ޖީ-20 ސަމިޓް 2022 ގައި އިންޑިއާގައި ބާއްވަނީ

ދުނިޔޭގެ ލީޑަރުން ބައިވެރިވާ ޖީ-20 ސަމިޓް 2022 ވަނަ އަހަރު އިންޑިއާގައި ބާއްވާ ގޮތަށް ނިންމައިފި އެވެ.

މި އަހަރުގެ ޖީ-20 ސަމިޓް ނިންމާލުމަށް ފަހު ބޮޑު ވަޒީރު މޯދީ ކުރެއްވި ޓްވީޓެއްގައި ވިދާޅުވީ 2022 ވަނަ އަހަރުގެ ޖީ-20 ސަމިޓް އިންޑިއާގައި ބާއްވަން ފުރުސަތު ލިބިފައިވާ ކަމަށާއި އެ އަހަރަކީ އިންޑިއާ އަށް ވަރަށް ހާއްސަ އަހަރެއްކަމަށެވެ. އެއަހަރަކީ އިންޑިއާގެ މިނިވަން ކަމަށް 75 އަހަރު ފުރޭ ރަންޔޫބިލް ކަމަށާއި އެ ފުރުސަތު އިންޑިޔާ އަށް ލިބުމަކީ ވަރަށް ބޮޑު އުފަލެއް ކަމަށް މޯދި ވަނީ ވިދާޅުވެފައިއެވެ.

އިންޑިއާއިކީ އިގްތިސާދީ ގޮތުން ހަލުވިކަމާއިއެކު ކުރިއަރަމުން އަންނަ ގައުމެއް ކަން ފާހަގަކުރައްވައި މޯދީ ވަނީ އިންޑިއާއިން ސަމިޓްގެ ބައިވެރިންނަށް ހޫނު މަރުހަބާއެއް ކިޔާނެކަމުގެ ޔަގީންކަން އަރުވާފައިއެވެ.

ކުރިން ހަމަޖެހިފައިވާ ގޮތުން 2022 ވަނަ އަހަރުގެ ޖީ-20 ސަމިޓް ބާއްވަން ހަމަޖެހިފައިވަނީ އިޓަލީގައި އެވެ. ނަމަވެސް މޯދީގެ އެދުމާއި އެކު އިންޑިއާއަށް ވަނީ ފުރުސަތު ލިބިފައިއެވެ.

ޖީ-20 ސަމިޓަކީ އިގްތިސާދީ ފޯރަމެއްގެ ގޮތުގައި ކުރިއަށް ސަމިޓެކެވެ. މި ސަމިޓްގައި ބައިވެރިވަނީ އިގްތިސާދީ ގޮތުންނާއި ވިޔަފާރީގެ ގޮތުން އެންމެ ބޮޑަށް ކުރި އަރާފައިވާ ގައުމުތަކެވެ.

ޖީ-20 ސަމިޓްގައި ދުނިޔޭގެ 20 ގައުމެއްގެ އިތުރުން ޔޫރަޕިއަން ޔޫނިއަންއިން ބައިވެރިވެއެވެ. ބައިވެރިވާ ގައުމުތަކު ތެރޭގައި އާޖެންޓީނާ، އޮސްޓްރޭލިއާ، ބްރެޒިލް، ކެނެޑާ، ޗައިނާ، ފްރާންސް، ޖާމަނީ ، އިންޑިއާ، އިންޑޮނޭޝިއާ، އިޓަލީ، ޖަޕާން، މެކްސިކޯ، ރަޝިޔާ، ސައުދީ އަރަބިއްޔާ، ދެކުނު އެފްރިކާ، ތުރުކީ، އިނގިރޭސި ވިލާތުގެ އިތުރުން އެމެރިކާއެވެ. މިފަހަރުގެ ޖީ-20 ސަމިޓް ބާއްވާފައިވަނީ އާޖެންޓީނާގެ ބުއެނޮސް އައިރެސްގައި ނޮވެމްބަރު މަހު 30 އިން ޑިސެމްބަރު އެކަކަށެވެ.