މިނިސްޓަރަކަށް މިއައީ ސިފައިންނަށް ބަޑި ޖަހާ ގޮތް ކިޔާދޭކަށް ނޫން: ޑިފެންސް މިނިސްޓަރ
21 ނޮވެމްބަރު 2018 | ބުދަ 16:45ސިފައިންގެ މަސައްކަތް އާންމުނަށް ބޮޑަށް ކިޔާދޭން ޖެހޭ
ޑިފެންސް މިނިސްޓަރ ސިފައިންނާއެކު ބޭއްވި ބައްދަލުކުރެއްވުގެ ތެރެއިން -- -ސިފައިން ކޮރަޕްޝަނުގައި ނުޖެހުމަށް އިލްތިމާސް ކުރެއްވި
ޑިފެންސް މިނިސްޓަރު ކަމަށް ވަޑައިގެންނެވީ ސިފައިންނަށް ބަޑި ޖަހާގޮތް ކިޔައިދީ ސިފައިންގެ ސަފުތައް އެތުރެންވީ ގޮތް ވިދާޅުވާން ނޫން ކަމަށް ރާއްޖޭގެ ފުރަތަމަ އަންހެން ޑިފެންސް މިނިސްޓަރ މާރިޔާ އަހްމަދު ދީދީ ވިދާޅުވެއްޖެ އެވެ.
ޑިފެންސް މިނިސްޓަރުކަމާ ހަވާލުވެވަޑައިގެންނެވުމަށްފަހު ފުރަތަމަ ފަހަރަށް ސިފައިންނާ ބައްދަލުކުރެއްވުމަށް ބޭއްވި ރަސްމިޔާތުގައި މާރިޔާ ވިދާޅުވީ މީގެ ކުރިން ސިޔާސީ އެކި ކަންކަމުގައި އުޅުއްވުމަށްފަހު ޕްރޮފެޝަނަލްކޮށް މަސައްކަތްކުރާ ބައެއްގެ މިނިސްޓަރަކަށް އައުމުން ބައެއް ފަރާތްތަކުން ސުވާލު ކުރައްވާ ކަމަށެވެ. ނަމަވެސް އެކަމަނާގެ މައްސޫލިއްޔަތަކީ ސިފައިން ގާނޫނާއެއްގޮތައް ކަންކަން ކުރަމުންދޭތޯ ދުވަހުން ދުވަހަށް ބެލުމަށް ކަމަށް މިނިސްޓަރ މާރިޔާ ވިދާޅުވި އެވެ.
ރައީސުލް ޖުމްހޫރިއްޔާއަކީ ގާނޫނާ އެއްގޮތައް ހުރިހާ ސިފައިން ވެސް މަސައްކަތްކުރާކަން ކަށަވަރުކުރައްވަން ޖެހޭ ފަރާތްކަމަށްވާއިރު މިނިސްޓަރަކީ އެކަންކަން އެގޮތައް ހިނގާތޯބަލައި މަޖިލީހަށް ޖަވާބުދާރީވާން ޖެހޭ ފަރާތްކަމަށް ވެސް މިނިސްޓަރ ފާހަގަ ކުރެއްވި އެވެ. ސިފައިންނާ މުހާތަބު ކުރައްވާ މާރިޔާ ވަނީ ކޮރަޕްޝަން އެކުލެވޭ އެއްވެސް ކަމެއްގައި ސިފައިންގެ އެއްވެސް މީހަކު، އެއްވެސް މިންވަރަކަށް ބައިވެރިނުވުމަށް އިލްތިމާސް ކުރައްވާފައެވެ.
ސިފައިން އަދާކުރަމުންދާ މައްސޫލިއްޔަތާ ގުޅޭ ގޮތުން މީސް މީޑިޔާގައި ފާޑުކިޔާ ފަރާތްތަކާމެދު ހިތްނުރުހުމުގެ ބަދަލުގައި ސިފައިން ކުރަން ޖެހޭ ކަމަކީ އެމީހުންގެ މަސައްކަތް ވީހާވެސް ބޮޑަށް ރައްޔިތުންނަށް ސާފުކޮށްދިނުން ކަމަށް ވެސް މާރިޔާ ވިދާޅުވި އެވެ. އަދި އޭރުން ރައްޔިތުންގެ އިހްތިރާމާއި ލޯބި ފުލުހުންގެ މުވައްސަސާއަށް ވެސް ލިބިގެންދާނެ ކަމަށާއި އެކަން ކުރެވޭނީ ސިފައިންގެ އަމަލުކުރާ ގޮތުގެ މައްޗަށް ކަމަށް ވެސް މާރިޔާ ފާހަގަ ކުރެއްވި އެވެ. ސިފައިންގެ މުވައްސަސާ ކުރިއެރުމަށް ސަރުކާރަށް ކޮށްދެވޭނެ ކަމަކީ ވަސީލަތްތަކާއި އެކަމަށް ބޭނުންވާ ގާނޫނުތައް ހެދުންކަން ވެސް މިނިސްޓަރ ފާހަގަ ކުރެއްވި އެވެ.
މާރިޔާ އަކީ ރާއްޖޭގެ ފުރަތަމަ އަންހެން ޑިފެންސް މިނިސްޓަރެވެ. މި ބައްދަލު ކުރެއްވުމުގައި ޗީފް އޮފް ޑިފެންސް ފޯސް އަހްމަދު ޝިޔާމް ވިދާޅުވީ މިނިސްޓަރ މާރިޔާ މީގެ ކުރިން ހައްދަވާފައިވާ ރެކޯޑްތަކެކޭ އެއްފަދައިން މިނިސްޓަރު ކަމުގައި ހުންނަވައިގެން ރެކޯޑްތަކެއް ހަދާނެ ކަމަށް އުއްމީދު ކުރައްވާ ކަމަށެވެ. އަދި ސިފައިންގެ އައިލާއަށް ޝިޔާމް ވަނީ މާރިޔާއަށް މަރުހަބާ ވިދާޅުވެފައި އެވެ.
