އަފްޣާނިސްތާނުގެ ވެރިރަށް ކާބުލްގައި ޖާނުންފިދާވެގެން ދިން ހަމަލާގައި 40 މީހަކު މަރުވެ 60 ހަކަށް މީހުން ޒަހަމްވެއްޖެއެވެ.
އެގައުމުގެ ޕަބްލިކް ހެލްތް މިނިސްޓްރީ އާއި ހަވާލާދީ ރިޕޯޓްތައް ބުނާގޮތުގައި މި ހާދިސާ ހިނގާފައިވަނީ ކާބުލް ގައި ކުރިޔަށް ދިޔަ ކީރިތީ ރަސޫލާގެ އީދުމީލަދު ފާހަގަ ކުރަން ތިބިތަނަކަށް ދިން ހަމަލާގައި ކަމަށެވެ. މި ހާދިސާ ހިނގި އިރު އެތާގައި 1000 އެއްހާ މީހުން ތިބިކަމަށް ރިޕޯޓްތައް ބުނޭއެވެ.
މިކަން ކުރި މިހާ ވަނީ ހަފްލާ ކުރިޔަށް ދަނިކޮށް ހޯލް ތެރެއަށް ވަދެ ބޮންގޮއްވާލާފައެވެ. މި ހަމަލާގެ ޒިންމާ މިހާތަނަށް އެއްވެސް ޖަމާއަތަކުން ނަގާފައި ނުވޭއެވެ.
އަފްޣާނިސްތާނުގެ ރައީސް އަޝްރަފް ޣަނީ ވަނީ މިހަމަލާ ހަރުކަށި އިބާރާތުން ކުށްވެރިކޮށްފައި އެވެ.
ފާއިތުވެ ދިޔަ ދުވަސްތަކުގައި ދީނީ އެއްވުންތަކަށް އަމާޒު ކޮށް ޓެރަރިސްޓް ޖަމާއަތެއް ކަމުގައި ބުނާ އައިއެސް އިން ދިން ހަމަލާތަކުގައި ހަތް މީހަކު މަރުވެ 20 މީހަކު ޒަހަމްވެފައިވާ ކަމަށް ރިޕޯޓްތައް ބުނެއެވެ.
ދީނީ އިލްމުވެރިނަށް އަމާޒުކޮށް ހަމަލާތައް އިތުރުވަމުން ދާތީ އަފްޣާންގެ އުލަމާ ކައުންސިލް އިން ވަނީ ސުލްހައިގެ މަޝްވަރާތަކަށް އައުމަށް ޖަމާއަތްތަކަށް ގޮވާލާފައި އެވެ.
