ކޯލިޝަން އެއްބަސްވުމުގައި ރައީސް މައުމޫން އަދިވެސް ސޮއި ނުކުރައްވާ

ކޯލިޝަން ރޫޅޭނެ ގޮތްތަކާއި ރޫޅިއްޖެ ހާލަތެއްގައި ސަރުކާރު ދެމިއޮތުމާ ގުޅޭ ގޮތުން ލީޑަރުން އެއްބަސްވެފައިވާ ކަންތައްތައް ހިމެނޭ ކޯލިޝަންގެ އެއްބަސްވުމުގައި ރައީސް މައުމޫން އަދިވެސް ސޮއި ނުކުރައްވައެވެ.

އެއް ޕާޓީއަށް ވުރެ ގިނަ ޕާޓީ ހިމެނޭ ގޮތަށް އުފައްދާފައިވާ އެއްބައިވަންތަކަމުގެ ސަރުކާރު، ވެރިކަމަށް ގެނައުމާ ގުޅޭ އެއްބަސްވުމުގައި ރައީސް މައުމޫން ފިޔަވައި، އިދިކޮޅު ތިން ލީޑަރުން ވަނީ ސޮއި ކުރައްވާފައެވެ. އެގޮތުން ކުރީގެ ރައީސް މުހައްމަދު ނަޝީދާއި ޖުމްހޫރީ ޕާޓީގެ ލީޑަރު ގާސިމް އިބްރާހިމާއި އަދާލަތު ޕާޓީގެ ރައީސް ޝެއިހް އިމްރާން އަބްދުﷲ ވަނީ ރައީސް ސޯލިހު ހުވާ ކުރެއްވުމުގެ ކުރިން، އެއްބަސްވުމުގައި ސޮއި ކުރައްވާފައެވެ.

ރައީސް މައުމޫން ޖަލުން މިނިވަންވިތާ ދޮޅު މަސް ދުވަސް ފާއިތުވެގެންދިޔަ އިރުވެސް ކޯލިޝަން އެއްބަސްވުމުގައި އެމަނިކުފާނު ސޮއި ނުކުރައްވާ ސަބަބެއް ހާމަކޮށްފައެއް ނުވެއެވެ.

އެމަނިކުފާނުގެ އަރިސް ބޭފުޅަކު ކުރިން ވިދާޅުވެފައި ވަނީ، ކޯލިޝަން އެއްބަސްވުމުގައި ރައީސް މައުމޫނަށް ސޮއި ނުކުރެވުނީ އެމަނިކުފާނު ޖަލުގައި ހުންނެވުމުން ކަމަށެވެ.

ގުޅިފައިވާ ޕާޓީތަކުގެ މެނިފެސްޓޯގައި ބުނެފައި ވަނީ ކޯލިޝަން ރޫޅޭނެ ގޮތްތަކާއި ރޫޅިއްޖެ ހާލަތެއްގައި ސަރުކާރު ދެމި އޮތުމާއި ނެތުން އަދި ކޯލިޝަން ދިމާވާ އެހެނިހެން މައްސަލަތައް ހައްލު ކުރާނެ ގޮތްތައް ބަޔާން ކުރާ އެއްބަސްވުމެއްގައި ހަތަރު ލީޑަރުން ސޮއި ކުރައްވާނެ ކަމަށެވެ. އަދި ރައްޔިތުންގެ މަޖިލީހުގެ އަޣުލަބިއްޔަތު ކޯލިޝަންގެ ސަރުކާރަށް ލިބޭތާ 30 ދުވަހުގެ ތެރޭގައި އެ އެއްބަސްވުން މަޖިލީހަށް ހުށަހަޅައި ފާސްކުރަން ޖެހޭނެ ކަމަށް ގުޅިފައިވާ ޕާޓީތަކުގެ މެނިފެސްޓޯގައި ބުނެފައިވެއެވެ.

ގޮނޑި ގެއްލިފައިވާ ކަމަށް ބުނާ 12 މެމްބަރުންގެ ގޮނޑި ނުގެއްލޭ ކަމަށް ސުޕްރީމް ކޯޓުން ކަނޑައެޅުމާއެކު މަޖިލީހުގެ އަޣުލަބިއްޔަތު ގުޅިފައިވާ ޕާޓީތަކަށް ވަނީ ލިބިފައެވެ. މަޖިލީހުގެ އަޣުލަބިއްޔަތު ގުޅިފައިވާ ޕާޓީތަކަށް ލިބުނީ މިދިޔަ މަހުގެ 29ގައެވެ. ސަރުކާރު ހިންގާ ކޯލިޝަނަށް މަޖިލީހުގެ މެޖޯރިޓީ ލިބިފައިވާތާ 26 ދުވަސްވީއިރު، ގުޅިފައިވާ ޕާޓީތަކުގެ މެނިފެސްޓޯގައި ބުނެފައިވާ އެއްބަސްވުން މަޖިލީހަށް ހުށަހަޅާފަ އެއް ނުވެއެވެ.

ރައީސް ސޯލިހު ވެރިކަމަށް ވަޑައިގަތުމުގެ ކުރިން ވައުދުވެ ވަޑައިގެންފައި ވަނީ ކޯލިޝަން ސަރުކާރަށް ގާނޫނީ ހައިސިއްޔަތު ދޭނެ ކަމަށާއި އެކަން ކުރުމަށް ގާނޫނުއަސާސީ އިސްލާހު ކުރަން ހުށަހަޅުއްވާނެ ކަމަށެވެ. ގާނޫނުއަސާސީ އިސްލާހު ކުރެވޭ ވަރަށް މަޖިލީހުގެ މެޖޯރިޓީ ގުޅިފައިވާ ޕާޓީތަކަށް ލިބެންދެން، ގާނޫނަކުން ކޯލިޝަން ގާނޫނީ ބާރު ދެއްވާނެ ކަމަށް ރައީސް ސޯލިހު ވައުދުވެ ވަޑައިގެންފައި ވެއެވެ.