ރަޝިއާއަކީ އައިސިސްއަށް ވުރެން ބޮޑު ނުރައްކަލެއް: ޖެނެރަލް މާކް
25 ނޮވެމްބަރު 2018 | އާދީއްތަ 05:53މަގާމަށް ހޮވުނު ފަހުން މީޑީއާއަށް ދެއްވި ފުރަތަމަ އިންޓަވިއު
އިނގިރޭސިވިލާތުގެ ސިފައިންގެ ވެރިޔާ ޖެނެރަލް މާކް ކާލްޓަން-ސްމިތް
އިނގިރޭސިވިލާތުގެ ގައުމީ ސަލާމަތަށް މި ވަގުތު ހުރި އެންމެ ބޮޑު ނުރައްކަލަކީ އައިސިސްއެއް ނޫން ކަމަށާއި، އެއީ ރަޝިއާ ކަމަށް އެ ގައުމުގެ ސިފައިންގެ ވެރިޔާ، ޖެނެރަލް މާކް ކާލްޓަން-ސްމިތް ވިދާޅުވެއްޖެއެވެ.
ސިފައިންގެ ވެރިޔަކަށް ހޮވުނު ފަހުން މީޑީއާއަށް ދެއްވި ފުރަތަމަ އިންޓަވިއުގަ ޖެނެރަލް މާކް ވިދާޅުވީ ރަޝިއާއިން ދަނީ ހުޅަނގުގެ ގައުމުތަކުގެ ބަލިފައިތައް ހޯދާ، އޭގެ ފައިދާ ނަގަމުން ކަމަށެވެ. ހާއްސަކޮށް ސައިބަރސްޕޭސް އާއި ކަނޑުއަޑީގެ ހަނގުރާމައިގެ ވަސީލަތްތަކުގެ ދާއިރާތައް އޭނާ ވަނީ ފާހަގަކޮށްފައެވެ.
އިނގިރޭސިވިލާތުން ވަނީ މި އަހަރު ކުރީކޮޅު އެ ގައުމުގައި ދިރިއުޅެމުން ދިޔަ ރަޝިއާގެ ކުރީގެ ޖާސޫސަކާއި އޭނާގެ އަންހެން ދަރިފުޅަށް ވިހަދިން ކަމުގެ އިލްޒާމް ރަޝިއާގެ ބޮލުގަ އަޅުވާފައެވެ. އަދި މި އަހަރު ދިން ހަތަރު ސައިބަރ ހަމަލާއެއްގެ ތުހުމަތު ވެސް ވަނީ ރަޝިއާއަށް ކޮށްފައެވެ.
ރަޝިއާ އިން އެ ދެ ތުހުމަތުގެ ރައްދުގައި ބުނެފައި ވަނީ އެއީ އެއްވެސް ސާބިތުކަމެއް ނެތި ދައްކާ ވާހަކަތަކެއް ކަމަށެވެ. އަދި ސައިބަރ ހަމަލާތަކުގެ ރައްދުގައި ބުނެފައި ވަނީ އެއީ އިނގިރޭސިވިލާތުގެ ހިޔާލީ ފޮލާއެއްގެ ގޮތުގަ ސިފަކޮށްފައެވެ.
