ހޯރަފުށީ ދާއިރާގެ ގޮނޑި މިފަހަރު ކާމިޔާބުކުރާނަން: ސައްލެ
4 ޑިސެމްބަރު 2018 | އަންގާރަ 16:19ޝަމްއޫން އަކީ ވަރަށް ހިއްވަރުގަދަ ބޭފުޅެއް
ހަސަން ލަތީފްގެ ކެމްޕެއިން ފެށުމަށް ބޭއްވި ހަފްލާތެރެއިން
ރައްޔިތުންގެ މަޖިލީހުގެ އިންތިހާބުގައި ހޯރަފުށީ ދާއިރާގެ ގޮނޑި މިފަހަރު ކާމިޔާބު ކުރައްވާނެ ކަމަށް، އެ ދާއިރާ އަށް ވާދަކުރައްވާ ހޯރަފުށީ އަހްމަދު ސަލީމް (ސައްލެ) ވިދާޅުވެއްޖެއެވެ.
ރައްޔިތުން މަޖިލީހުގެ ހެންވޭރު ހުޅަނގު ދާއިރާ އަށް ކުރިމަތި ލެއްވުމަށް އެމްޑީޕީގެ ޕްރައިމަރީގައި ވާދަކުރައްވާ، އެ ޕާޓީގެ ޗެއާޕާސަން ހަސަން ލަތީފްގެ ކެމްޕެއިން ފެށުމަށްޓަކައި ބޭއްވި ރަސްމިއްޔާތުގައި މަޖިލީހުގެ ދެ ދާއިރާއެއްގައި ވާދަކުރާ ކެންޑިޑޭޓުން ވަނީ ނަން އަނބުރާ ނަގައިފަ އެވެ. އެގޮތުން ހޯރަފުށި ދާއިރާގެ ޕްރައިމަރީގައި އަހްމަދު ސަލީމްއާ ވާދަކުރައްވާ، އެމްޑީޕީގެ އެ ދާއިރާގެ ރައީސް ޝަމްއޫން ޝަރީފް ވަނީ ޕްރައިމަރީގައި ވާދަ ނުކުރާނެ ކަމަށް އިއުލާނު ކޮށްފަ އެވެ.
ޝަމްއޫން ބުނީ ވަރަށް ގިނަ މަޝްވަރާތަކަށް ފަހު ފަހަތަށް ޖެހެން ނިންމީ ދާއިރާގެ ގޮނޑި ޕާޓީއަށް ޔަގީން ކުރަންކަމަށެވެ.
ރާއްޖެ ޓީވީގެ މެނޭޖިން ޑިރެކްޓަރުގެ މަގާމުގައި ވެސް ހުންނެވި އަހްމަދު ސަލީމް ވިދާޅުވީ ޝަމްއޫން އަކީ ވަރަށް ހިއްވަރުގަދަ ބޭފުޅެއްކަން ސާބިތު ކޮށްދީފި ކަމަށާއި ރައްޔިތުންގެ މަޖިލީހުގެ ހޯރަފުށި ދާއިރާގެ ގޮނޑި އިރާދަކުރެއްވިއްޔާ މި ފަހަރު ކާމިޔާބުކުރައްވާނެ ކަމަށެވެ.
މި ހަފްލާގައި ރައީސް އިބްރާހިމް މުހައްމަދު ސޯލިހާއި ކުރީގެ ރައީސް މުހައްމަދު ނަޝީދުގެ އިތުރުން ޕާޓީގެ އިސްވެރިން ބައިވެރިވެ ވަޑައިގެންނެވި އެވެ.
