ވަލީ އަހުދު ބަދަލުކުރަން އުޅޭ ވާހަކަތައް ސައުދީން ދޮގުކޮށްފި
25 ނޮވެމްބަރު 2018 | އާދީއްތަ 04:19ޚަޝޯގީ މަރާލުމުގައި ވަލީ އަހުދުގެ އަތެއްވާ ކަމަށް ތުހުމަތު ކުރޭ
ވަލީ އަހުދު މުހައްމަދު ބިން ސަލްމާން
ސައުދީގެ ވަލީ އަހުދު މުހައްމަދު ބިން ސަލްމާން މަގާމުން ދުރުކުރަން އުޅޭ ކަމަށް ދެކެވޭ ވާޙަކަތައް އެގައުމުން ދޮގުކޮށްފިއެވެ.
ވަލީއަހުދު މަގާމުން ދުރުކުރަން އުޅޭ ވާހަކަތައް ގަދަވެފައި ވަނީ މިދިޔަ މަހުގެ 2 ވަނަ ދުވަހު ތުރުކީގައި ހުންނަ ސައުދީ ކޮންސިއުލޭޓަށް ވަތްތަނާ މަރާލާފައިވާ ނޫސްވެރިޔާ ޖަމާލް ޚަޝޯގީ މަރާލުމުގައި އެމަނިކުފާނުގެ އަތެއްވާކަމަށް ތުހުމަތު ކުރެވިފައިވާ ދަނޑިވަޅެއްގައެވެ.
އެ މައްސަލައާއި ގުޅިގެން ސައުދީގެ ފޮރިން މިނިސްޓަރ އާދިލް އަލް-ޒުބައިރު ދެއްވި އިންޓަވިއުއެއްގައި ވިދާޅުވެފައިވަނީ ޚަޝޯގީ މަރާލުމުގައި ވަލީ އަހުދު މުހައްމަދު ބިން ސަލްމާންގެ އަތެއް ނުވާ ކަމަށެވެ. ޚަޝޯގީ މަރާލުމުގައި ވަލީއަހުދުގެ އަތެއް ނުވާ ކަމަށް ސައުދީގެ ފޮރިން މިނިސްޓަރ މީގެ ކުރިން ވެސް ވިދާޅުވިއެވެ. ފޮރިން މިނިސްޓަރ ވިދާޅުވީ ވަލީއަހުދާއި ސައުދީގެ ޝާހީ އާއިލާއަށް ކުޑައިމީސްކޮށް ދައްކާ ވާހަކަތަކަށް މަޑުން ނޯވެވޭނެ ކަމަށާއި އެކަމެއް ބަލައެއް ނުގަނެވޭނެ ކަމަށެވެ.
އަޑުތައް ފެތުރިފައިވާ ގޮތުގައި ވަލީއަހުދު މުހައްމަދު ބިން ސަލްމާންގެ ބަދަލުގައި އެމަގާމަށް ގެންނަން އުޅެނީ ސައުދީ ރަސްގެފާނު ސަލްމާން ބިން އަބްދުލް އަޒީޒުގެ ކޮއްކޯފުޅު އަދި އިންޓީރިއާ މިނިސްޓަރ އަހުމަދު ބިން އަބްދުލް އަޒީޒެވެ. އަދި އެއީ ޝާހީ އާއިލާގެ ގިނަ މެމްބަރުން ވެސް ބޭނުންވެލައްވާ ގޮތެވެ. އެހެން ނަމަވެސް ވަލީއަހުދު މުހައްމަދު އެމަގާމުން ދުރުވުމަކީ ވަރަށް ދުރު ކަމެއް ކަމަށް ގިނަ ބަޔަކު ގަބޫލުކުރެއެވެ.
ޚަޝޯގީ މަރާލަން އަމުރު ކުރެއްވީ ވަލީއަހުދު މުހައްމަދު ބިން ސަލްމާން ކަމަށް އެމެރިކާގެ ސެންޓްރަލް އިންޓެލިޖެންސް އޭޖެންސީ (ސީއައިއޭ) އަށް ގަބޫލުކުރެވޭ ކަމުގައި އެ އިދާރާއިން ވަނީ ބުނެފައެވެ. އެހެން ނަމަވެސް ސައުދީން އެކަން ދޮގުކުރެއެވެ. ސައުދީގެ ޑެޕިއުޓީ ޕްރޮސެކިއުޓަރު ޝަލާން ބިން ރަަޖީހް ޝަލާން ނޫސްވެރިންނާ ބައްދަލުކޮށް ވިދާޅުވީ ޚަޝޯގީ މަރާލަން އެންގީ އެގައުމުގެ ޑެޕިއުޓީ އިންޓަލިޖެންސް ޗީފް، ޖެނެރަލް އަސީރީ ކަމަށެވެ. އަދި އެކަމާއި ވަލީ އަހުދު މުހައްމަދު ބިން ސަލްމާނާއި އެއްވެސް ގުޅުމެއް ނެތް ކަމަށް އޭނާ ވިދާޅުވިއެވެ.
