އޭޑީކޭ ގްރޫޕް އޮފް ކޮމްޕެނީޒްގެ މުވައްޒަފުންގެ ރިކްރިއޭޝަން ކްލަބް، އޭޑީކޭ ސިނަރޖީއިން އިސްނަގައިގެން އޭޑީކޭ ހޮސްޕިޓަލާއި ގުޅިގެން އދ. ދަނގެތީގައި މެޑިކަލް ކޭމްޕެއް ހިންގަން ނިންމައިފިއެވެ.
ރާއްޖެއެމްވީއަށް މަޢުލޫމާތު ދެއްވަމުން އޭޑީކޭ ސިނަރޖީގެ އޮފިޝަލަކު ވިދާޅުވީ، މި ކޭމްޕް ހިނގުމަށް ހަމަޖެހިފައިވަނީ މި ނޮވެމްބަރު މަހުގެ 23 އަދި 24 ވަނަ ދުވަހު ކަމަށެވެ.
މި ކޭމްޕްގައި އެކި ދާއިރާތަކުން 5 ޑޮކްޓަރަކު ކޮންސަލްޓޭޝަންގެ ޚިދުމަތް ފޯރުކޮށްދޭން ހަމަޖެހިފައިވާއިރު މީގެ ތެރޭގައި ހިމެނެނީ:
- އަންހެނުންގެ ޚާއްސަ ޑޮކްޓަރު، ޑރ. އައިމިނަތު ނުސްރާ
- ކުޑަކުދިންގެ ޚާއްސަ ޑޮކްޓަރު، ޑރ. ޢަބްދުﷲ ނިޔާފް
- އޮންކޮލޮޖިސްޓް، ޑރ. ދަނަރާޖޫ ކްރިޝްނައްޕާ މުނިސުވާމީ
- މެޑިކަލް އޮފިސަރ، ޑރ. އައިޝަތު ހިދާޔާ އެފްރާމް
- ލޮލުގެ ޚާއްސަ ޑޮކްޓަރު، ޑރ. ޢަބްދުﷲ ޖުނައިދު
ސިނަރޖީގެ އޮފިޝަލް ވިދާޅުވީ މި ޑޮކްޓަރުންނަށް ދެއްކުމަށް ނަން ނޯޓު ކުރުމުގެ ފުރުޞަތު މިހާރު ހުޅުވާލާފައިވާ ކަމަށެވެ. މި ކޭމްޕްގައި ޑޮކްޓަރަށް ދައްކަން ބޭނުންވާ ފަރާތްތަކުން 9763393 އަށް ޑޮކްޓަރަށް ދެއްކުމަށް ނަންނޯޓު ކުރެވޭނެ ކަމަށާއި، މި ކޭމްޕާއި ގުޅޭ މަޢުލޫމާތުވެސް ލިބިގެންދާނެ ކަމަށް އޮފިޝަލް ވިދާޅުވިއެވެ.
މި ކޭމްޕްގައި ފަރުވާ ދިނުމަށް ހަމަޖެހިފައިވަނީ ފީއެއް ނެގުމާއި ނުލައެވެ.
ދެ ދުވަހުގެ މުއްދަތަށް މި ކޭމްޕް ކުރިއަށްގެންދާއިރު، ސިނަރޖީގެ އޮފިޝަލް އިތުރަށް ވިދާޅުވީ، މި ކޭމްޕްގެ ތެރެއިން ބެލެނިވެރިންނަށް ޚާއްސަކޮށްގެން ކުޑަކުދިންގެ ޚާއްސަ ޑޮކްޓަރު، ޑރ. ޢަބްދުﷲ ނިޔާފް މަޢުލޫމާތު ސެޝަނެއްވެސް ކުރިއަށް ގެންދަވާނެ ކަމަށެވެ. މި ސެޝަންގައި މައިގަނޑުގޮތެއްގައި އަލިއަލުވާލާނީ ކުޑަކުދިން ހެދިބޮޑުވުމާއި، ކުޑަކުދިން ކެއުމާއި ދުރުވާ ސަބަބުތަކާއި ގުޅޭގޮތުން ކަމަށާއި، މި ކޭމްޕްގެ ހޮޓްލައިނަށް ގުޅުމުން ސެޝަންގައި ބައިވެރިވެވޭނެ އިންތިޒާމް ހަމަޖެހިގެންދާނެ ކަމަށްވެސް އޮފިޝަލް ވިދާޅުވިއެވެ. މި ސެޝަންގައި ބައިވެރިވުމުގެ ފުރުބަތު އދ އަތޮޅުގެ އެކި ރަށްތަކަށް ނިސްބަތްވާ ބެލެނިވެރިންނަށް ވަނީ ހުޅުވާލާފައެވެ.
އޭޑީކޭ ގްރޫޕް އޮފް ކޮމްޕެނީޒްގައި ހިމެނޭ އެކި ގްރޫޕްތަކުގެ މުވައްޒަފުން ހިމެނޭގޮތަށް އޭޑީކޭ ސިނަރޖީގެ ނަމުގައި ކްލަބެއް އުފައްދާފައިވަނީ 2013 ވަނަ އަހަރުއެވެ. ކްލަބް އުފެދުނީއްސުރެ ކްލަބުން އެކި ހަރަކާތްތައް ހިންގަމުންދިޔަ ނަމަވެސް، މިއީ އެ ކްލަބުން މިފަދަ ހަރަކާތެއް ހިންގާ ފުރަތަމަ ފަހަރެވެ.
