މީހުން ދިރިއުޅޭ ރަށްރަށުގައި ހުންނަ ޕެޓްރޯލާއި ޑީސަލް ވިއްކާތަންތަން 24 ގަޑިއިރު ހުޅުވާފައި ބެހެއްޓޭ ގޮތަށް ހުއްދަ ދީފިއެވެ.
އިމްޕޯޓު މުދަލުގެ ވިޔަފާރިކުރުމުގެ ގަވާއިދަށް އިސްލާހު ގެނެސް އިކޮނޮމިކް މިނިސްޓްރީ އިން ވަނީ އަންގާރަ ދުވަހު ގެޒެޓްކޮށްފައެވެ.
އެ ގަވާއިދަށް ގެނައި އިސްލާހުގައިވާ ގޮތުން މީހުން ދިރިއުޅޭ ރަށްރަށުގައި ހުންނަ ޕެޓްރޯލާއި ޑީސަލް ވިއްކާ ތަންތަން 24 ގަޑިއިރު ހުޅުވާފައި ބެހެއްޓިދާނެއެވެ. އެކަމަކު އެއީ ކަމާބެހޭ ގާނޫނުތަކާއި ގަވާއިދުތަކުގެ ދަށުން ސަރުކާރުގެ ހުއްދަ ލިބިފައިވާ ތަންތަނަށް ވާންޖެހޭނެ ކަމަށް އެ އިސްލާހުގައިވެއެވެ.
މީގެ ކުރިން ޕެޓްރޯލާއި ޑީސަލް ވިއްކާ ތަންތަން ހުޅުވާފައި ބެހެއްޓޭ ގަޑިއަކީ ފަތިހު ފަހަކުން މެންދަމު ބާރައަށެވެ.
މީގެ އިތުރުން ބައެއް ފަރާތްތަކުން ޕެޓްރޯލް ވިއްކުމުގެ އުސޫލާއި ޚިލާފަށް މާލެ އާއި ހުޅުމާލޭގައި ޕެޓްރޯލް ވިއްކުމާއި ޑެލިވަރީ ކުރަމުންދާކަން ފާހަގަކުރެވިފައިވާތީ ފުލުހުން ވަނީ އެކަން އެގޮތަށް ނުކުރުމަށް އާންމުންނަށް އިލްތިމާސް ކޮށްފައެވެ. ފުލުހުން މިގޮތަށް އިލްތިމާސް ކޮށްފައިވާ އިރު މި ދުވަސް ވަރަކީ މާލެ އާއި ހުޅުމާލޭގައި ރޭގަނޑު ދަންވަރު ވަގުތު ތަކުގައި ގަވާއިދާ ޚިލާފަށް ގޭގޭގައި ވެސް ބޮޑު އަގުގައި ޕެޓްރޯލް ވިއްކަމުންދާ ދުވަސްވަރެކެވެ. އަދި ދަންވަރުގެ ވަގުތު ތަކުގައި ވެސް ޕެޓްރޯލް ޑެލިވަރ ކޮށްދިނުން ވަނީ އާންމު ކަމަކަށްވެފައެވެ.
ޕެޓްރޯލް އާއި ޑީސަލް ވިއްކާ ތަންތަން 24 ގަޑިއިރަށް ހުޅުވުމުގެ ހުއްދަ ދީފައިވާ އިރު ހޮޓާތަކާއި ވިޔަފާރި ކުރާ ތަންތަން 24 ގަޑިއިރު ހުޅުވާފައި ބެހެއްޓުމުގެ ހުއްދަ ދިނުމަށް ސަރުކާރުން ވަނީ ނިންމާފައެވެ.
