އިންޓަޕޯލްގެ ރައީސްކަމަށް ދެ އަހަރުގެ ދައުރަކަށް ދެކުނު ކޮރެއާގެ ކިމް ޔޮން-ޔެންގް އައްޔަން ކޮށްފިއެވެ.
ދުބާއީގައި ބޭއްވި އެ ޖަމިއްޔާގެ އަހަރީ ޖަލްސާގައި ޔޮން-ޔެންގް ހޮވިފައިވަނީ ރަޝިއާގެ އެލެކްޒެންޑަރ ޕްރޮޕްޗުކްއާއި ވާދަކޮށްގެންނެވެ. ޔޮން-ޔެންގް ވަނީ ދެކުނު ކޮރެއާގެ ފުލުހުންގެ ހިދުމަތުގައި ވިހި އަހަރު ހޭދަކޮށްފައެވެ.
ބައްދަލުވުމުގެ ބައިވެރިންނާއި މުހާތަބުކޮށް ދެއްވި ތަގުރީރުގައި ޔޮން-ޔެންގް ވިދާޅުވީ، ދުނިޔެ މިހާރު ކުރިމަތިލަމުން މިދަނީ ދުވަހަކު ނުދެކޭފަދަ ބަދަލުތަކަކައި ކަމަށާއި އެކަމާ ގުޅިގެން އާންމުންނަށް ރައްކާތެރިކަން ފޯރުކޮށް ދިނުމުގައި އާ ގޮންޖެހުންތަކަކާއި ކުރިމަތި ލާން ޖެހިފައިވާ ކަމަށެވެ. އަދި މިކަންތައްތަކުން އަރައިގަތުމަށް ބޭނުންވަނީ މުސްތަގުބަލާއި ދޭތެރޭ ވިސްނުމަށް ފަހު ހެދޭ ސާފު ސިޔާސަތުތަކެއް ކަމަށްވެސް އެބޭފުޅާ ވަނީ ވިދާޅުވެފައެވެ.
ޔޮން-ޔެންގް ހުރީ ކުރީގެ ރައީސް މެންގް ހޮންވީ އިސްތިއުފާ ދިނުމުން، ވަގުތީ ރައީސްއެއްގެ ގޮތުގައެވެ. ހޮންވީ އިސްތިއުފާ ދެއްވީ ރިޝްވަތު ދިނުމާއި ކޮރަޕްޝަންގެ ތުހުމަތުގައި ޗައިނާއިން ހައްޔަރު ކުރުމާއި ގުޅިގެންނެވެ.
ދިވެހިރާއްޖެއަކީ ވެސް 1984 ވަނަ އަހަރުން ފެށިގެން އިންޓަޕޯލްގެ މެންބަރެކެވެ. މިވަގުތުވެސް ސޯޅާ މީހަކު ހޯދަން ރާއްޖެއިން ވަނީ އިންޓަޕޯލް މެދުވެރިކޮށް "ރެޑް ނޯޓިސް" ނެރެފައެވެ. މީގެ ތެރޭގައި ގިނައިން ހިމެނެނީ އެމްއެމްޕީއާރްސީގެ ހިޔާނާތާއި ގުޅިގެން ހޯދަމުންދާ ބަޔަކާއި ސަލްޓަން ޕާކުގައި ބޮން ގޮއްވި ހާދިސާއާއި ގުޅިގެން ހޯދަމުންދާ މީހުންތަކެކެވެ.
