ތަރައްގީގެ މާސްޓަރ ޕްލޭން ހެދުމަށްފަހު ސަޕްލިމެންޓްރީ ބަޖެޓް ހުށަހަޅަން ވިސްނަނީ
ސަޕްލިމެންޓްރީ ބަޖެޓެއް ހުށަހަޅަން ހަ މަސް ހޭދަވާނެ
ފިނޭންސް މިނިސްޓަރ އިބްރާހިމް އަމީރު
ގައުމީ ތަރައްގީގެ މާސްޓަރ ޕްލޭނެއް ހެދުގެ މަސައްކަތް ކުރައްވަމުން ގެންދަވާ ކަމަށާއި އެ ޕްލޭން ހެދުމަށްފަހު ސަޕްލިމެންޓްރީ ބަޖެޓެއް މަޖިލީހަށް ހުށަހަޅުއްވާނެ ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
ބުރާސްފަތި ދުވަހު އޮތް ބަޖެޓް ކޮމިޓީގައި ވާހަކަދައްކަވަމުން ފިނޭންސް މިނިސްޓަރ ވިދާޅުވީ ކޮންމެ ރަށަކަށް ވަކިން މުޅި ރާއްޖެ ހިމެނޭ ގޮތަށް "ނޭޝަން ވައިޑް އިންފްރާސްޓްރަކްޗަރ ޕްރޮއޮރިޓީ" ލިސްޓެއް ހެދުމުގެ މަސައްކަތް ކުރައްވަމުން އަންނަ ކަމަށެވެ.
އަމީރު ވިދާޅުވީ ގައުމީ ތަރައްގީގެ މާސްޓާރ ޕްލޭން ހަދައި ނިމުމުން، އެ އާއިއެކު 2019 ވަނަ އަހަރުގެ ތެރޭގައި ސަޕްލިމެންޓްރީ ބަޖެޓެއް ހުށަހެޅުއްވުމަށް ވިސްނަވަމުންދާ ކަމަށެވެ. ގައުމީ ތަރައްގީގެ މާސްޓަރ ޕްލޭނާ އެކު ސަޕްލިމެންޓްރީ ބަޖެޓެއް އެކުލަވާލައި މަޖިލީހަށް ހުށަހަޅަން ހަ މަސް ދުވަސް ނަގާނެ ކަމަށް މިނިސްޓަރ ވިދާޅުވިއެވެ.
"އިންފްރާސްޓްރަކްޗަރ ޕްރޮއޮރިޓީ ލިސްޓަކާ އެކު ނޭޝަނަލް ޑިވެލޮޕްމަންޓް މާސްޓަރ ޕްލޭނެއް ހެދުމަށް މަސައްކަތް ކުރަމުން މި ދަނީ. އެ ހެދުނީމަ އެބަ ވިސްނަން 2019 ވަނަ އަހަރު ސަޕްލިމެންޓްރީ ބަޖެޓެއް ހުށަހެޅުމަށް," އަމީރު ވިދާޅުވިއެވެ.
ގައުމީ ތަރައްގީގެ ޕްލޭނާ އެކު ސަޕްލިމެންޓްރީ ބަޖެޓް ހުށަހެޅުއްވުމުގެ މައިގަނޑު ބޭނުމަކީ ސަރުކާރުން ރައްޔިތުންނަށް ވީ ވައުދުތަށް އޭގެ އެންމެ ރަނގަޅު ގޮތުގައި (ބަޖެޓަށް ރިފްލެކްޓް) ނުވާނެ ގަޮތަށް ވިސްނުންތެރިކަމާއެކު ބަޖެޓްއިން ކުރާނެ ހޭދަތަށް ކަނޑައެޅުން ކަމަށް މިނިސްޓަރ ވިދާޅުވިއެވެ.
އަންނަ އަހަރަށް ލަފާކޮށް ބަޖެޓް ކޮމިޓީން ފާސްކޮށްފައި ވަނީ 30.2 ބިލިޔަން ރުފިޔާގެ ބޮޑު ބަޖެޓެކެއެވެ. އަންނަ އަހަރަށް ލަފާކޮށް، ރައްޔިތުންގެ މަޖިލީހަށް އެންމެ ފުރަތަމަ ހުށަހެޅީ 29.6 ބިލިއަން ރުފިޔާގެ ބަޖެޓެކެވެ. ކޮމެޓީން ގެނައި ބަދަލުތަކާ އެކު، ބަޖެޓަށް އިތުރުވެފައި ވަނީ 600 މިލިއަން ރުފިޔާއެވެ.
އާމްދަނީގެ ގޮތުގައި އަންނަ އަހަރު ލިބޭނެ ކަމަށް ލަފާކޮށްފައި ވަނީ 23.3 ބިލިއަން ރުފިޔާއެވެ
