ތަގްސް އޮފް ހިންދުސްތާނަށް ބޮކްސް އޮފީހުގައި ލިބުނު ނާކާމިޔާބީއަށް އާމިރު ޚާން މާފަށް އެދިއްޖެ އެވެ.

އާމިރު ޚާން ވަނީ އެކަމުގެ ފުރިހަމަ ޒިންމާ އޭނާ ނަގާކަމަށް ބުނެފައެވެ.

މި އަހަރުގެ ދިވާލީގައި ރިލީޒް ކުރި މިފިލްމް ވަނީ ރެކޯޑް މުގުރާފައެވެ. އެގޮތުން މި ފިލްމް ރިލީޒް ކުރި ފުރަތަމަ ދުވަހު ފިލްމަށް ވަނީ ބޮކްސް އޮފީހުގައި 50 ކްރޯޑް އިންޑިއަން ރުޕީސް ލިބިފައެވެ.

ފުރަތަމަ ދުވަހާއި އަޅާބަލާއިރު ފިލްމަށް ލިބެމުން ދިޔަ ތަރުހީބު ކުޑަވެފައި ވަނީ ފިލްމު ކްރިޓިކުންގެ ފާޅުކުރި ނެގެޓިވް ހިޔާލުތައް ގިނަވުމުން ކަމަށް ބެލެވޭ ކަމަށް ރިޕޯޓްތައް ބުނެއެވެ.

މި ފިލްމުގައި ދެއްކުނު ޑިސްއެޕޮއިންޓިންގ ޕާރފޯމަންސާއި ގުޅޭގޮތުން ވާހަކަ ދައްކަމުން އާމިރު ބުނެފައިވަނީ އެކަމުގެ ފުރިހަމަ ޒިންމާ އޭނާ ނަގާކަމަށާއި ނަމަވެސް އެމީހުންނަށް މަސައްކަތް ކުރެވުނު އެންމެ ރަނަގަޅަށް މަސައްކަތް ކޮށްފައިވާ ކަމަށެވެ. އަދި އެ ފިލްމް ބަލައިގަތް ގިނަ ބަޔަކުވެސް ތިބިކަން ފާހަގަކޮށް އާމިރު ވަނީ އެމީހުންނަށް ޝުކުރު އާދާކޮށްފައެވެ.

"އަހަރުމެން އުފާވޭ އެމީހުންނަށް ފިލްމް ކަމުދިޔައީމަ، ނަމަވެސް އެއީ މައިނޯރިޓީ. މެޖޯރިޓީ މީހުންނަށް އެފިލްމް އެހާ ގަޔަކާއެއް ނުވި، އަދި އެއީ ކީއްވެގެންކަންވެސް އިނގޭ. އަހަރެން ބެނުން ތިއޭޓަރަށް ގޮސް ފިލްމް ބެލި ފަރާތްތަކުގެ ކިބައިން މާއާފަށް އެދެން އެމީހުން ހިތްހަމަ ޖައްސައިދެވޭ ވަރަށް ފިލްމް ނުގެންދެވުނީމަ. އަހަރެންނަށް ކުރެވޭނެ އެންމެ ރަނގަޅަށް މަސައްކަތް ކުރިޔަސް ބެލުންތެރިން އުފާވާ ވަރެއް ނުކޮށްދެވުނު. ވަރަށް ބޮޑު އުއްމީދަކާއި އެކު ފިލްމު ބަލަން ދިޔަ މީހުނަށް އެމީހުން އުއްމީދު ކުރި ވަރަށް ޕާރފޯމް ކުރެވިފައި ނުވާތީ އެކަމާ ހިތާމަކުރަން،،" އާމިރު ބުންޏެވެ. 

އެފަދަ ރައްދެއް ބެލުންތެރިންގެ ފަރާތުން އައި ސަބަބެއްކަމަށް ދެކެނީ ކޮންކަމެއްތޯ އެހުމުން އެކްޓަރ ބުނީ "އަހަރެންނަކަށް އެހާ ކޮމްފޮޓަބަލް އެއް ނޫން އެވާހަކަތައް ޕަބްލިކުގަ ދައްކާކަށް. އަހަރެންގެ ފިލްމަކީ އަހަރެންގެ ދަރިއެއް ކަހަލަ އެއްޗެއް. އެހެންކަމުން ލިބޭ ނާކާމިޔާބަކީވެސް އަހަރެންގެ އެއްޗެއް" ކަމަށެވެ

ވިޖޭ ކްރިޝްނާ އަޗަރިޔާ ޑައިރެކްޓް ކޮށްފައިވާ މި ފިލްމް "ތަގްސް އޮފް ހިންދުސްތާން" ގައި ތަރިންގެ ތެރޭގައި ފެނިގެން ދާނީ އާމިރު ޚަންގެ އިތުރުން އަމީތާބް ބަޗަން، ކެޓްރީނާ ކެއިފް އަދި ފާތިމާ ސަނާ ޝެއިހް އެވެ.

ބޮކްސް އޮފީސް އިންޑިއާ ޑޮޓްކޮމް ގައި ރިޕޯޓްކޮށްފައިވާ ގޮތުން މި ފިލްމް ރިލީޒް ކުރިތާ 11 ދުވަސް ތެރޭގައި މި ފިލްމަށް ލިބިފައިވަނީ ޖުލްމް 139.50 ކްރޯޑް ރުޕީސް އެވެ.