އަދީބް ގެއަށް ބަދަލުކުރަން ހުއްދަ ދީފި
28 ނޮވެމްބަރު 2018 | ބުދަ 15:46ކިޑްނީގައި އުފެދިފައިވާ ހިލަ ނައްތާލުމަށް ސަރޖަރީއެއް ހަދާފައިޥޭ
ކުރީގެ ނައިބުރައީސް އަހުމަދު އަދީބް
ޖަލު ހުކުމް ތަންފީޒުކުރައްވަމުން ގެންދަވަނިކޮށް ހާލު ދެރަވެ، ހޮސްޕިޓަލްގައި އެޑްމިޓް ކޮށްފައިވާ ކުރީގެ ނާއިބު ރައީސް އަޙުމަދު އަދީބު ގޭބަންދަށް ބަދަލު ކުރުމުގެ ހުއްދަ މޯލްޑިވްސް ކަރެކްޝަނަލް ސަރވިސް އިން ދީފިއެވެ.
މަޢުލޫމާތު ލިބިފައިވާ ގޮތުގައި ޑޮކްޓަރުންގެ ލަފާފުޅާއި އެއްގޮތަށް އަދީބް އާއިލާ ކައިރި އަށް ގޭބަންދަށް ބަދަލުކުރަން ނިންމީ އަންގާރަ ދުވަހުގެ މެންދުރު ފަހުއެވެ. މިކަން އަދީބުގެ އަނބިކަންބަލުން މަރިޔަމް ނަޝްވާ ވަނީ ކަށަވަރު ކޮށްދެއްވާފައެވެ.
އަދީބް ގޭ ބަންދަށް ބަދަލުކުރުމަށް ނިންމާފައި މި ވަނީ އަދީބްގެ ހަށިގަނޑަށް ސްޓެންޓެއް ލައްވާފައިވާތީ އަދީބަށް ބޭނުންވާ މާހައުލާއި އާއިލާގެ އެހީ ލިބޭނެހެން ގޭބަންދަށް ބަދަލުކުރުމަށް ހިއުމަން ރައިޓްސް ކޮމިޝަން އޮފް ދި މޯލްޑިވްސް އިން މޯލްޑިވްސް ކަރެކްޝަނަލް ސަރވިސް އަށް އަންގާފައި ވަނިކޮށެވެ. މައުލޫމާތު ލިބިފައިވާ ގޮތުގައި އެޗްއާރްސީއެމް އިން އަދީބް ގެއަށް ބަދަލުކުރުމަށް ކަރެކްޝަނަށް އަންގާފައި ވަނީ ނިމިގެންދިޔަ ހަފްތާގެ ބުރާސްފަތި ދުވަހުއެވެ.
ހޮސްޕިޓަލުގައި އެޑްމިޓްކޮށްގެން އަދީބަށް ފަރުވާދޭން ފަށާފައި ވަނީ އެމަނިކުފާނުގެ ވައަތު ކިޑްނީ ހިމެނޭ ހިސާބުން ހަށިގަނޑަށް އިންތިހާ އަށް ތަދުވާތީއެވެ. ހޮސްޕިޓަލުގައި އެޑްމިޓްކޮށް، ހެދި ތަހުލީލުތަކުން އެނގުނު ގޮތުގައި އަދީބްގެ ވައަތު ކިޑްނީ ގައި އުފެދިފައިވާ ހިލަ، އޭރު ވަނީ ކިޑްނީ އާއި ބްލެޑާރ އާއި ދެމެދުގައިވާ ހޮޅި (ޔުރެޓަރ) އަށް ފައިބައި އެ ހޮޅީގައި ތާށިވެފައެވެ. ޔުރެޓަރގައި ތާށިވެފައިވާ ހިލަ ނަބޭސް ދީގެން އްތާލުމަށް ކުރި މަސައްކަތް ނާކާމިޔާބު ވުމުން، މި މަހުގެ 19 ވަނަ ދުވަހު ޑޮކްޓަރުން ވަނީ ލޭޒަރ ބޭނުންކޮށްގެން އެ ހިލަ ނައްތާލުމަށް މަސައްކަތް ކޮށްފައެވެ.
މި ސަރޖަރީ ކާމިޔާބުވި ނަމަވެސް، އެ ހިލަ އާއި އަދި އަދީބްގެ ކަނާތްފަރާތުގެ ކިޑްނީގައި އުފެދިފައިވާ ހިލަ ނައްތާލުމަށް އިތުރު ފަރުވާ ދޭން ޖެހޭކަމަށް ޑޮކްޓަރުން ވަނީ ބުނެފައެވެ. ސަރޖަރީ އަށް ފަހު އަދީބްގެ ކިޑްނީ އާއި ބްލެޑަރ އާއި ދެމެދުގައިވާ ހޮޅިއަށް ސްޓެންޓެއް ލައްވާފައިވާ އިރު، ސަރޖަރީ އަށް ފަހު އަދީބްގެ ހަށިގަނޑުގައި އިންފެކްޝަނެއް އުފެދި، މިހާތަނަށް ޑޮކްޓަރުން ދިޔައީ ބާރުގަދަ އެންޓިބައޮޓިކް އެއް ދީގެން އަދީބަށް ފަރުވާ ދެމުންނެވެ.
ސަރޖަރީ އަށް ފަހު އަދީބްގެ ހަށިގަނޑުގައި އުފެދުނު އިންފެކްޝަނުގެ ސަބަބުން އަދީބްގެ ހާލު ވަރަށް ދެރަވެ، އަދީބަށް ގިނަ އުނދަގޫތަކެއް ވަމުންދާ ކަމަށް އަދީބްގެ އާއިލާ އިން ވަނީ ބުނެފައެވެ.
ދައުލަތުގެ ކަމާއި ބެހޭ ފަރާތްތަކުން އަދީބްގެ ފަރުވާ އަށް އިހުމާލުވެ، އަދީބްގެ ހާލު ދެރަވެގެން ހޮސްޕިޓަލުގައި އެޑްމިޓްކޮށްފައިވާ އިރު، އަދީބަށް ފަރުވާ ބޭނުންވާ އިތުރު ބައެއް ކަންކަން ވެސް އާއިލާ އިން ދަނީ ފާހަގަކުރަމުންނެވެ. އެގޮތުން އަދީބްގެ ކަނާތް ފަރާތުގެ ކިޑްނީގައި އުފެދިފައިވާ ހިލަ އާއި، އަދީބްގެ ހަށިގަނޑުގައި އުފެދިފައިވާ ސިސްޓްތަކާއި، އަދީބްގެ ލޮލަށް ޖެހިފައިވާ ގްލޮކޯމާއަށް ފަރުވާދިނުމަށް އަދީބްގެ އާއިލާ އިން ކެނޑިނޭޅި ދަނީ އެދެމުންނެވެ. އަދި މީގެ ތިން އަހަރެއްހާ ދުވަސް ކުރިން އަދީބްގެ ކެންސަރ ސްކްރީނިންގ އެއް ހެދުމަށް ޑޮކްޓަރުން އަންގާފައިވާ އިރު، މިހާތަނަށް އެ ސްކްރީނިން ހެދުމުގެ ފުރުސަތު ވެސް އަދީބަށް ދީފައެއް ނުވެއެވެ.
އަދީބާއި މެދު ޖަލުގައި އެތައް ތަފާތުކުރުންތަކެއް ގެންގުޅޭކަމުގެ ތުހުމަތު ކުރެވޭ އިރު، ނާ އިންސާފުން ޖަލަށް ލެވި ޖަލުގައި ދުވަސްތަކެއް ހޭދަކުރެއްވުމަށްފަހު މިނިވަންވެ، މިއަދު ސަރުކާރުގައި ތިއްބެވި އިސް ވެރިން ވަނީ އެކި ތަންތާނގައި އަދީބަކީ ސިޔާސީ ފަރާތްތަކުގެ ތެރެއިން ޖަލުގައި އެންމެ ބޮޑު އަނިޔާ އެއް ލިބެމުންދާ ފަރާތް ކަމަށް ވިދާޅުވެ ވާހަކަފުޅު ދައްކަވާފައެވެ.
