އަންނަ އަހަރަށް ފާސްކޮށްފައިވާ ދައުލަތުގެ ބަޖެޓަށް ގެނެވުނު ބަދަލާއެކު ދައުލަތުގެ ހަރަދު 26.7 ބިލިއަން ރުފިޔާއިން 27.3 ބިލިއަން ރުފިޔާއަށް އިތުރުވެފައިވާ ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.

ފިނޭންސް މިނިސްޓްރީގައި ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި މިނިސްޓަރު އަމީރު ވިދާޅުވީ މިނިސްޓްރީ އޮފް ފައިނޭންސް އިން ހުށަހެޅީ 29.6 ބިލިއަން ރުފިޔާގެ ބަޖެޓެއް ކަމަށާއި، ނަމަވެސް ބަޖެޓަށް ގެނެވުނު އިސްލާހުތަކާއެކު ބަޖެޓް ފާސް ކުރީ 30.2 ބިލިއަން ރުފިޔާގެ ބަޖެޓެއް ކަމަށެވެ. މިބަދަލުތަކާއެކު ދައުލަތުގެ ހަރަދު 26.7 ބިލިއަން ރުފިޔާއިން 27.3 ބިލިއަން ރުފިޔާއަށް އިތުރުވެފައިވާ ކަމަށް މިނިސްޓަރު ވިދާޅުވިއެވެ.

މިނިސްޓަރު އަމީރު ވިދާޅުވީ އާމްދަނީގެ ގޮތުގައި ހުށަހެޅި 23 ބިލިއަން ރުފިޔާ ފާސް ކުރިއިރު އިތުރުވެފައިވެފައިވަނީ 23.39 ބިލިއަން ރުފިޔާއަށް ކަމަށާއި، އެއީ ގާތްގަނޑަކަށް 300 މިލިއަން ރުފިޔާގެ އިތުރުވުމެއް ކަމަށެވެ.

"މި 300 މިލިއަން ރުފިޔާ އިތުރުކޮށްފައި މިވަނީ ގްރާންޓްގެ ގޮތުގައި އަޅުގަނޑުމެންނަށް ލިބޭނެ ކަމަށް އަންދާޒާ ކޮށްފައިވާ އަދަދު އިތުރުކޮށްފައިވާތީ އާމްދަނީއަށް ލިބޭނެ ކަމަށް އަޅުގަނޑުމެން އަންދާޒާކުރި މިންވަރު އިތުރުކޮށްފައި މިވަނީ. މިބަދަލާއެކު 2019 ވަނަ އަހަރު ލަފާކުރާ ބަޖެޓް އޯވަރޯލް ބަޖެޓް ޑެފެސިޓް 3.6 ބިލިއަން ރުފިޔާއިން 4 ބިލިއަން ރުފިޔާއަށް އިތުރުވެފައިވޭ. ހަރަދަށް ގެނެވުނު ބަދަލުގެ ތެރޭގައި ސަރުކާރު ބައެއް އޮފީސްތަކަށް ބަޖެޓް އިތުރުކޮށްފައިވޭ،" މިނިސްޓަރު އަމީރު ވިދާޅުވިއެވެ.

މިނިސްޓަރު އަމީރު ވިދާޅުވީ ގެނެވުނު ބަދަލުގެ ތެރޭގައި މިނިސްޓްރީ އޮފް ފޮރިންގ އެފެއަރޒްގެ ރިކަރަންޓްގެ ހަރަދުގެ ގޮތުގައި 25 މިލިއަން ރުފިޔާ އިތުރުކޮށްފައިވާ ކަމަށާއި، ފެމެލީ ޕްރޮޓެކްޝަން އޮތޯރިތީގެ ބަޖެޓަށް 2 މިލިއަން ރުފިޔާ އިތުރުކޮށްފައިވާ ކަމަށެވެ. އަދި ފުރަތަމަ ޑިގްރީއާ ހަމައަށް ދިވެހިރާއްޖެއިން ކިޔެވުމުގެ ހަރަދު ހަމަޖެއްސުމަށް މިނިސްޓްރީ އޮފް ހަޔަރ އެޑިޔުކޭޝަން ބަޖެޓަށް 50 މިލިއަން ރުފިޔާގެ އިތުރުކޮށްފައިވާ ކަމަށް މިނިސްޓަރު ވިދާޅުވިއެވެ.

މީގެ އިތުރަށް މިނިސްޓަރ އަމީރު ވިދާޅުވީ ކުރީގެ ރައީސުންނަށް ކޮންމެ މަހަކު ދެމުން ގެންދާ 75000 ރުފިޔާ އަދި ދިރިއުޅޭ ތަނުގެ ހަރަދު ހަމަޖެއްސުމަށް ކޮންމެ މަހަކު ދެވޭ 10000 ރުފިޔާއަކީ ރައީސް މުހައްމަދު ނަޝީދަށް ގާނޫނީ ގޮތުން ލިބިވަޑައިގަންނަވަން ޖެހޭ އިނާޔަތަކަށް ވެފައި މިކަން ބަޖެޓްގައި ހިމެނިފައި ނުވާތީ ފިނޭންސް މިނިސްޓްރީގެ ޚާއްސަ ބަޖެޓަށް ޖުމްލަ އެއްމިލިއަން ވިހި ހާސް ރުފިޔާ އިތުރުކޮށްފައިވާ ކަމަށެވެ.

"ހަރަދަށް ގެނެވުނު ބަދަލުތަކުގެ ތެރޭގައި މިނިވަން މުއައްސަސާތަކުގެ ބަޖެޓަށް އިތުރުކޮށްފައިވޭ. އެގޮތުން ރައްޔިތުން މަޖިލީހުގެ ބަޖެޓަށް ޖުމްލަ 31.98 މިލިއަން ރުފިޔާ އިތުރުކޮށްފައިވޭ. ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަންގެ ބަޖެޓްގެ ރިކަރަންޓް އަދި ކެޕިޓަލް ހަރަދަށް ޕީ.އެސް.އައި.ޕީ ނުހިމެނޭ ގޮތަށް 37 މިލިއަން ރުފިޔާ އިތުރުކޮށްފައިވޭ. ދައުލަތުން ހިންގާ ޕަބްލިކް ސެކްޓަރ އިންވެސްޓް ޕްރޮގްރާމް ޕީ.އެސް.އައި.ޕީގެ ބަޖެޓަށް ހުށަހަޅާފައިވާ 6.6 ބިލިއަން ރުފިޔާ އަށް 458 މިލިއަން ރުފިޔާ އިތުރުކޮށްފައިވޭ،" މިނިސްޓަރު ވިދާޅުވިއެވެ.

މިނިސްޓަރ އަމީރު ވިދާޅުވީ ދައުލަތުގެ އާމްދަނީއާއި ހިލޭ އެހީއަށް 300 މިލިއަން ރުފިޔާ އިތުރުކޮށްފައިވާއިރު، މިގެނެވުނު ބަދަލުތަކާއެކު ބަޖެޓްގެ ޑެފެސިޓް ޖީޑީޕީގެ ނިސްބަތުން 4.1 އިންސައްތައިން 4.4 އިންސައްތައަށް މިހާރު އިތުރުކޮށްފައިވާ ކަމަށެވެ. އެއީ ދަރަނީގެ ނިސްބަތް 0.3 އިންސައްތަ އިތުރުވުން ކަމަށް ވެސް މިނިސްޓަރު ފާހަގަކުރެއްވިއެވެ.