އަނެއްކާވެސް ޕީޕީއެމްގެ ދެ މެމްބަރަކު ޖޭޕީއަށް
25 ނޮވެމްބަރު 2018 | އާދީއްތަ 18:42ގުޅިވަޑައިގެންނެވީ މެމްބަރު ހުސައިނާއި މެމްބަރު އަޒްހާން
ޖުމްހޫރީ ޕާޓީއާ ގުޅިވަޑައިގެންނެވުމަށްފަހު، ކަނޑިތީމު ދާއިރާގެ މެމްބަރު މުހައްމަދު ހުސައިން ވާހަކަފުޅު ދައްކަވަނީ
ޕީޕީއެމް ޕާލަމެންޓްރީ ގްރޫޕުގެ ދެ މެމްބަރުން ކަމަށްވާ މުހައްމަދު ހުސައިނާއި އަޒްހާން ފަހުމީ ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީ (ޖޭޕީ)އަށް ސޮއި ކުރައްވައިފިއެވެ.
އާދީއްތަ ދުވަހުގެ ރޭ ޖޭޕީއާ ގުޅިވަޑައިގެންނެވި ކަނޑިތީމު ދާއިރާގެ މެމްބަރަކު މުހައްމަދު ހުސައިން، 2014 ވަނަ އަހަރު މަޖިލީހަށް އިންތިހާބު ވެޑައިގެންނެވީ ވެސް ޖޭޕީގެ ޓިކެޓުގައެވެ. އޭނާ ޖޭޕީ ދޫކުރައްވައި ޕީޕީއެމާ ގުޅިވަޑައިގެންނެވީ 2015 ވަނަ އަހަރުގައެވެ.
އަނެއްކާވެސް އެނބުރި މުހައްމަދު ހުސައިން ޖޭޕީއާ ގުޅިވަޑައިގަތުމަށްފަހު، އޭނާ ވަނީ މެމްބާޝިޕް ފޯމު، އެ ޕާޓީގެ ލީޑަރު ގާސިމް އިބްރާހިމާ ހަވާލު ކުރައްވާފައެވެ.
މާވަށު ދާއިރާގެ މެމްބަރު އަޒްހާން ފަހުމީ ވެސް ވަނީ ޖޭޕީއަށް ސޮއި ކުރެއްވުމަށްފަހު، އޭނާގެ މެމްބާޝިފް ފޯމު ވެސް ގާސިމާ ހަވާލު ކުރައްވާފައެވެ. އަޒްހާން ފަހުމީ ޕީޕީއެމްގެ ޓިކެޓުގައި މަޖިލީހަށް ވާދަ ކުރައްވައި، އެ ދާއިރާގެ ގޮނޑި 2014 ވަނަ އަހަރު ކާމިޔާބު ކުރެއްވީ 53 ޕަސެންޓުންނެވެ.
މަޖިލިސް އިންތިހާބު ކައިރިވެފައި ވަނިކޮށް، ރައްޔިތުންގެ މަޖިލީހުގެ ފަސް މެމްބަރަކު ވަނީ ޖެޕީއަށް ސޮއި ކުރައްވާފައެވެ. އެ މެމްބަރުންނަކީ ބިލެއްދޫ ދާއިރާގެ މެމްބަރު އަހުމަދު މުބީނާއި އިސްދޫ ދާއިރާގެ މެމްބަރު އަހުމަދު ރަޝީދާއި ދަނގެތި ދާއިރާގެ މެމްބަރު އިލްހާމް އަހުމަދާއި ހަނިމާދޫ ދާއިރާގެ މެމްބަރު ހުސައިން ޝަހުދީ އާއި ނޮޅިވަރަމް ދާއިރާގެ މެމްބަރު ހުސައިން އަރީފެވެ.
ޖޭޕީ ޕާލަމެންޓްރީ ގްރޫޕުގެ މެމްބަރުންގެ މިހާރު އަދަދަކީ 11 އެވެ.
