ފަރަށް އެރި ކޮޅުވެއްޓި ފުންކުރުމުގެ މަސައްކަތް ފަށައިފި
28 ނޮވެމްބަރު 2018 | ބުދަ 14:00ކޮޅުވެއްޓީގައި ތިން ދިވެހިންނާއި ދެ ބިދޭސީން ތިބި
ފަރަށް އެރި ކޮޅުވެއްޓި ފުން ކުރުމުގެ މަސައްކަތް ދަނީ ކުރަމުން
ފަރަށް އަރާފައިވާ "ޝަނީމް" ނަމަކަށް ކިޔާ ކޮޅުވެއްޓި ފުންކުރުމުގައި އެމްއެންޑީއެފް ކޯސްޓްގާޑުން އެހީތެރިކަން ފޯރުކޮށްދޭން ފަށައިފިއެވެ.
އެމްއެންޑީއެފުން ބުނީ 126 ފޫޓުގެ މި ކޮޅުވެއްޓި އަނަންތަރާ ވެލި ރިސޯރޓުގެ އިރުމަތީ ފަރާތު ފަރަށް އަރާފައިވާ ކަމުގެ ރިޕޯޓު ލިބިފައިވަނީ އަންގާރަ ދުވަހުގެ ރޭ ދަންވަރު 2:05 ހާއިރުއެވެ.
އެމްއެންޑީއެފުން ބުނީ މި ކޮޅުވެއްޓި ފަރަށް އެރި އިރު މީގައި ތިން ދިވެހިންނާއި ދެ ބިދޭސީން ތިބި ކަމަށެވެ. އަދި މި ހާދިސާގައި އެއްވެސް މީހަކަށް އަނިޔާއެއް ލިބިފައި ނުވާ ކަމަށެވެ.
މި ހާދިސާއާއި ގުޅިގެން ދޯނީގެ ވެރިފަރާތުން ކަފުޖެހުމަށްޓަކައި ޓަގެއް ހޯދުމާއި އެކު ބުދަ ދުވަހުގެ 13:00 ގައި މި ކޮޅުވެއްޓި ކަފުޖެހުމުގެ މަސައްކަތުގައި އެމްއެންޑީއެފް ކޯސްޓްގާޑުން ދަނީ އެހީތެރިކަން ފޯރުކޮށްދެމުންދާ ކަމަށް އެމްއެންޑީއެފުން މައުލޫމާތުދެއެވެ.
