު ހަރުފަތަށް ހިތްވަރުދެއްވާ ކަމަށެވެ. ކޮމަންވެލްތަކީ 2.2 ބިލިއަން މީހުން ދުނިޔޭގެ 50 ގައުމެއްގައި އުޅެމުންދާ ޖަމިއްޔާއެއްކަން ފާހަގަކުރައްވައި ޑޯރިސް ވިދާޅުވީ ކޮމަންވެލްތުގެ ގައުމުތަކަށް ލިބޭ އެންމެ ބޮޑު ކުރިއެރުމަކީ އެޖަމިއްޔާގެ އޮނިގަނޑުގެ ތެރެއިން ޑިމޮކްރާސީއާއި ގުޑް ގަވާނެންސް ހިންގަން ފަސޭހަވެގެން ދިއުން ކަމަށެވެ.
ކޮމަންވެލްތާއި ގުޅެން ރައްޔިތުންގެ މަޖިލީހުގައި ނެގި ވޯޓުގައި އެމްޑީޕީ، ޖޭޕީ، ޕީޕީއެމް އަދި އެމްޑީއޭގެ މެމްބަރުން ހިމެނޭ ގޮތަށް 62 މެމްބަރުން ވޯޓު ދެއްވިއެވެ. އޭގެ ތެރޭގައި 2016 ވަނަ އަހަރު ކޮމަންވެލްތުން ރާއްޖެ ވަކިވުމަށް ވޯޓު ދެއްވި މެމްބަރުންވެސް ހިމެނިވަޑައިގަންނަވައެވެ.
ކޮމަންވެލްތާއި ގުޅެން ކެބިނެޓުން ނިންމި ނިންމުމަށް ރައްޔިތުންގެ މަޖިލީހުން ރުހުން ދިނުމާއިއެކު، މިހަފްތާގައި އެޖަމްއިއްޔާއާއި އަލުން ގުޅުމަށް ކޮމަވެލްތު ސެކްރެޓޭރިއޭޓަށް ހުށަހަޅުއްވާނެކަމަށް ޚާރިޖީ ވަޒީރު އަބްދުﷲ ޝާހިދު ވެސް ވަނީ ވިދާޅުވެފައެވެ.
ކޮމަންވެލްތާއި އަލުން ގުޅުމަކީ ރައީސް އިބްރާޙިމް މުހައްމަދު ސޯލިޙްގެ ސަރުކާރުން ފުރަތަމަ 100 ދުވަސްތެރޭގައި ކުރަން ނިންމާފައިވާ ކަންކަމުގެ ތެރެއިން އެއް ކަންތަކެވެ.
ރާއްޖެ، ކޮމަންވެލްތުން ވަކިވާން ރައީސް ޔާމީންގެ ސަރުކާރުން ނިންމީ ރާއްޖޭގައި ހިނގަމުންދިޔަ ސިޔާސީ ހަމަނުޖެހުންތަކާއި ސަރުކާރުން އިންސާނީ ހައްޤުތަކަށް އަރައިގަންނަކަމަށް ތުހުމަތު ކުރެވޭ މައްސަލަތައް އެޖަމާއަތުގެ މިނިސްޓީރިއަލް އެކްޝަން ގްރޫޕުން ބަލާނެކަމުގެ އިންޒާރުދީ، އިންސާނީ ހައްޤުތަކުގެ ޙާލަތުގެ މައްސަލައިގައި ބަޔާންތައް ނެރެން ފެށުމުންނެވެ. ރާއްޖެއަކީ ކޮމަންވެލްތުގެ މެމްބަރު ޤައުމުތަކުގެ ތެރެއިން އެޖަމާޢަތުން ވަކިވި މަދު ޤައުމުތަކުގެ ތެރެއިން އެއް ޤައުމެވެ.
