ކޮރަޕްޝަން ނައްތާލައި، ކޮރަޕްޝަނަށް ހުޅުވިފައި ހުރި ދޮރުތައް ބަންދުކުރުމަކީ ރައީސް އިބްރާހިމް މުހައްމަދު ސޯލިޙްގެ އެންމެ ބޮޑު އެއް ވައުދެވެ. ރައީސް ޔާމީންގެ ވެރިކަން ބަދަލުކޮށްލަން ދިވެހިންގެ ގިނަ ބަޔަކު ނިކުންނަން ޖެހުނު ސަބަބަކީވެސް ސަރުކާރުގެ ނަޒާހަތްތެރިކަން ގެއްލި، މުޅި ސަރުކާރު ކޮރަޕްޝަންގެ ހާއްޔަކަށް ވުމެވެ. ކޮރަޕްޝަންގެ ތެރެއަށް އެތައް ބިލިއަން ދިވެހި ރުފިޔާއެއް ގެއްލިގެން ދިޔައިރު، އެ ފައިސާއަކީ ބިކަ ޙާލުގައި އުޅެމުންދާ ދިވެހި ނިކަމެތި ރައްޔިތުންނަށް އެތައް ޚިދުމަތެއް ދެވޭނެ ފައިސާއެވެ. އެއީ އެތައް ދިވެހި ދަރިންނެއްގެ ބޭސްފަރުވާއަށްވާ ފައިސާއެވެ. އެއީ އެތައް ދިވެހި ދަރިންނަކަށް ތައުލީމު ހާސިލްކޮށްދެވޭނެ ފައިސާއެވެ. އެއީ އެތައް ދިވެހި ދަރިންނެއްގެ ބޯހިޔާވަހިކަން ޔަޤީން ކުރެވޭނެ ފައިސާއެވެ.
ކޮރަޕްޝަނުން ދުރުހެލިވެ، ނަޒާހަތްތެރިވުމަށް ކެބިނެޓް ވަޒީރުންނަށް ރައީސް ސޯލިޙް ވަނީ އަންގަވާފައެވެ. އަދި ކޮރަޕްޝަން ހިންގައި، ނާޖާއިޒް ފައިދާ ނެގުމުގެ ވިސްނުމުގައި އެކަކުވެސް ސަރުކާރު ތެރެއަށް އައުމަށް މަސައްކަތް ނުކުރުމަށް އެމަނިކުފާނުގެ ޗީފް އޮފް ސްޓާފް އަދި އަދާލަތު ޕާޓީގެ ނައިބު ރައީސް އަލީ ޒާހިރު ވަނީ އިންޒާރު ދެއްވާފައެވެ. އެހެންކަމުން ސަރުކާރުގެ ނިޔަތް ރަނގަޅުކަން މިއިން ހާމަވެއެވެ. އެހެންނަމަވެސް ކޮރަޕްޝަނާއި ދުރު ސަރުކާރެއް ޤާއިމް ކުރެވޭނީ، ކޮރަޕްޓް މީހުންނާއިމެދު ސަރުކާރުން ގެންގުޅޭ އުޞޫލުތައް ހަރުދަނާކޮށްގެންނެވެ.
ސަރުކާރުގެ އެކިއެކި ކުންފުނިތަކުގައި ތިބެގެން ރައްޔިތުންގެ ފައިސާއަށް ޚިޔާނާތްތެރިވި އެތައް ބަޔަކު އެބަތިއްބެވެ. އެމީހުންގެ މައްސަލަތައް ތަހުޤީޤުކުރުމަށް ރައީސް ސޯލިޙް އެވަނީ ޚާއްސަ ކޮމިޝަނެއް އެކުލަވާލައްވާފައެވެ. އެކޮމިޝަންގެ މަސައްކަތްތައް ކުރިއަށްދާއިރު ގިނަ ބައެއްގެ މައްސަލަތައް ފެންމަތިވަމުންދާނެކަމަށް ބެލެވެއެވެ.
ކޮރަޕްޝަންގެ މައްސަލަތަކެއް ސާބިތު ނުވިކަމުގައިިޔަސް، އެފަދަ ކަންކަން ކުންފުނިތަކުގައި ހިނގަމުން ދިޔައިރު މަޤާމުތަކުގައި ތިއްބެގެން އެކަންކަމަށް އިހުމާލުވި ފަރާތްތަކާއިމެދުވެސް ފިޔަވަޅު އެޅެން ޖެހެއެވެ.
މަޤާމުން ވަކިކުރަންދެން ބައެއް ފަރާތްތައް މަޤާމުތަކުގައި ތިބެން މަސައްކަތްކުރިއިރު، މީގެ ތެރެއިން ބޮޑެތި ތުހުމަތުތައް ކުރެވުނު ކުންފުނިތަކުގެ ވެރިންގެ ގޮތުގައި ތިބި ބައެއް ފަރާތްތަކުން މިހާރު މަސައްކަތްކުރަމުން އެދަނީ އައު ސަރުކާރުގެ އިސްވެރިންގެ ރުހުން ހޯދައިގެން މަޤާމު ދިފާޢުކުރުމަށެވެ. ރައީސް ނަޝީދުގެ ބަހުރުވައިންނަމަ "ބޯވަ ހެދިގެން" އުޅޭ މީހުން މަދެއް ނޫނެވެ.
ކޮރަޕްޝަންގެ ބޮޑެތި ތުހުމަތުތައް ކުރެވުނު ބައެއް ފަރާތްތަކުން އަމިއްލަ ވިޔަފާރިތައް މިހާރު ފަށައިގެން އުޅޭއިރު، މީގެ ތެރެއިން ބައެއް ފަރާތްތަކުން އެކުރަނީ ދައުލަތާއި ރައްޔިތުންގެ މަސްލަހަތު މަތީ މިންވަރަކަށް ހިމެނޭ ވިޔަފާރިތަކެވެ. ޓޫރިޒަމް ވިޔަފާރިއަކަސް، އެއަރލައިނަކަސް، މިއީ ރައްޔިތުންގެ މަސްލަހަތު ހިމެނޭ ކަންކަމެވެ. މިދެންނެވި ފަރާތްތަކުން ޚިޔާނަތްތެރިވީ އެމީހުންގެ އަމިއްލަ ފައިސާއަކަށް ނޫނެވެ. ރައްޔިތުންގެ ކުންފުނިތަކުގައި ހުރި ރައްޔިތުންގެ ފައިސާއަށް ޚިޔާނަތްތެރިވި ބަޔަކަށް، ސަރުކާރުން ހުއްދަ ދީގެން ވިޔަފާރިކުރުން ހުއްޓުވޭނެ ނުވަތަ ދުވަސްކޮޅަކަށްނަމަވެސް އެކަން ހުއްޓުވޭނެ ގޮތެއް އޮންނަން ޖެހެއެވެ.
މިހެން ދެންނެވުމުން ބައެއް ފަރާތްތަކުން ބުނާނީ ކުށް ސާބިތުނުވާ ބައެއްގެ މައްޗަށް އެފަދަ ފިޔަވަޅެއް އެޅިގެން ނުވާނެކަމަށެވެ. ކުށެއް ސާބިތުނުވިޔަސް، އެފަރާތްތަކުގެ މައްޗަށް ތުހުމަތު އެކުރެވެނީ ދިވެހި ރައްޔިތުންގެ ފައިސާއަށް ޚިޔާނާތްތެރިވިކަމަށެވެ. ޚިޔާނާތްތެރި ނުވިޔަސް، ޚިޔާނާތް ނުހުއްޓުވުނު އަދި އެކަމަށް އިހުމާލުވުންވެސް އެއީ އެކަމަށް ކޮންމެވެސް އަދަބެއް އޮންނަން ޖެހޭނެކަމެކެވެ.
ކޮރަޕްޝަން ހުއްޓުވަން އައި ސަރުކާރުން ކުރަން ޖެހޭ މަސައްކަތްތައް ގިނައެވެ. މަސައްކަތްތައް ގިނަ ނަމަވެސް މިސަރުކާރަކީ އެކަން ކުރެވޭނެ ސަރުކާރެއްކަން ރައްޔިތުން ޤަބޫލުކުރެއެވެ. ވީމާ ރައްޔިތުންގެ އުއްމީދުތައް ހާސިލްކޮށްދެއްވާށެވެ. ކޮރަޕްޝަން ހުއްޓުވައިދެއްވައި، ރައްޔިތުންގެ ފައިސާއަށް ޚިޔާނާތްތެރިވި ނުވަތަ އިހުމާލުވި ފަރާތްތަކަށް އެކަށީގެންވާ އަދަބު ދެއްވައި، އެފަދަ ފަރާތްތަކަށް ބޭނުންހާ ހުއްދަތަކެއް ނަގައިގެން ރައްޔިތުންގެ މަސްލަހަތު ހިމެނޭ ވިޔަފާރިތައް ކުރުމުގެ ދޮރުތައް ބަންދުކޮށް ދެއްވާށެވެ. މަޤާމުތަކަށް އެކިއެކި ފަރާތްތައް އައްޔަންކުރުމުގައިވެސް ނަޒާޙަތްތެރިންނަށް އިސްކަން ދެއްވާށެވެ.
