ހަލަބޮލިވެފައިވާ ކެންޔާގައި ރިޔާސީ އިންތިޚާބު އަލުން ބާއްވަން ޖެހި، މިދިޔަ ބުރާސްފަތި ދުވަހު ބޭއްވި އިންތިޚާބުގެ ނަތީޖާ ގާބޫލުނުކުރައްވާނެ ކަމަށް އިދިކޮޅު ކެންޑިޑޭޓް ރައިލާ އޮޑިންގާ ވިދާޅުވެއްޖެއެވެ.  

އިދިކޮޅު ކެންޑިޑޭޓް ރައިލާ އޮޑިންގާ، އަންގާރަ ދުވަހު ރިޕޯޓަރުންނަށް ވިދާޅުވީ ކެންޔާއަށް "ޑިމޮކްރަސީ ގެނައުމަށްޓަކައި" ސިޔާސީ ކޭމްޕޭނެއް ފަށްޓަވާނެ ކަމަށެވެ. 

ކެންޔާގެ އިލެކްޝަން ކޮމިޝަނުން ހާމަކޮށްފައި މިދިޔަ ބުރާސްފަތި ދުވަހު ބޭއްވި އިންތިޚާބު، މިހާރުގެ ރައީސް އުހުރު ކެންޔައްޓާ ކާމިޔާބު ކުރެއްވީ 98 ޕަސެންޓް ވޯޓާއެކުގައި ކަމަށެވެ. އިންތިޚާބުގައި ވޯޓު ލީ  ވޯޓު ލެވޭ އާބާދީގެ 38.8 ޕަސެންޓް މީހުންނެވެ.

ކެންޔާގައި އަލުން ބޭއްވި ރިޔާސީ އިންތިޚާބު އިދިކޮޅު ކެންޑިޑޭޓް ރައިލާ އޮޑިންގާ ވަނީ ބޯއިކޮޓް ކުރައްވާފައެވެ. 

ކެންޔާގެ އިލެކްޝަން ކޮމިޝަނުގެ ޗެއާމަން ވިދާޅުވީ ބުރާސްފަތި ދުވަހު ބޭއްވި އިންތިޚާބަކީ "މިނިވަން އަދި އިންސާފުވެރި އިންތިޚާބެއް" ކަމަށެވެ. 

ހަމަނުޖެހުންތަކާއި އަދި އިދިކޮޅު ފަރާތްތަކުގެ ބޯއިކޮޓް ކުރުމާއެކު ކެންޔާގައި ބުރާސްފަތި ދުވަހު ބޭއްވި އިންތިޚާބުގައި ހަަރަކާތްތެރިވި އިންޓަނޭޝަނަލް އޮބްޒާވަރުންނަށް ވަނީ ސަލާމަތީ ސަބަބުތަކާ ހެދި އެމީހުން ބޭނުވި މިންވަރަށް އިންތިޚާބު އޮބްޒާވް ކުރަން ދަތިތަކާ ކުރިމަތިވެފައެވެ.

ކެންޔާގައި ބުރާސްފަތި ދުވަހު އަލުން ބޭއްވި އެގައުމުގެ ރިޔާސީ އިންތިޅާބު ފަސްކުރުމަށް ސުޕްރީމް ކޯޓަށް ވެސް ހުށަހެޅިއެވެ. އެހެންނަމަވެސް އެ ޕެޓިޝަން ސުޕްރީލް ކޯޓުން ބެލޭގޮތެއް ނުވިއެވެ. ސުޕްރީމް ކޯޓުން ބުނެފައި ވަނީ ރިޔާސީ އިންތިޚާބު ފަސްކުރުމާ ބެހޭ ޕެޓިޝަން އެ ކޯޓަށް ބެލޭގޮތް ނުވީ ފަނޑިޔާރުންގެ ކޯރަމް ހަމަނުވުމާ ގުޅިގެން ކަމަށެވެ. މައްސަަލަ ފައިސަލާ ކުރުމަށް ކޯޓަށް ހާޒިރުވީ ދެ ފަނޑިޔާރުންނެވެ. ކޯރަމް ހަމަވާނީ ފަސް ފަނޑިޔާރުން ތިބިގެންނެވެ.

ކެންޔާގައި  އޯގަސްޓް މަހު ބޭއްވި ރިޔާސީ އިންތިޚާބު އެގައުމުގެ ސުޕްރީމް ކޯޓުން ބާތިލު ކޮށްފައިވާއިރު އެ ނިންމުން ސުޕްރީމް ކޯޓުން ނިންމީ އިންތިޚާބުގައި ނަހަމަ ކަންކަން ހިނގާފައި ވާތީ ކަމަށް ބުނެއެވެ. ސުޕްރީމް ކޯޓުން ބާތިލް ކުރި އިންތިޚާބުގެ ނަތީޖާ ދައްކާ ގޮތުން، އިންތިޚާބު ކާމިޔާބު ކުރެއްވީ ވެސް އެގައުމުގެ ވެރިކަމުގައި ހުންނަވި އުހުރު ކެންޔައްޓާ އެވެ.