ނޮޅިވަރަމް ދާއިރާގެ މެމްބަރު ހުސެއިން އަރީފާއި ކުރީގެ ޑިފެންސް މިނިސްޓަރ އަދި ޗީފް އޮފް ޑިފެންސް ފޯސް ޖެނެރަލް މޫސާ އަލީ ޖަލީލް ޖުމްހޫރީ ޕާޓީއަށް ސޮއިކުރައްވައިފިއެވެ.
މި ދެބޭފުޅުން ސޮއިކުރެއްވީ ބުރާސްފަތި ދުވަހު އެކަމަށްޓަކައި ޖޭޕީ އޮފީހުގައި ބޭއްވި ހާއްސަ ރަސްމިއްޔާތެއްގައެވެ. މިރަސްމިއްޔާތުގައި އެޕާޓީގެ ލީޑަރު ޤާސިމް އިބްރާހިމް ބައިވެރިވަޑައިގެންނެވިއެވެ.
ރަސްމިއްޔާތުގައި ވާހަކަފުޅު ދައްކަވަމުން ޤާސިމް ވިދާޅުވީ ރައްޔިތުންގެ މަޖިލީހުގެ ގިނަ މެމްބަރުންތަކެއް ޕާޓީއާ ގުޅިވަޑައިގަންނަވާތީ އުފާ ކުރައްވާ ކަމަށާއި އަރީފް އާއި މޫސާ އަލީ ޖަލީލްގެ ފަރާތްޕުޅުން ޕާޓީއަށް އިތުރު ކުރިއެރުމެއް ލިބި، ޕާޓީއާއަށް އަގުހުރި ހިދުމަތްތަކެއް ކޮށްދެއްވާނެ ކަމަށް ޔަޤީން ކުރައްވާ ކަމަށެވެ.
ޖޭޕީއަށް ސޮއިކުރެއްވުމަށްފަހު ނޫސްވެރިންނަށް މައުލޫމާތުދެއްވަމުން އަރީފް ވިދާޅުވީ އެބޭފުޅާ ޖޭޕީއާ ގުޅިވަޑައިގަތީ، ރާއްޖޭގައި އޮތް އެއްބައިވަން ސަރުކާރު ދަމަހައްޓަވަން ޤާސިމް ކުރައްވާ މަސައްކަތުގައި އެހީތެރިވެ އެއްބާރުލުން ދެއްވުމަށް ކަމަށެވެ.
އަރީފްގެ އިތުރުން ޖުމްހޫރީ ޕާޓީއަށް ސޮއިކުރެއްވި މުސާ އަލީ ޖަލީލް ވަނީ ޖުމްހޫރީ ޕާޓީއަށާއި އެ ޕާޓީގެ ލީޑަރޝިޕްގެ މެމްބަރުންނަށް ޝުކުރު އަދާކުރައްވާފައެވެ.
މިއަހަރު ބޭއްވި ރިޔާސީ އިންތީޚާބުގައި ރައީސް ޔާމީން ބޮޑުތަނުން ބަލިވުމާއި ގުޅިގެން އެމަނިކުފާނުގެ އަރިހުގައި މަސައްކަތް ކުރެއްވި ގިނަ ބޭފުޅުން އަންނަނީ ޖުމްހޫރީ ޕާޓީއާ ގުޅިވަޑައިގަންނަވަމުންނެވެ.
