އަލިފާން ނިއްވަން ބޭނުންކުރާ ހާއްސަ ސައިކަލްތަކެއް ތައާރަފްކޮށްފި
2 ޑިސެމްބަރު 2018 | އާދީއްތަ 13:28މި ސައިކަލްގައި ފަޔަރ ބެކްޕެކެއް ބެހެއްޓިފައިވޭ
އަލިފާން ނިއްވުމުގައި ބޭނުންކުރާ ހާއްސަ ސައިކަލްތައް
އެމްއެންޑީއެފް ފަޔަރ އެންޑް ރެސްކިއު ސަރވިސްގެ ޚިދުމަތަށް އަލިފާން ނިއްވުމަށް ބޭނުންކުރާ ދެ ސައިކަލު ހޮނިހިދު ދުވަހު ތައާރަފް ކޮށްފިއެވެ.
މި ސައިކަލް ތައާރަފް ކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވައި ޗީފް އޮފް ޑިފެންސް ފޯސް މޭޖަރ ޖެނެރަލް އަހުމަދު ޝިޔާމު ވިދާޅުވީ އަލަށް ތައާރަފް ކުރެވުނު މި ދެ ސައިކަލުގެ ސަބަބުން ވެހިކަލްތަކަށް ނުވަދެވޭ ހަނި މަގުތަކުގައި ހިނގާ އަލިފާނުގެ ހާދިސާތަކަށް އަވަސްކަމާއެކު, އަލިފާން ނިއްވުމުގައި ޚިދުމަތް ފޯރުކޮށްދޭނެ ކަމަށެވެ.
ސެނަހިޔާ ކުރިމަތީ އޮންނަ ހުސް ބިމުގައި ބޭއްވި މިރަސްމިއްޔާތުގައި މިހާރު އެމްއެންޑީއެފް ފަޔަރ އެންޑް ރެސްކިއު ސަރވިސް އިން ކުރިއަށް ގެންދާ އެކްސަސައިޒް ''ޖައްރާފާ 2018'' ގެ ހަރަކާތެއް ވަނީ ދައްކާލާފައެވެ. އެގޮތުން މިދެސައިކަލު ބޭނުންކޮށްގެން އަލިފާން ރޯވެފައިވާ ކާރެއްގެ އަލިފާން ވަނީ ނިއްވާލާފައެވެ.
މިއަދު ތައާރަފް ކުރި މި ދެ ސައިކަލަކީ އެމްއެންޑީއެފް ފަޔަރ އެންޑް ރެސްކިއު ސަރވިސް އާއި ދިރާގާ ދެމެދު ސޮއިކޮށްފައިވާ އެމްއޯޔޫގެ ތެރެއިން ދިރާގުން ހަދިޔާކޮށްފައިވާ ދެ ސައިކަލެވެ.
ޗީފް އޮފް ޑިފެންސް ފޯސްގެ ހިޔާލުފުޅާ އެއްގޮތްވާ ގޮތުގެ މަތިން ފަރުމާކުރެވިފާ ދެ ސައިކަލުކަން ފާހަގަކުރައްވައި އެމްއެންޑީއެފުން ބުނީ ފަޔަރ ސައިކަލު ފަރުމާކުރުމުގެ މަޤްސަދަކީ ހާދިސާތަކަށް އެމްއެންޑީއެފް ފަޔަރ އެންޑް ރެސްކިއު ސަރވިސް އިން އަވަހަށް ގޮސް އަލިފާން ނިއްވުމުގެ ހިދުމަތް ދިނުމުގައި ހަރަކާތެރިވުން ކަމަށެވެ.
އެމްއެންޑީއެފުން ބުނީ މި ސައިކަލްގައި ފަޔަރ ބެކްޕެކެއް ބެހެއްޓިފައިވާ ކަމަށާއި، ދެ ލީޓަރުގެ ކޮމްޕްރެސްޓް އެއަރ ގެ އެހީތެރިކަމާ އެކު ބޭނުންކުރެވޭ މި ފަޔަރ ބެކްޕެކްގައި 10 ލީޓަރުގެ ފެންހިމެނޭ ކަމަށެވެ. އަދި ސައިކަލުގެ ދެފަރާތުގައި އަލިފާން ނިވި ހަރުކުރެވިފައި ވާއިރު ސައިކަލްގެ ޔޫ ބޮކްސް ތެރޭގައި ބަންދު ތަންތަނުގައި އަލިފާން ނިއްވުމަށް ބޭނުންކުރާ އާލާތެއް ކަމުގައިވާ ޑީއެސްޕީ (ޑްރައި ސްޕްރިންކްލާ ޕައުޑަރ) އެއް ބެހެއްޓިފައި ވެއެވެ.
