މާސްޓަރ އޮފް ސީޒަނިން މުބާރާތުގެ އެއްވަނައާ އެކު ޝެފް ފަތީން އެނބުރި ރާއްޖެއަށް!
މުބާރާތް އޮތީ ދުބާއީގައި
ޝެފް ފަތީން، މާސްޓަރ އޮފް ސީޒަނިން މުބާރާތު ޓްރޮފީއާ އެކު ވެލާނާ އިންޓަރނޭޝަނަލް އެއާޕޯޓްގައި
ޔުނިލީވަރ ފުޑް ސޮލިއުޝަންސްއިން އިންތިޒާމްކޮށްގެން ދުބާއީގައި ކުރިއަށްގެންދިޔަ ނޯރ މާސްޓަރ އޮފް ސީޒަނިންގ ކެއްކުމުގެ މުބާރާތުގެ އެއްވަނަ ކާމިޔާބުކުރި ދިވެހި ޝެފް، އަޙުމަދު ފަތީން އެންބުރި ރާއްޖެ އަތުވެއްޖެއެވެ.
މި ސެޕްޓެމްބަރ މަހުގެ 17 އިން 21 އަށް ކުރިއަށްދިޔަ މުބާރާތް ކާމިޔާބުކޮށް، ހުކުރުދުވަހު ޝެފް ފަތީން ރާއްޖެއައުމުން، ޔުނިލީވަރ ފުޑް ސޮލިއުޝަންސްގެ ނޯރ ބްރޭންޑްގެ ރާއްޖޭގެ ޑިސްޓްރިބިއުޓަރ، ބެސްޓް ބައި މޯލްޑިވްސް އިން ވަނީ އޭނާއަށް ހޫނު މަރުޙަބާއެއް ކިޔާފައެވެ.
ޝެފް ފަތީން މި މުބާރާތް ކާމިޔާބުކޮށް، ރާއްޖެއަށް ފަޚުރުވެރި އެއްވަނަ ގެނެސްދީފައި ވަނީ، މުބާރާތުގެ ފައިނަލްގައި ސައުދީ އަރަބިއާ، އެކުވެރި އަރަބި އިމާރާތް، ޕާކިސްތާން، ސްރީ ލަންކާ، އަދި މިސްރުގެ އެންމެ މަތީ ފެންވަރުގެ ޝެފުންނާއި ވާދަކޮށްގެންނެވެ.
މި މުބާރާތުގައި ޝެފް ފަތީން ވާދަކޮށްފައިވަނީ ގަލްފު ސަރަޙައްދުން ޝެފް ޔާސީން ނޮކިލާ އަދި ޝެފް ނާހަރް އަލް ސޫބް އާއި، މިޞްރުގެ ޝެފް މުޙައްމަދު މުޚްތާރާއި، ޝެފް އަޙުމަދު އިމާދު އަދި ޕާކިސްތާނުގެ ދެ ޝެފުން ކަމުގައިވާ ޝެފް ކާޝިފް ޖާވިދް އާއި، ޝެފް ޒަރްޔާން ތުރާބްގެ އިތުރުން، ސްރީ ލަންކާގެ ޝެފް ޗަމަރަ ރައްޗިގޮޑާއާ އެވެ. މީގެ ތެރެއިން ގިނަ ޝެފުންނަކީ އެގްޒެކެޓިވް ފެންވަރުގެ ޝެފުންނެވެ.
މުބާރާތުގެ އެއްވަނައާ އެކު ރާއްޖެ އައިސް ޝެފް ފަތީން ބުނީ، ކެއްކުމުގެ ދާއިރާއިން ރާއްޖެއަށް ރަންވަނައެއް ހޯދައިދިނުމަކީ ދެކެމުން އައި ހުވަފެނެއް ކަމަށާއި، މިއަދު އެ ހުވަފެން ހަޤީޤަތަކަށް ހެދިއްޖެ ކަމަށެވެ. ޝެފް ފަތީން ބުނީ މުބާރާތުގައި ކެއްކުމަށް ބޭނުންކުރަން ލިބެނީ ކޮންކޮން ތަކެއްޗެއްކަން ނޭނގި ކައްކަން ދާން ޖެހުމުންނާއި މުބާރާތުގައި ވާދަކުރަންޖެހުނީ އެކި ޤައުމުތަކުގެ އެންމެ މަތީ ފެންވަރުގެ ޝެފުންނާއި ކަމުން ކޮންމެވެސް ވަރަކަށް ޖެހިލުންވި ކަމަށެވެ. ނަމަވެސް ދަސްވެފައި ހުރި ވަރަކުން އެންމެ ފެންވަރު ރަނގަޅުކޮށް ކެއްކޭތޯ މަސައްކަތް ކުރީ ކަމަށް ޝެފް ފަތީން ބުންޏެވެ.
މި މުބާރާތުގެ ފައިނަލްގައި ޝެފް ފަތީން ވަނީ ތިން ބާވަތެއްގެ ކެއުން ތައްޔާރުކޮށްފައެވެ. އެގޮތުން އާންމުކޮށް ނުފެންނަ ވައްތަރެއްގެ ތަފާތު ސޭންޑްވިޗަކާއި، ހޮޓް އެޕަޓައިޒަރއެއްގެ އިތުރުން، މެއިން ކޯސްއެއް ވެސް އޭނާ ވަނީ ތައްޔާރުކޮށްފައެވެ. ޝެފް ފަތީން ބުނިގޮތުގައި މެއިން ކޯސްއެއްގެ ގޮތުގައި އޭނާ ތައްޔާރުކުރި ސޫވީޑް ބީފް އިން ވައިލްޑް މަޝްރޫމް ޕިއުރޭ ވިތު އޭނާ ޕޮޓޭޓޯއެވެ. ސޫވީ ކުރުމަކީ ކެއްކުމުގައި ފަހަކަށް އައިސް ބޭނުންކުރަން ފަށާފައިވާ އާ ގޮތެކެވެ.
ކެއްކުމުގެ ދާއިރާގައި 13 އަހަރު ހޭދަކޮށްފައިވާ، އުމުރުން 35 އަހަރުގެ ޝެފް ފަތީން ވަނީ އޭނާގެ ކެރިއަރުގައި ރާއްޖޭގެ ބައެއް ރިސޯޓްތަކުގެ އިތުރުން ކެނެޑާގައި ވެސް މަސައްކަތްކޮށްފައެވެ. މި މުއްދަތުގައި އޭނާ ވަނީ ފާހަގަކޮށްލެވޭ ފަދަ ފަޚުރުވެރި ވަނަތަކެއް ވެސް ހޯދާފައެވެ. އެގޮތުން ހޮޓެލް އޭޝިއާ ކަލިނަރީ ކުކިންގ އެގްޒިބިޝަންގައި ތިން ފަހަރެއްގެ މަތިން އެންމެ މޮޅު ދިވެހި ޝެފުގެ މަޤާމް ހާސިލްކޮށްފައިވާއިރު، ހޮންގކޮންގގައި ބޭއްވި މުބާރާތަކުން ދެވަނަ އަދި ޗައިނާގައި ބޭއްވި ގްރޫޕް މުބާރާތަކުން ރާއްޖެ ތަމްޞީލުކުރި ހަތަރު ޝެފުންގެ ތެރޭގައި ހިމެނި، ރާއްޖެއަށް ތިން ވަނަ ހޯދައިދީފައިވެއެވެ. މީގެ އިތުރުން ވެސް ކެއްކުމުގެ މުބާރާތްތަކުގައި ޝެފް ފަތީން ވަނީ ވަކިވަކި ކެޓަގަރީތަކުން ވަނަތައް ހޯދާފައެވެ.
ޝެފް ފަތީން މި މުބާރާތުގައި ބައިވެރިކުރުމުގައި މެދުވެރިއެއްގެ ގޮތުގައި ހަރަކާތްތެރިވި، ޔުނިލީވަރ ފުޑް ސޮލިއުޝަންސްގެ ނޯރ ބްރޭންޑްގެ ރާއްޖޭގެ ޑިސްޓްރިބިއުޓަރ، ބެސްޓް ބައި މޯލްޑިވްސްގެ މާކެޓިންގ މެނޭޖަރ، އަލީ އަފްރާޙް ހަސަން ވިދާޅުވީ، މި މުބާރާތަށް ޝެފް ފަތީން ބައިވެރިކުރީ މި މުބާރާތުގައި ރާއްޖެއިން ބައިވެރިވި 100 ޝެފުންގެ ތެރެއިން ޔުނިލީވަރއިން ޝޯޓްލިސްޓްކުރި 10 ޝެފުންގެ ތެރެއިން އެންމެ ގިނަ ވޯޓު ޝެފް ފަތީނަށް ލިބުމުން ކަމަށެވެ. މި މުބާރާތަށް ޝެފުން ހޮވުމުގައި ބަލާފައި ވަނީ ނޯރ ބްރޭންޑްގެ ސީޒަނިން ބޭނުންކޮށްގެން ޝެފުން ތައްޔާރުކުރި ރެސިޕީތަކުގެ ފެންވަރަށެވެ.
ބައިނަލްއަޤުވާމީ ފެންވަރުގެ ކެއްކުމުގެ އެކި މުބާރާތްތަކުގައި ބެސްޓް ބައި މޯލްޑިވްސްއިން ދިވެހި ޝެފުން ބައިވެރިކޮށް، އެ ޝެފުން ރާއްޖެއަށް ރީތި ނަން ހޯދައިދެމުންދާއިރު، އަފްރާޙް އިތުރަށް ވިދާޅުވީ، ދިވެހި ޝެފުންނަށް އެފަދަ ފުރުޞަތުތައް ހޯދައިދީ، ރައްޖޭގެ ކަލިނަރީ އިންޑަސްޓްރީ ކުރިއެރުވުމަކީ އެ ކުންފުނީގެ މައިގަނޑު އެއް އަމާޒު ކަމަށެވެ.
ނޯރ މާސްޓަރ އޮފް ސީޒަނިންގ ކެއްކުމުގެ މުބާރާތް ކާމިޔާބު ކުރުމުން، ފައިސާގެ އިނާމެއް ދިނުމުގެ އިތުރުން ޔުނިލީވަރ ފުޑް ސޮލިއުޝަންސްއިން ކުރިއަށް އޮތް ތަނުގައި އެ ކުންފުނީގެ އެކި ހަރަކާތްތަކުގައި ޝެފް ފަތީން ޕްރޮމޯޓް ކުރާނެއެވެ.
