އަލީ ހަމީދުގެ ޖަލު ހުކުމް ބާތިލްކޮށްފި
ބާތިލްކުރީ ފޯނު ނުދެއްވި މައްސަލައިގެ ހުކުމް
ކުރީގެ ސުޕްރީމް ކޯޓުގެ ފަނޑިޔާރު އަލީ ހަމީދު
ސުޕްރީމް ކޯޓުގެ ކުރީގެ ފަނޑިޔާރު އަލީ ހަމީދު، ތަހުގީގަށް ފޯނު ނުދެއްވި މައްސަލައާއި ގުޅިގެން އިއްވި ޖަލު ހުކުމް، ބުދަ ދުވަހު ހައި ކޯޓުން ބާތިލްކޮށްފިއެވެ.
އަލީ ހަމީދަށް މި ހުކުމް އިއްވާފައިވަނީ މި އަހަރުގެ ފެބްރުއަރީ މަހުގެ 1 ވަނަ ދުވަހު ސުޕްރީމް ކޯޓުން ނެރުނު އަމުރާއި ގުޅިގެން އެބޭފުޅާ ހައްޔަރުކުރުމަށް ފަހު ފޯނު ދެއްވަން ދެކޮޅު ހެއްދެވި މައްސަލައިގައި އުފުލުނު، އަދުލު އިންސާފު ގާއިމްކުރަން ހުރަސް އެޅުމުގެ ދައުވާ ސާބިތުވުމާއި ގުޅިގެންނެވެ. ކްރިމިނަލް ކޯޓުން އެބޭފުޅާގެ މައްޗަށް މި މައްސަލާގައި އޭރު އިއްވީ އެއް އަހަރާއި ހަތް މަހާއި ހަ ދުވަހުގެ ޖަލު ހުކުމެކެވެ.
މި ހުކުމުގެ އިތިރުން އަލީ ހަމީދުގެ ގެންދަވަނީ ދަށު ކޯޓުގެ ފަނޑިޔާރުންނަށް ނުފޫޒު ފޯރުވި މައްސަލައިގައި ދައުލަތުން އުފުލި ރަސްމީ ހައިސިއްޔަތުން ކުރަންޖެހޭ ކަންކަމަށް ނުފޫޒު ފޯރުވުމުގެ ދައުވާ ސާބިތުވުމާއި ގުޅިގެން އަދި އިތުރު އެއް އަހަރާއި ހަ މަހާއި ހަ ދުވަހުގެ ޖަލު ހުކުމެއް ވެސް ތަންފީޒުކުރަމުންނެވެ. ނަމަވެސް މިވަގުތު އެ ބޭފުޅާ ހުންނެވީ ގޭ ބަންދުގައެވެ.
ސުޕްރީމް ކޯޓުން ފެބްރުއަރީ އެކެއްގައި ނެރުނު އަމުރާއި ގުޅިގެން އަލީ ހަމީދުގެ މައްޗަށް ވަނީ ސަރުކާރު ވައްޓާލަން އުޅުނު ކަމުގެ ތުހުމަތުގައި ޓެރަރިޒަމްގެ ދައުވާ ވެސް އުފުލާފައެވެ. ނަމަވެސް މި މައްސަލައާއި ގުޅޭ ބައެއް ފަރާތްތައް މިހާރު ވަނީ މިނިވަންވެފައެވެ.
