އިންޓަރނޭޝަނަލް ކޮމިޓީ އޮފް ދަ ރެޑް ކްރޮސް (އައި.ސީ.އާރު.ސީ)ގެ ވަފުދުގެ ބޭފުޅުން، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ އަރިހަށް އިޙްތިރާމްގެ ޒިޔާރަތެއް ކުރައްވައިފިއެވެ.
މި ބައްދަލުވުން ބާއްވާފައިވަނީ އާދިއްތަ ދުވަހު މެންދުރުފަހު ރައީސުލްޖުމްހޫރިއްޔާގެ އޮފީހުގައި ކަމަށް ރައީސް އޮފީހުން ވަނީ ބުނެފައިއެވެ. މި ބައްދަލުކުރެއްވުމުގައި، އައި.ސީ.އާރު.ސީގެ ވަފްދުގެ ބޭފުޅުން ވަނީ ރިޔާސީ އިންތިހާބުގައި ރައީސް އަށް ލިބިވަޑައިގެންނެވި ކާމިޔާބީ ފާހަގަކުރައްވައި، ހޫނު މަރުޙަބާއެއް ދަންނަވާފައެވެ.
ބައްދަލުވުމުގައި ރައީސް ވަނީ އައި.ސީ.އާރު.ސީގެ ވަފްދުގެ ބޭފުޅުން އެމަނިކުފާނުގެ އަރިހަށް ޒިޔާރަތްކުރެއްވި ކަމަށްޓަކައި ވަފްދުގެ ބޭފުޅުންނަށް ޝުކުރު އަދާކުރައްވާފައެވެ.
ރާއްޖެއާއި އިންޓަރނޭޝަނަލް ކޮމިޓީ އޮފް ދަ ރެޑް ކްރޮސްއާއި ދެމެދު އޮންނަ ގާތް ގުޅުން ފާހަގަ ކުރައްވައި، އެގުޅުން އިތުރަށް ބަދަހިކޮށް ހީނަރުވިޔަ ނުދިނުމުގެ މުހިއްމުކަމާއި ބެހޭގޮތުންވެސް މިބައްދަލު ކުރެއްވުމުގައި ރައީސް ވާހަކަފުޅު ދައްކަވާފައިވާ ކަމށް ރައީސް އޮފީހުން ބުނޭއެވެ. ވަކިން ޚާއްޞަކޮށް އައި.ސީ.އާރު.ސީއިން 2004 ގެ ސުނާމީގައި ރާއްޖެއަށް އެކިގޮތްގޮތުން ފޯރުކޮށްދީފައިވާ ގިނަގުނަ އެހީތައް ފާހަގަކުރައްވައި އެކަމަށްޓަކައި ރައީސް ވަނީ ވަފުދުގެ ބޭފުޅުންނަށް ވަރަށް ބޮޑަށް ޝުކުރު އަދާކުރައްވާފައިވާ ކަމށް ރައީސް އޮފިހުން ބުނޭއެވެ.
މިބައްދަލުކޮށްލެއްވުމުގައި އައި.ސީ.އާރު.ސީގެ ވަފްދުގެ ބޭފުޅުން ވަނީ ކުރިމަގުގައި ދިވެހިރާއްޖެއާއެކީ އެކިރޮނގުތަކުން ކުރިއަށްގެންދަން ބޭނުންފުޅުވާ ޕްރޮގްރާމްތަކާއި އެހީތެރިކަން ފޯރުކޮށްދެވޭނެ ދާއިރާތަކާއި ބެހޭގޮތުންވެސް ވާހަކަފުޅު ދައްކަވާފައިވާ ކަމަށް ރައީސް އޮފީހުން ބުނޭއެވެ.
