ކުރީގެ ރައީސް އަބްދުﷲ ޔާމީންގެ ވެރިކަމުގެ ތެރޭގައި ހިންގި ޒަރީމާތަކުގެ ވާހަކައަކީ އައު ވާހަކަތަކެއް ނޫނެވެ. ޤާނޫނު އަސާސީ އެފުށްމިފުށަށް ޖަހައި، ޤާނޫނުތަކަށް ހިތުހިރުގޮތަކަށް ބަދަލު ގެނެސް، ސިޔާސީ މީހުންނާއި، އާންމު ރައްޔިތުން ހައްޔަރުކޮށް، ޖަލަށްލައި އަނިޔާކޮށް ހެދީ އެމަނިކުފާނުގެ ވެރިކަމުގެ ތެރޭގައެވެ. އެމަނިކުފާނަށް ވާގިވެރި މަދު ބަޔެއްގެ އެހީތެރިކަމާއެކުގަ އެވެ. 

ހައްދުފަހަނަ އަޅަފައިވާ އަނިޔާވެރިކަމާއި، ހިންގަމުން ދިޔަ ހަޑިހުތުރު އަމަލުތަކާއެކު ރިޔާސީ އިންތިހާބުގައި އިބްރާހިމް މުހައްމަދު ސޯލިހަށް އެންމެ ގިނައިންވެވަޑައިގަންނަވަންޖެހުނު ވައުދަކަށްވީ އަނިޔާވެރިކޮށް، ހައްޔަރުކޮށްފައިވާ މީހުންނަށް އިންސާފު ހޯދައިދެއްވާނެކަމުގެ ވައުދު އެވެ. ސިޔާސީ މީހުން މިނިވަންކުރައްވާނެކަމުގެ ވައުދާއި، އަމިއްލަ މަންފާއާއި ފައިދާއަށްޓަކައި، ޤާނޫނު އަސާސީއަށާއި ޤާނޫނުތަކަށް ގެނެސްފައިވާ އިސްލާހުތައް ބާތިިލްކުރައްވާނެކަމުގެ ވައުދު އެވެ. ވެރިކަމުގެ ފުރަތަމަ ދުވަހުން ފެށިގެން ފުރަތަމަ 100 ދުވަހުގެ ތެރޭގައި އެކަންކަން އިސްލާހުކޮށް، ހަމަމަަގަށް ގައުމު އަޅުއްވާނެކަމަށް އޭރުގައި އިބްރާހިމް މުހައްމަދު ސޯލިހް ވައުދުވެވަޑައިގަންނަވަމުންގެންދެވި އެވެ. 

ގިނަ ބަޔަކު ހީކޮށްގެންވެސް ތިބީ ވެރިކަމާއި ހަވާލުވެވަޑައިގެންނެވުމަށްފަހު، އެ ކަންތައްތައް އިސްލާހުކުރެއްވުމަށް ރައީސް އިބްރާހިމް މުހައްމަދު ސޯލިހަށް ގިނަ ކަންތައްތަކެއް ކުރައްވަންޖެހިވަޑައިގަންނަވާނެ ކަމަށެވެ. ނަމަވެސް ކަންވެގެންދިޔައީ ހީކުރިގޮތާއި މުޅި ދިމާ އިދިކޮޅަށެވެ. 

އިންތިހާބު ނަތީޖާއާއެކު ހިންގި ޒަރީމާތައް ރަނގަޅުކުރުމަށް ފޫގަޅާލިތަން ފެނުނީ އެ ޒަރީމާތައް ހިންގި ފަރާތްތަކެވެ. ކޯޓުތަކަށް ވަޑައިގެން ޕީޖީގެ ވަކީލުންތައް ތިމަންމެންނަށް ގޯސްތައް ހެދުނުކަމަށް އިއުތިރާފްވެ، މައްސަލަތަށް ބާތިލްކުރުމަށް އާދޭސް ކުރަމުންގެންދިޔައިރު، ކޯޓުތަކުގައި ތިއްބެ ފަނޑިޔާރުންނަށްވެސް ނިމުނު 5 އަހަރު ނުފެނުނު އެތަށް ކަމެއް ކުއްލިއަކަށް ފެނިވަޑައިގެން މައްސަލަތައް ބަތިލްކޮށް، ހުކުމްތައް އިއްވަމުން ގެނދެވި އެވެ. 

ސުޕްރީމް ކޯޓުގެ ފަނޑިޔާރުންގެ ފަރާތުންވެސް ފެނުނީ ހަމަ އެއް މަންޒަަރެކެވެ. ސިޔާސީ ބޭފުޅުންގެ މައްޗަށް އިއްވި ބޭއިންސާފު ހުކުމްތައް އިސްތިއުނާފަށް ހުށަހެޅުއްވުމުން އެ މައްސަލަތައް ބޭރުކޮށް، މައްސަލަތަކުގައި އެ ބޭފުޅުންނާއި ދެކޮޅަށް ހުކުމްތައް ނެރުއްވަމުންގެންދެވުމަށްފަހު، އިންތިިހާބުގެ ނަތީޖާއާއެކު އަލުން އެ މައްސަލަތައް ރިވިއުކުުރައްވައި، ހުކުމްތައް ގެންދެވީ ކުރައްވަމުންނެވެ. އެކަމުގައި ރައީސް އިބްރާހިމް މުހައްމަދު ސޯލިހެއް، އަދިކިޔެއްތަ އެމަނިކުފާނުގެ އަރިހުގައި މަސައްކަތްކުރައްވާ އެންމެ ބޭފުޅަކުވެސް މަސައްކަތެއް ކުރައްވާކަށް ޖެހިިވަޑައިގެންފައެއް ނުވެ އެވެ. 

ހެދި ގޯސްތައް، އިސްލާހްކޮށް، މޫނުމަތި ރީތިކުރަން ފެށީ އެ މީހުން އެ މީހުންނަށެވެ. 

ކޯޓުތަކޭ އެއްގޮތަށް ރައްޔިތުންގެ މަޖިލީހުގެ ތެރެއިންވެސް ފެނުނީ ހަމަ އެއް މަންްޒަރެކެވެ. 5 އަހަރުވަންދެން ރައްޔިތުންގެ އަތްފައިގައި ކަސްތޮޅު އަޅުވައި، އަބްދުﷲ ޔާމީން ބޭނުން ގޮތަކަށް ޤާނޫނުތައް ފާސްކޮށްދެއްވުމުގައި އަވަދިނެތި އުޅުއްވީ ޕީޕީއެމްގެ މެމްބަރުން ކޮޅު އެވެ. ޤާނޫނުތަށް ކިޔެއްތަ، ޤާނޫނު އަސާސީވެސް އަބްދުﷲ ޔާމީނަށްޓަކައި ބަދަލުކޮށްދެއްވީ ހަމަ އެ މެމްބަރުން ކޮޅު އެވެ. އެކަންތައްތައް ދިފާއުކޮށް، ޕޯޑިއަމްތަކާއި ޓީވީ ޕްރޮގްރާމްތަކުގގައި ސަނާ ކިޔުއްވަމުންގެންދެވީވެސް އެ މެމްބަރުންނެވެ. 

މިއަދު ޕީޕީއެމްގެ އެ މެމްބަރުންވެސް ފޫގަޅާލާފައި ތިބީ ޤާނޫނު އަސާސީއަށާއި، ޤާނޫނުތަކަށް އެ ގެނައި އިސްލާހުތައް ބާތިލްކުުރުމަށެވެ. 65 އަހަރުން މަތީގެ މީހުންނަށް ވެރިކަމަށް ކުރިމަތިނުލެވޭގޮތަށް ޤާނޫނު އަސާސީއަށް ގެނެވުނު ފުރަތަމަ އިސްލާހު ބަތިލްކުރުމަށް ޕީޕީއަށް ނިސްބަތްވެވަޑައިގަންނަވާ އިނގުރައިދޫ ދާއިރާގެ މެމްބަރު އިބްރާހިމް ފަލާހް ހުށަހެޅުއްވިއިރު، ބިން މިލްކުކުރެވޭގޮތަށް ޤާނޫނު އަސާސީއަށް ގެނައި އިސްލާހު ބާތިލްކުރުމަށް ހުށަހެޅީ ޕީޕީއެމްގެ މެމްބަރު އަބްދުﷲ ރިފާއު އެވެ. 

ރައްޔިތުންގެ ދުލާއ އަތުގައި ކަސްތޮޅު އެޅުވި ޤާނޫނުތައް ބާތިލްކޮށް، ޤާނޫނުތައް އިސްލާހުކުރަމުންގެންދަނީވެސް ހަމަ އެ މެމްބަރުންނެވެ. އަމިއްލައަށް ހޭވި ހަޑިތައް ސާފުކުރަމުންގެންްދަނީ ހަމަ އެ ބޭފުޅުން އަމިއްލައަށެވެ. ފެންނަން އޮތް ހަޤީޤަތަކީ އެއީ އެެވެ. 

ކިތަންމެވަރަކަށް ހެއްދެވި ހަޑިތައް ސާފުކުރައްވަން މަސައްކަތްކުރައްވައި، މޫނު މަތި ސާފުކުރަން މަސައްކަތްކުރެއްވިނަމަވެސް ރައްޔިތުން ވިސްނުމުގައި ބަހައްޓަންޖެހޭ ކަމެއްވެ އެވެ. ހަނދާނުން ދޫކޮށް ނުލާންވީ ކަމަކީ ހުރިހާ ކަމެއްގެ އަސްލަކީ އެ ބޭފުޅުންކަަމެވެ. އެ ފަނޑިޔާރުންނާއި އެ ވަކީލުންތައްކަމެވެ. އެ މެމްބަރުންނާއި އެ މެމްބަރުން އަބްދުﷲ ޔާމީން ކުރެއްވި ކަންތައްތަކަށް ދެއްވި އެއްބާރުލުންކަމެވެ. މުޅި ނިޒާމް ފުނޑުފުނޑުކޮށްލާ، ރައްޔިތުން އަޅުވެތިކުރުމަށް ފުރުސަތު ދެއްވި އަސްލު ބޭފުޅުންނަކީ އެއީ ކަމެވެ.