މިހާރުގެ ހޯމް މިނިސްޓަރު އިމްރާން އަބްދުﷲގެ މައްޗަށް ޓެރަރިޒަމްގެ ކުށުގައި އިއްވި 12 އަހަރުގެ ޖަލު ހުކުމުގެ އިސްތިއުނާފުގެ މައްސަލަ ސުޕްރީމް ކޯޓުން މިއަދު ނިންމަން ތާވަލުކޮށްފި އެވެ.
އަދާލަތު ޕާޓީގެ ރައީސްގެ މަޤާމުގައި ވެސް ހުންނަވާ އިމްރާނުގެ މައްޗަށް 12 އަހަރު ދުވަހުގެ ހުކުމެއް އިއްވާފައި ވަނީ މެއި 1، 2015 ގައި، ރައީސް ޔާމީންގެ ސަރުކާރާ ދެކޮޅަށް ބޭއްވި "މޭޑޭ މުޒާހަރާ" ގައި ހަމަނުޖެހުމަށް ހިތްވަރު ދެއްވައި ވާހަކަ ދެއްކެވި ކަމަށް ބުނެއެވެ.
އިމްރާނުގެ މައްސަލައިގެ ހުކުމް އިއްވުން ބުރާސްފަތި ދުވަހު ހަވީރު 3:00 އަށް ތާވަލު ކޮށްފައިވާ އިރު، މިމައްސަލައަކީ ކްރިމިނަލް ކޯޓުން އިއްވި ހުކުމަށް ހައި ކޯޓުން ތާއީދު ކުރުމުން އެ މައްސަލަ އިމްރާންގެ ފަރާތުން ކުރިން ސުޕްރީމް ކޯޓަށް ހުށަހަޅާފައިވާ މައްސަލައެކެވެ. އެހެން ނަމަވެސް އޭރު ސުޕްރީމް ކޯޓުން ނިންމީ އެ މައްސަލަ ބަލައިނުގަތުމަށެވެ.
އޭގެ ފަހުން އަނެއްކާ ވެސް އިމްރާންގެ ފަރާތުން އެމައްސަލަ ރިވިއު ކުރުމަށް ސުޕްރީމް ކޯޓަށް ހުށަހެޅުމުން އެ ކޯޓުން ވަނީ އެމައްސަލަ ބަލައިގަނެ، އިމްރާންގެ މައްޗަށް އިއްވި 12 އަހަރުގެ ޖަލު ހުކުމް ތަންފީޒު ކުރުން ފަސްކޮށްފަ އެވެ.
ޖަލު ހުކުމް ރިވިއު ކުރުމަށް ސުޕްރީމް ކޯޓަށް ހުށަހެޅި މައްސަލައިގެ އަޑު އެހުންތައް މިދިޔަ ހޯމަ ދުވަހު ވަނީ ނިންމާލާފައެވެ. އެ ދުވަހުގެ އަޑު އެހުމުގައި އިތުރު ކަމެއް ސާފު ކުރަން ނު ޖެހޭ ނަމަ، ދެން އަންނަ އަޑުއެހުމެއްގައި ހުކުމް އިއްވާނެ ކަމަށް ފަނޑިޔާރުންގެ ބެންޗުން އިއުލާން ކުރި އެވެ.
ކުރީގެ ރައީސް އަބްދުﷲ ޔާމީނާ ދެކޮޅަށް ބޭއްވި އެންމެ ބޮޑު މުޒާހަރާ ކަމަށްވާ މޭ 1 ގެ އެއްވުން ރޭއްވެވުމުގައި އެންމެ އިސްކޮށް އުޅުއްވި އިމްރާނަށް ޓެރަރިޒަމްގެ ދައުވާކޮށް ކްރިމިނަލް ކޯޓުން ހުކުމް އިއްވީ 2015 ގަ އެވެ.
