ސީ ލައިފް ގްލޯބަލް އިންކް ޕްރައިވެޓް ލިމިޓެޑުން ހުޅުމާލޭގައި ފްލެޓް އެޅުމަށް ކަމަށް ބުނެ ފައިސާ ނެގުމަށް ފަހު ވީނުވީއެއް ނޭނގުނު މައްސަލައިގައި އެކުންފުންޏާއެކު ލިޔެކިޔުމުން ކުރެވިފައިވާ މުއާމަލާތްތަކާއިއެކު، ފުލުހުންނަށް ހުށަހެޅުމަށް އެ އިދާރާއިން  އެދިއްޖެއެވެ.

ފްލެޓް ވިއްކާނެ ކަމަށް ބުނެ ސީ ލައިފް ގްލޯބަލް އިން  ވަނީ ގާތްގަނޑަކަށް 191 މީހެއްގެ އަތުން ފައިސާ ނަގާފައެވެ. އެމައްސަލަ މިހާރު ވަނީ ސިވިލް ކޯޓަށް ވެސް ހުށައަޅާފައެވެ.

ފުލުހުން ބުނީ ހައުސިންގ ޑިވެލޮޕްމެންޓް ކޯޕަރޭޝަން (އެޗް.ޑީ.ސީ) އާއި ސީލައިފް ގްލޯބަލް އިންކް ޕްރައިވެޓް ލިމިޓެޑާއި ދެމެދު ވެފައިވާ އެއްބަސްވުމެއްގެ ދަށުން، ހުޅުމާލޭގައި 3000 ހައުސިންގ ޔުނިޓު އެޅުމަށް، ސީ ލައިފް ގްލޯބަލް އިންކް ޕްރައިވެޓް ލިމިޓެޑާއި ހަވާލުކުރުމުން، އެކި ފަރާތްތަކުގެ އަތުން ބޮޑު އަދަދުތަކުން ފައިސާ ނަގާ ހައުސިންގ ޔުނިޓްތައް އަޅައިނުދީ މަކަރާއި ހީލަތް ހަދާފައިވާކަމަށް ތުހުމަތު ކުރެވޭ މައްސަލައެއް، މޯލްޑިވްސް ޕޮލިސް ސަރވިސްގެ އިކޮނޮމިކް ކްރައިމް ޑިޕާރޓްމަންޓުން ތަހުގީގު ކުރަމުންދާ ކަމަށެވެ. 

މިމައްސަލައިގެ ތަހުގީގުގައި ސީލައިފް ގްލޯބަލް އިންކް ޕްރައިވެޓް ލިމިޓެޑަށް ދައުވާ ކުރުމަށް ވަރަށް ގިނަ ފަރާތްތަކުން މައްސަލަ ހުށަހަޅާފައިވާ ކަމަށް ފުލުހުން ބުނެއެވެ. ސީލައިފް އެޕާޓްމަންޓްގެ މައްސަލައިގައި މިހާތަނަށް މައްސަލަ ހުށަހަޅާފައިވާ ފަރާތްތަކުގެ އިތުރުންވެސް މިމައްސަލައިގައި ގެއްލުން ލިބިފައިވާ، ބަޔަކު ތިބިކަމަށް މި މައްސަަލައިގެ ތަހުގީގުން މިހާތަނަށް ގަބޫލުކުރެވޭ ކަމަށް ފުލުހުން ބުނެއެވެ. އެހެންކަމުން ސީލައިފާއެކު ލިޔެކިޔުމުން މުއާމަލާތްކޮށް އެފަދަ މައްސަލައެއް ދިމާވެފައިވާނަމަ އެކަން ހުށަހެޅުމަށް ފުލުހުން ވަނީ އެދިފައެވެ. 

ސީލައިފް ގްލޯބަލް އަށް ހުޅުމާލޭގައި ގިނަ އަދަދެއްގެ ފްލެޓްތަކެއް އެޅުމަށް 2014 ވަނަ އަހަރުގެ މާޗް 13 ވަނަ ދުވަހު އެޗްޑީސީ އިން ހަވާލު ކޮށްފައިވެއެވެ. އެޕާޓްމަންޓެއްގެ ޖުމްލަ އަގަކީ 3.4 މިލިއަން ރުފިޔާ އެވެ. ފްލެޓަށް ދައްކަން ޖެހޭ އެ އަހަރުގެ އޭޕްރީލް މަހު އެ މަޝްރޫއުގެ ބިންގާ އަޅުއްވައި ދެއްވާފައި ވަނީ ކުރީގެ ރައީސް އަބްދުﷲ ޔާމީނެވެ. 

ސީލައިފްގެ މެނޭޖިން ޑިރެކްޓަރަކީ އަހުމަދު މޫސާ މުހައްމަދު (އައްމަޓީ) މިހާރު ދިރިއުޅެމުން ދަނީ ރާއްޖޭން ބޭރުގަ އެވެ.