ވާހަކަތައް ފަތުރަމުންގެންދަނީ ޤައުމުތަކާއި ގުޅުން ބަދަހިކުރުމަށް ކުރަމުންގެންދާ މަސައްކަތްތަކަށް ހުރަސްއެޅުމަށް: ފޮރިންގ މިނިސްޓްރީ

ރާއްޖޭގައި ބޭރު ޤައުމެއްގެ އަސްކަރީ މަރުކަޒެއް އެޅުމަށް ހުއްދަދީފައިވާކަމަށް ބުނެ ވާހަކަތައް ފަތުރަމުންގެންދަނީ، ދިވެހިރާއްޖެއާއި، އަވައްޓެރި ޤައުމުތަކާއި، ބައިނަލްއަޤްވާމީ މުޖުތަމަޢާއެކު އޮންނަ ގުޅުން އަލުން ބަދަހިކުރުމަށް ސަރުކާރުން ކުރަމުންދާ މަސައްކަތްތަކަށް ހުރަސްއެޅުމަށްކަމަށް ފޮރިންގ މިނިސްޓްރީން ބުނެފި އެވެ.

އިންޑިއާ ސަރުކާރުން ދިވެހިރާއްޖެއަށް ލިބޭ މާލީ ނުވަތަ އެހެނިހެން މާއްދީ ފައިދާއެއްގެ ބަދަލުގައި ދާއިމީ ގޮތެއްގައި އިންޑިއާގެ އަސްކަރިއްޔާއިން ރާއްޖޭގައި ތިބުމަށް، ދިވެހި ސަރުކާރުން ހުއްދަ ދިނުމަށް ރާވަމުންދާ ކަމަށް މީޑިއާގައި ދައްކަމުންދާ ވާހަކަތައް ދޮގުކޮށް، ފޮރިންގ މިނިސްޓްރީން އާންމުކުރި ބަޔާނެއްގައި ބުނީ، އެއީ އެއްވެސް އަސްލެއް ނެތް ވާހަކަތަކެއް ކަމަށެވެ. އަދި ދިވެހި ސަރުކާރުން އަބަދުވެސް މަސައްކަތް ކުރަމުން ދާނީ ރައްޔިތުންގެ މަސްލަހަތު އިސްކޮށްގެންކަމަށް އެ ބަޔާނުގައި ބުނެފައިވެއެވެ.

އޭގެއިތުރުން ރާއްޖޭގެ މިނިވަންކަމާއި އިސްތިޤްލާލަށް ބުރޫ އަރާނެ ފަދަ އެއްވެސް ބައިނަލްއަޤްވާމީ ނިންމުމެއް، ނުވަތަ މަސައްކަތެއް ނުކުރާނެކަމުގެ ޔަޤީންކަން ދިވެހި ރައްޔިތުންނަށް އަރުވާކަމަށްވެސް އެ މިނިސްޓްރީގެ ބަޔާނުގައި ބުނެފައިވެއެވެ.

މިނިސްޓްރީން މީޑިއާގައި ދެކެވެމުންދާ ވާހަކަތައް ދޮގުކުރިއިރު، އިންޑިއާއިން ރާއްޖެއަށް އެއް ބިލިއަން ޑޮލަރުގެ ލޯނެއް ދޭން ނިންމާފައިވާ ކަމުގެ އަޑުތަކެއް ވަނީ ފެތުރިފަ އެވެ. އަދި އެއީ ޗައިނާ އަށް ދަރާފައިވާ ދަރަނި އަދާކުރުމަށް އިންޑިއާ އިން ރާއްޖެއަށްދޭ ލޯނެއްކަމަށްވެސް މީޑިއާތަކުގައި ބުނެފައިވެއެވެ.

އޭގެއިތުރުން އިންޑިއާ ސަރުކާރުގެ މަސްދަރަކާއި ހަވާލާދީ އޭޝިއަން ރިވިއުގައި ބުނެފައިވަނީ ރާއްޖެ އާއި އިންޑިއާގެ ސެކިއުރިޓީ ގުޅުން ހަރުދަނާ ކުރުމަށް "ދާއިމީކޮށް އިންޑިއާގެ އަސްކަރީ ފައުޖުތަކެއް ރާއްޖެ އަށް ގެންދާގޮތަށް އެއްބަސްވެ" ރާއްޖެ އަށް ކުޑަ އިންޓަރެސްޓެއްގައި ލޯނުތަކެއް ދިނުމަށް ނިންމާފައިވާ ކަމަށެވެ. އަދި އެ ލޯން އެއްބަސްވުމުގައި އަންނަ މަހުގެ 17 ވަނަ ދުވަހު ރައީސް އިބްރާހިމް މުހައްމަދު ސޯލިހް އިންޑިއާއަސް ކުރައްވާ ދަތުރުފުޅުގައި ސޮއިކުރައްވާނެކަމަށްވެސް އެ ނޫހުގައި ބުނެފައިވެއެވެ.